​ബിഗ് സ്ക്രീനിൽ തിലകൻ മാജിക് വീണ്ടും ഇന്ദ്രജിത്ത് ചിത്രം നായകൻ 4K റീ റിലീസിന് ഒരുങ്ങുന്നു

​ലിജോ ജോസ് പെല്ലിശ്ശേരിയുടെ മാജിക് വീണ്ടും തിയറ്ററുകളിലേക്ക്; ഇന്ദ്രജിത്തിന്റെ 'നായകൻ' 4K ട്രെയിലർ പുറത്ത് ഒക്ടോബർ 30-നാണ് ചിത്രം ബിഗ് സ്ക്രീനുകളിൽ

കൊച്ചി: മലയാളസിനിമയിൽ പുതിയൊരു ദൃശ്യവിസ്മയത്തിന് തുടക്കം കുറിച്ച ലിജോ ജോസ് പെല്ലിശ്ശേരി-ഇന്ദ്രജിത്ത് കൂട്ടുകെട്ടിന്റെ കൾട്ട് ക്ലാസിക് ചിത്രം 'നായകൻ' വീണ്ടും തിയറ്ററുകളിലേക്ക്. ചിത്രത്തിന്റെ 4K ദൃശ്യമികവിലുള്ള ഒഫീഷ്യൽ ട്രെയിലർ അണിയറപ്രവർത്തകർ പുറത്തുവിട്ടു. റിലീസ് ചെയ്ത് പതിനാറ് വർഷങ്ങൾക്ക് ശേഷം, ഒക്ടോബർ 30-നാണ് ചിത്രം ബിഗ് സ്ക്രീനുകളിൽ വീണ്ടും എത്തുന്നത്.

​പക്കാ ഡാർക്ക് മൂഡിലാണ് ട്രെയിലർ ഒരുക്കിയിരിക്കുന്നത്. മനോജ് പരമഹംസയുടെ സ്റ്റൈലിഷ് ഫ്രെയിമുകളും പ്രശാന്ത് പിള്ളയുടെ കോരിത്തരിപ്പിക്കുന്ന പശ്ചാത്തല സംഗീതവും ട്രെയിലറിനെ ഇതിനോടകം തന്നെ സോഷ്യൽ മീഡിയയിൽ വൈറലാക്കിയിട്ടുണ്ട്. 2010-ൽ തിയറ്ററുകളിൽ എത്തിയ ഈ ചിത്രം ലിജോ ജോസ് പെല്ലിശ്ശേരിയുടെ സംവിധാനമികവിലുള്ള ആദ്യ ചുവടുവെപ്പായിരുന്നു. തന്റെ കുടുംബത്തെ ഇല്ലാതാക്കിയവരോട് പ്രതികാരം വീട്ടാൻ എത്തുന്ന വരദനുണ്ണി എന്ന കഥകളി കലാകാരന്റെ വേഷത്തിലാണ് ഇന്ദ്രജിത്ത് ചിത്രത്തിൽ അഭിനയിച്ചത്.

​തിയറ്ററുകളിൽ അന്ന് വേണ്ടത്ര വിജയം നേടാനായില്ലെങ്കിലും, ഇന്ദ്രജിത്തിന്റെ കരിയറിലെ ഏറ്റവും മികച്ച പ്രകടനങ്ങളിലൊന്നായി വരദനുണ്ണി ഇന്നും വിലയിരുത്തപ്പെടുന്നു. തിലകൻ, ജഗതി ശ്രീകുമാർ, സിദ്ദിഖ്, വിജയരാഘവൻ, ലാലു അലക്സ്, ധന്യ മേരി വർഗീസ് തുടങ്ങിയ വൻ താരനിര തന്നെ ചിത്രത്തിൽ അണിനിരന്നിട്ടുണ്ട്. പി.എസ്. റഫീക്കിന്റെ തിരക്കഥയിൽ ഇല്യുമിനാറ്റോ ഫിലിംസിന്റെ ബാനറിൽ അനൂപ് ജോൺസൺ കരേടൻ ആണ് ചിത്രം നിർമ്മിച്ചത്.

​'ദേവദൂതൻ', 'ഛോട്ടാ മുംബൈ', 'കിരീടം' തുടങ്ങിയ ക്ലാസിക് ചിത്രങ്ങളുടെ റീറിലീസ് വിജയത്തിന് ശേഷം ഹൈ സ്റ്റുഡിയോസ് (High Studioz) ആണ് 'നായകൻ' സിനിമ 4K ഡോൾബി അറ്റ്മോസിൽ റീമാസ്റ്റർ ചെയ്തിരിക്കുന്നത്. ഹൈസിൻ ഗ്ലോബൽ വെഞ്ചേഴ്സ് (Hycin Global Ventures) ആണ് ചിത്രം തിയറ്ററുകളിൽ എത്തിക്കുന്നത്.

​മനോജ് എഡിറ്റിംഗും രംഗനാഥ് രവി സൗണ്ട് ഡിസൈനും നിർവഹിച്ചിരിക്കുന്ന ചിത്രത്തിന്റെ ആർട്ട് ഡയറക്ടർ സാലു കെ. ജോർജ്ജാണ്. പ്രശാന്ത് പിള്ളയുടെ നോൺ-ഇൻട്രൂസീവ് സംഗീതം ഒക്ടോബർ 30-ന് വീണ്ടും തിയറ്ററുകളിൽ അനുഭവവേദ്യമാകും.