സംവൃതാ സുനിലിന്റെ തിരിച്ചുവരവ് ഷഹീദ് അറഫാത്ത് ചിത്രത്തിന് ഇടുക്കിയിൽ തിരിതെളിഞ്ഞു
ഷഹീദ് അറഫാത്ത് സംവിധാനം ചെയ്യുന്ന പുതിയ ചിത്രത്തിലൂടെ സംവൃതാ സുനിൽ വീണ്ടും ക്യാമറയ്ക്ക് മുന്നിലെത്തുന്നു. ഇടുക്കി പന്ന്യാർകുട്ടിയിൽ നടന്ന ലളിതമായ ചടങ്ങിൽ ദിലീഷ് പോത്തൻ സ്വിച്ചോൺ കർമ്മവും അൽഫോൻസ് പുത്രൻ ഫസ്റ്റ് ക്ലാപ്പും നിർവ്വഹിച്ചു.
Vazhoor Jose 
സംവൃതാ സുനിൽ വീണ്ടും ക്യാമറയ്ക്ക് മുന്നിലേക്ക്; നവരസാ ഫിലിംസിന്റെ പുതിയ ചിത്രത്തിന് ഇടുക്കിയിൽ തുടക്കം
ഇടുക്കി: മലയാളി പ്രേക്ഷകരുടെ പ്രിയനടി സംവൃതാ സുനിൽ ഏറെ നാളത്തെ ഇടവേളയ്ക്ക് ശേഷം വീണ്ടും അഭിനയരംഗത്തേക്ക് തിരിച്ചെത്തുന്നു. ഷഹീദ് അറഫാത്ത് സംവിധാനം ചെയ്യുന്ന പുതിയ ചിത്രത്തിലൂടെയാണ് താരത്തിന്റെ തിരിച്ചുവരവ്. 'പ്രകമ്പനം' എന്ന വിജയ ചിത്രത്തിന് ശേഷം നവരസാ ഫിലിംസും സ്റ്റോൺ ബഞ്ച് സ്റ്റുഡിയോസും ചേർന്ന് നിർമ്മിക്കുന്ന ഈ ചിത്രത്തിന്റെ ചിത്രീകരണം ഇടുക്കി ജില്ലയിലെ പന്ന്യാർകുട്ടിയിൽ ലളിതമായ പൂജാ ചടങ്ങുകളോടെ ആരംഭിച്ചു.
സംവിധായകൻ ഷഹീദ് അറഫാത്ത്, നിർമ്മാതാക്കളായ ശ്രീജിത്ത് കെ.എസ്, കാർത്തികേയൻ എസ്., ദിലീഷ് പോത്തൻ, അൽഫോൻസ് പുത്രൻ, സംവൃതാ സുനിൽ എന്നിവർ ചേർന്നാണ് ചടങ്ങിൽ ഭദ്രദീപം കൊളുത്തിയത്. ദിലീഷ് പോത്തൻ സ്വിച്ചോൺ കർമ്മവും അൽഫോൻസ് പുത്രൻ ഫസ്റ്റ് ക്ലാപ്പും നിർവ്വഹിച്ചു. 'നവരസാ പ്രൊഡക്ഷൻ 3' എന്നാണ് ചിത്രത്തിന് താൽക്കാലികമായി നൽകിയിരിക്കുന്ന പേര്.
ബിജു മേനോൻ, വിനീത് ശ്രീനിവാസൻ എന്നിവർ പ്രധാന വേഷങ്ങളിലെത്തിയ 'തങ്കം' എന്ന ചിത്രത്തിന് ശേഷം ഷഹീദ് അറഫാത്ത് സംവിധാനം ചെയ്യുന്ന ചിത്രമാണിത്. 'കെട്ട്യോളാണ് എന്റെ മാലാഖ', 'അഡിയോസ് അമിഗോസ്' എന്നീ ഹിറ്റ് ചിത്രങ്ങൾക്ക് തിരക്കഥയെഴുതിയ തങ്കം തന്നെയാണ് ഈ ചിത്രത്തിന്റെയും രചന നിർവ്വഹിച്ചിരിക്കുന്നത്.
മലയോര മേഖലയായ ഇടുക്കിയുടെ പശ്ചാത്തലത്തിൽ ഒരുങ്ങുന്ന ഈ ചിത്രത്തിന്റെ ഛായാഗ്രഹണം സുനിൽ കെ.എസ് നിർവ്വഹിക്കുന്നു. ബ്ലെസിയുടെ 'ആടുജീവിതം' എന്ന സിനിമയ്ക്ക് ശേഷം സുനിൽ ക്യാമറ ചലിപ്പിക്കുന്ന മലയാള ചിത്രമാണിത്. 'ഗപ്പി', 'അമ്പിളി' എന്നീ ചിത്രങ്ങളുടെ സംവിധായകനായ ജോൺ പോൾ ജോർജ്ജ് ആദ്യമായി സംഗീത സംവിധായകനാകുന്നു എന്ന പ്രത്യേകതയും ഈ ചിത്രത്തിനുണ്ട്.
ദിലീഷ് പോത്തൻ, അൽഫോൻസ് പുത്രൻ, സംവൃതാ സുനിൽ എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രത്തിൽ ജിബിൻ ഗോപിനാഥ്, അഭിജിത്ത് സുരേഷ്, അശ്വതി മനോഹരൻ, റിയാസ് ഖാൻ, ശ്രുതി ജയൻ, ബിസാൽ പ്രസന്ന എന്നിവരും അണിനിരക്കുന്നു.
ശ്രീജിത്ത് കെ.എസ്, കാർത്തികേയൻ എസ് എന്നിവർ നിർമ്മിക്കുന്ന ചിത്രത്തിന്റെ കോ-പ്രൊഡ്യൂസേഴ്സ് ധിലോർ, റിജോഷ്, മോൻസി, ബ്ലെസ്സി എന്നിവരാണ്. എക്സിക്യൂട്ടീവ് പ്രൊഡ്യൂസർ: അഭിജിത്ത് സുരേഷ്.
മറ്റ് അണിയറ പ്രവർത്തകർ:
എഡിറ്റിംഗ്: കിരൺ ദാസ്
പശ്ചാത്തല സംഗീതം: അജേഷ് ആന്റോ
പ്രൊഡക്ഷൻ ഡിസൈൻ: സുഭാഷ് കരുൺ
ചീഫ് അസ്സോസിയേറ്റ് ഡയറക്ടർ: വിപിൻ വിജയൻ
മേക്കപ്പ്: റോണക്സ് സേവ്യർ
കോസ്റ്റ്യൂം ഡിസൈൻ: ധന്യാ ബാലകൃഷ്ണൻ
ഡിസൈൻ: യെല്ലോ ടുത്ത്
പ്രൊഡക്ഷൻ കൺട്രോളർ: ബിനു മുരളി
