കീർത്തി സുരേഷ് രാധിക ആപ്‌തെ ടീമിന്റെ അക്ക ട്രെയ്‌ലർ പുറത്ത്

കീർത്തി സുരേഷ് - രാധിക ആപ്‌തെ കൂട്ടുകെട്ടിൽ ‘അക്ക’ ട്രെയ്‌ലർ പുറത്ത് ഒക്ടോബർ 30 മുതൽ നെറ്റ്ഫ്ലിക്സിൽ

​കൊച്ചി: കീർത്തി സുരേഷും രാധിക ആപ്‌തെയും ആദ്യമായി ഒന്നിക്കുന്ന നെറ്റ്ഫ്ലിക്സ് സീരീസ് ‘അക്ക’യുടെ (Akka) ഒഫീഷ്യൽ ട്രെയ്‌ലർ പുറത്തിറങ്ങി. യഷ് രാജ് ഫിലിംസിന്റെ വൈആർഎഫ് എന്റർടെയ്ൻമെന്റ് നിർമ്മിക്കുന്ന ഈ മാസ്സ് ആക്ഷൻ ത്രില്ലർ ഒക്ടോബർ 30 മുതൽ നെറ്റ്ഫ്ലിക്സിലൂടെ ആഗോളതലത്തിൽ സ്ട്രീമിങ് ആരംഭിക്കും. ധർമരാജ് ഷെട്ടിയാണ് സീരീസിന്റെ രചനയും സംവിധാനവും നിർവ്വഹിച്ചിരിക്കുന്നത്.

​1980കളുടെ പശ്ചാത്തലത്തിലുള്ള പെർണുരു എന്ന സാങ്കൽപ്പിക രാജ്യമാണ് സീരീസിന്റെ കഥാപരിസരം. തലമുറകളായി സ്ത്രീകൾ അധികാരം കൈയാളുന്ന ഇവിടേക്ക് പുറത്തുനിന്നെത്തുന്ന ഒരാൾ നടത്തുന്ന ഇടപെടലുകളും തുടർന്നുണ്ടാകുന്ന സംഘർഷങ്ങളുമാണ് കഥയുടെ പശ്ചാത്തലം. അധികാരവും പാരമ്പര്യവും പ്രതികാരവും പ്രമേയമാകുന്ന സീരീസിൽ കരുത്തുറ്റ രണ്ട് കഥാപാത്രങ്ങളായാണ് കീർത്തി സുരേഷും രാധിക ആപ്‌തെയും എത്തുന്നത്.

​ഭവാനി എന്ന ശക്തമായ കഥാപാത്രത്തെയാണ് കീർത്തി സുരേഷ് അവതരിപ്പിക്കുന്നത്. സ്വന്തം അധികാരവും പാരമ്പര്യവും സംരക്ഷിക്കാൻ ഏതറ്റം വരെയും പോകുന്ന സ്ത്രീയാണ് ഭവാനി. അതേസമയം, നിലവിലുള്ള വ്യവസ്ഥയെ ചോദ്യം ചെയ്യുകയും സ്വന്തം ലക്ഷ്യങ്ങൾക്കായി പൊരുതുകയും ചെയ്യുന്ന രുദ്രയായാണ് രാധിക ആപ്‌തെ വേഷമിടുന്നത്. തൻവി ആസ്മി, മഹേഷ് മഞ്ജരേക്കർ, അൻഷുമാൻ പുഷ്കർ, മോണിക്ക പൻവാർ എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.

​സ്ത്രീകൾ കഥാപാത്രങ്ങൾ മാത്രമാകാതെ അധികാരത്തിന്റെ കേന്ദ്രമായി മാറുന്ന ഒരു പുതിയ ലോകമാണ് ‘അക്ക’യിലൂടെ അവതരിപ്പിക്കുന്നതെന്ന് നെറ്റ്ഫ്ലിക്സ് ഇന്ത്യ സീരീസ് ഹെഡ് താന്യ ബാമി വ്യക്തമാക്കി. ഗ്യാങ്സ്റ്റർ വിഭാഗത്തിൽ പെടുന്ന കഥയാണെങ്കിലും, സാധാരണ ഇത്തരം ചിത്രങ്ങളുടെ കേന്ദ്രത്തിൽ വരാത്ത കഥാപാത്രങ്ങളിലൂടെയും ബന്ധങ്ങളിലൂടെയുമാണ് സീരീസ് മുന്നോട്ട് പോകുന്നത് എന്ന് സംവിധായകൻ ധർമരാജ് ഷെട്ടിയും പ്രതികരിച്ചു. വൈആർഎഫ് എന്റർടെയ്ൻമെന്റിന്റെ ബാനറിൽ ആദിത്യ ചോപ്ര, യോഗേന്ദ്ര മൊഗ്രെ, അക്ഷയ് വിധാനി എന്നിവരാണ് സീരീസ് നിർമ്മിച്ചിരിക്കുന്നത്.