രണ്ട് പതിറ്റാണ്ടുകൾക്ക് ശേഷം ഓണപ്പാട്ടുമായി ഈസ്റ്റ് കോസ്റ്റ് വിജയൻ ഓണം വൈബ് 2026 പുറത്തിറങ്ങി
രണ്ട് പതിറ്റാണ്ടിനു ശേഷം ഈസ്റ്റ് കോസ്റ്റ് വിജയന്റെ രചനയിലും സംവിധാനത്തിലും പുതിയ ഓണപ്പാട്ട് ഓണം വൈബ് 2026 യൂട്യൂബിൽ റിലീസ് ചെയ്തു. വിശദമായി വായിക്കാം.
Vazhoor Jose 
രണ്ട് പതിറ്റാണ്ടുകൾക്ക് ശേഷം പുതിയ ഓണപ്പാട്ടുമായി ഈസ്റ്റ് കോസ്റ്റ് വിജയൻ; 'ഓണം വൈബ് 2026' റിലീസ് ചെയ്തു
കൊച്ചി: മലയാളികളുടെ പ്രണയസങ്കൽപ്പങ്ങളെ തൊട്ടുണർത്തിയ ഒരുപിടി അനശ്വര ഗാനങ്ങൾ സമ്മാനിച്ച ഈസ്റ്റ് കോസ്റ്റ് വിജയൻ രണ്ട് പതിറ്റാണ്ടുകൾക്ക് ശേഷം പുതിയ ഓണപ്പാട്ടുമായി തിരിച്ചെത്തുന്നു. 'ബാല്യകാലസ്മൃതികളായി ഓണം' എന്ന തരംഗമായ മ്യൂസിക് വീഡിയോയ്ക്ക് ശേഷം അദ്ദേഹം ഒരുക്കുന്ന പുതിയ വിശേഷാൽ ഓണപ്പാട്ടായ ‘ഓണം വൈബ് 2026’ പുറത്തിറങ്ങി.
മലയാള ഗാനരംഗത്ത് ഒരു പുതിയ സംഗീത സംസ്കാരത്തിന് തുടക്കമിട്ട ഈസ്റ്റ് കോസ്റ്റ് ബാനർ, മൂന്ന് പതിറ്റാണ്ടുകൾ പൂർത്തിയാക്കുന്ന വേളയിലാണ് ഈ പുതിയ നിർമ്മിതിയുമായി എത്തുന്നത്. 'നിനക്കായ്', 'ആദ്യമായ്', 'ഓർമ്മക്കായ്', 'സ്വന്തം', 'ഇനിയെന്നും', 'എന്നെന്നും', 'വീണ്ടും' തുടങ്ങിയ ഹിറ്റ് ആൽബങ്ങളിലൂടെ തരംഗം സൃഷ്ടിച്ച ഈസ്റ്റ് കോസ്റ്റ്, ഓണത്തിന്റെ ഗൃഹാതുരതയും ആഘോഷത്തിമിർപ്പും കോർത്തിണക്കിയാണ് പുതിയ ഗാനം തയാറാക്കിയിരിക്കുന്നത്.
പഴയതും പുതിയതുമായ തലമുറയ്ക്കായി ഒരു സംഗീതവിരുന്ന്
ഗാനരചനയും സംവിധാനവും ഈസ്റ്റ് കോസ്റ്റ് വിജയൻ തന്നെ നിർവഹിച്ചിരിക്കുന്ന ‘ഓണം വൈബ് 2026’, Gen-Z തലമുറയ്ക്കും പഴയ തലമുറയ്ക്കും ഒരുപോലെ ആസ്വദിക്കാൻ പാകത്തിലാണ് അണിയിച്ചൊരുക്കിയിരിക്കുന്നത്. 'ഭീഷ്മപർവ്വം' ഫെയിം അമ്മേര, നടൻ സന്തോഷ് കീഴാറ്റൂർ, സോഷ്യൽ മീഡിയ താരം ശ്രീജിത്ത് എന്നിവരാണ് ദൃശ്യാവിഷ്കാരത്തിൽ പ്രധാന വേഷങ്ങളിലെത്തുന്നത്.
യുവഗായകരായ സൂര്യനാരായണനും ദേവനന്ദയും ഈസ്റ്റ് കോസ്റ്റ് ബാനറിലൂടെ ഈ ഗാനത്തിലൂടെ അരങ്ങേറ്റം കുറിക്കുന്നു. 'ടീം ഈസ്റ്റ് കോസ്റ്റ്' ആണ് സംഗീത സംവിധാനം നിർവഹിച്ചിരിക്കുന്നത്. ഇരുന്നൂറിലധികം ജൂനിയർ ആർട്ടിസ്റ്റുകൾക്കൊപ്പം വിവിധ കേരളീയ കലാരൂപങ്ങളും ഓണക്കളികളും ഉൾപ്പെടുത്തിയാണ് മ്യൂസിക് വീഡിയോ ചിത്രീകരിച്ചിരിക്കുന്നത്. ശാന്തി മാസ്റ്ററാണ് ഡാൻസ് കൊറിയോഗ്രാഫി.
അണിയറ പ്രവർത്തകർ
എൽദോ ഐസക് ഛായാഗ്രഹണവും മനു ബാലകൃഷ്ണൻ എഡിറ്റിംഗും നിർവഹിച്ചിരിക്കുന്നു. സജിത്ത് കൃഷ്ണൻ (പ്രോജക്റ്റ് ഡിസൈനർ), ധന്യ ബാലകൃഷ്ണൻ (വസ്ത്രാലങ്കാരം), റഹിം കൊടുങ്ങല്ലൂർ (മേക്കപ്പ്), മധു പോൾ (ടൈറ്റിൽ മ്യൂസിക് & പ്രോഗ്രാമിംഗ്), അശ്വിൻ കുമാർ (മിക്സിംഗ് & മാസ്റ്ററിംഗ്), ലിജു പ്രഭാകർ (കളറിസ്റ്റ്) എന്നിവരാണ് മറ്റ് പ്രധാന അണിയറ ശില്പികൾ.
യൂട്യൂബിൽ റിലീസ് ചെയ്ത ഈ മ്യൂസിക് വീഡിയോയുടെ ഓഡിയോ നിലവിൽ എല്ലാ പ്രമുഖ സ്ട്രീമിംഗ് പ്ലാറ്റ്ഫോമുകളിലും ലഭ്യമാണ്.
