ഷാജി പട്ടിക്കരയുടെ കൊടുങ്ങല്ലൂർ ഭരണി കാഴ്ച ഡോക്യുമെന്ററി പൂർത്തിയായി ശബ്ദമായി ഇന്ദ്രൻസും രചനയുമായി പി.ആർ സുമേരനും
കേരളത്തിലെ പ്രശസ്തമായ കൊടുങ്ങല്ലൂർ ശ്രീകുരുംബ ഭഗവതി ക്ഷേത്രത്തിലെ ആചാരങ്ങളെയും ചരിത്രത്തെയും ആസ്പദമാക്കി ഷാജി പട്ടിക്കര സംവിധാനം ചെയ്ത കൊടുങ്ങല്ലൂർ ഭരണി കാഴ്ച ഡോക്യുമെന്ററി പൂർത്തിയായി. പി.ആർ. സുമേരൻ രചന നിർവ്വഹിച്ച ചിത്രത്തിന് ശബ്ദം നൽകിയിരിക്കുന്നത് പ്രമുഖ നടൻ ഇന്ദ്രൻസാണ്
P R Sumeran 
കൊച്ചി: കേരളത്തിലെ ഏറ്റവും ശ്രദ്ധേയമായ ശാക്തേയ പൂജാകേന്ദ്രമായ കൊടുങ്ങല്ലൂർ ശ്രീകുരുംബ ഭഗവതി ക്ഷേത്രത്തിന്റെ ആചാര അനുഷ്ഠാനങ്ങളിലേക്കും ചരിത്രത്തിലേക്കും വെളിച്ചം വീശുന്ന 'കൊടുങ്ങല്ലൂർ ഭരണി കാഴ്ച' എന്ന ഡോക്യുമെന്ററിയുടെ ചിത്രീകരണം പൂർത്തിയായി. ഫ്രെയിം ടു ഫ്രെയിം ഫിലിമിന്റെ ബാനറിൽ മധുസൂദനൻ മാവേലിക്കരയും, ഫുൾ മാർക്ക് സിനിമയുടെ ബാനറിൽ ജെഷീദ ഷാജിയും സംയുക്തമായാണ് ഈ ഡോക്യുമെന്ററി നിർമ്മിച്ചിരിക്കുന്നത്.
മലയാള ചലച്ചിത്രരംഗത്തെ ശ്രദ്ധേയനായ പ്രൊഡക്ഷൻ കൺട്രോളറും എഴുത്തുകാരനുമായ ഷാജി പട്ടിക്കരയാണ് ചിത്രത്തിന്റെ സംവിധാനം നിർവ്വഹിച്ചിരിക്കുന്നത്. പ്രമുഖ നടൻ ഇന്ദ്രൻസിന്റെ സവിശേഷമായ നരേഷനാണ് ഈ ഡോക്യുമെന്ററിയുടെ പ്രധാന ആകർഷണം. മാധ്യമപ്രവർത്തകനും സിനിമാ പി.ആർ.ഒ.യുമായ പി.ആർ. സുമേരനാണ് ഇതിന്റെ രചന നിർവ്വഹിച്ചിരിക്കുന്നത്.
കേരളത്തിലെ ക്ഷേത്രോത്സവങ്ങളിൽ ഏറെ വേറിട്ടുനിൽക്കുന്ന കൊടുങ്ങല്ലൂർ ഭരണി, അശ്വതി കാവുതീണ്ടൽ തുടങ്ങിയ പ്രധാന ചടങ്ങുകളെയും അതിന് പിന്നിലെ ചരിത്ര വസ്തുതകളെയും ആഴത്തിൽ ദൃശ്യവൽക്കരിക്കുന്നതാണ് ഈ ഡോക്യുമെന്ററി. ചരിത്ര ഗ്രന്ഥങ്ങളുടെ പിൻബലത്തോടെ, കൊടുങ്ങല്ലൂർ കോവിലകത്തെ പ്രമുഖ ചരിത്ര പണ്ഡിതന്മാരുടെ നിരീക്ഷണങ്ങളും ആഖ്യാനങ്ങളും ഉൾപ്പെടുത്തിയാണ് ഇതിവൃത്തം തയ്യാറാക്കിയിട്ടുള്ളത്.
"ശ്രീകുരുംബ ക്ഷേത്രത്തിന്റെ ചരിത്രത്തിലൂടെയുള്ള ഒരു സഞ്ചാരമാണിതെങ്കിലും, കൊടുങ്ങല്ലൂരിന്റെ സംസ്കാരത്തിനും പൈതൃകത്തിനും അർഹിക്കുന്ന പ്രാധാന്യം ഡോക്യുമെന്ററിയിൽ നൽകിയിട്ടുണ്ട്."
— ഷാജി പട്ടിക്കര (സംവിധായകൻ)
"കേവലമൊരു ക്ഷേത്ര വിശേഷങ്ങൾക്കപ്പുറം മിത്തും യാഥാർത്ഥ്യവും തമ്മിലുള്ള വൈരുദ്ധ്യങ്ങളും പൊരുത്തങ്ങളും ആത്മീയതയുടെ പശ്ചാത്തലത്തിൽ ഇതിൽ ചർച്ച ചെയ്യുന്നുണ്ട്."
— പി.ആർ. സുമേരൻ (രചയിതാവ്)
അണിയറ പ്രവർത്തകർ:
ഫഹദ് അബ്ദുള്ളയാണ് ഡോക്യുമെന്ററിയുടെ ക്യാമറ ചലിപ്പിച്ചിരിക്കുന്നത്. ചിത്രസംയോജനം അയൂബ് ഖാനും സൗണ്ട് ഡിസൈൻ അരുൺ വർമ്മയും നിർവ്വഹിച്ചു. സൗണ്ട് മിക്സിംഗ്: ഹരിനാരായണൻ, പ്രൊഡക്റ്റ് ഡിസൈനർ: അജയ് ജോസഫ്, സബ് ടൈറ്റിൽസ്: നിസാം അസാഫ്, സ്റ്റിൽസ്: എ.കെ. ബിജുരാജ്, പോസ്റ്റർ ഡിസൈൻ: മനോജ് ഡിസൈൻ എന്നിവരാണ് മറ്റ് അണിയറ പ്രവർത്തകർ. ചിത്രം ഉടൻ തന്നെ പ്രേക്ഷകരിലേക്ക് എത്തും.
