ടോക്സിക്കിൽ എലിസബത്തായി ഹുമ ഖുറേഷി
ടോക്സിക്കിൽ എലിസബത്തായി ഹുമ ഖുറേഷി. നിഗൂഢത നിറച്ച് ക്യാരക്ടർ പോസ്റ്റർ പുറത്ത് കെ ജി എഫ് താരം യാഷിനെ നായകനാക്കി ഗീതു മോഹൻദാസ് സംവിധാനം ചെയ്യുന്ന ചിത്രം
Pratheesh Sekhar 
‘ടോക്സിക്കി’ൽ ‘എലിസബത്തായി’ ഹുമ ഖുറേഷി; നിഗൂഢത നിറച്ച് ക്യാരക്ടർ പോസ്റ്റർ പുറത്ത്
കൊച്ചി: കെ.ജി.എഫ് താരം യാഷിനെ നായകനാക്കി ഗീതു മോഹൻദാസ് സംവിധാനം ചെയ്യുന്ന ‘ടോക്സിക്: എ ഫെയർടെയിൽ ഫോർ ഗ്രോൺ-അപ്പ്സ്’ എന്ന ചിത്രത്തിലെ ഹുമ ഖുറേഷിയുടെ ലുക്ക് പുറത്തുവിട്ടു. ‘എലിസബത്ത്’ എന്ന കരുത്തുറ്റ കഥാപാത്രമായാണ് ഹുമ ചിത്രത്തിലെത്തുന്നത്. ശ്മശാന പശ്ചാത്തലത്തിൽ വിന്റേജ് കാറിനരികെ നിൽക്കുന്ന ഹുമയുടെ ലുക്ക് ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു.
നിഗൂഢതയും ശാന്തമായ ഭീഷണിയും ഒളിപ്പിച്ചുവെച്ച കഥാപാത്രമാണ് എലിസബത്തെന്ന് പോസ്റ്റർ സൂചിപ്പിക്കുന്നു. ഗാഥിക് അന്തരീക്ഷത്തിൽ കറുത്ത വസ്ത്രമണിഞ്ഞ് നിൽക്കുന്ന ഹുമയുടെ ചിത്രം സിനിമയുടെ ഡാർക്ക് ത്രില്ലർ സ്വഭാവം അടിവരയിടുന്നു. എലിസബത്തിനെ അവതരിപ്പിക്കാൻ ഏറ്റവും അനുയോജ്യയായ നടി ഹുമയാണെന്നും അവളുടെ പ്രകടനം പുതിയൊരു അനുഭവമായിരിക്കുമെന്നും സംവിധായിക ഗീതു മോഹൻദാസ് പറഞ്ഞു.
കെ.ജി.എഫ് 2-വിന് ശേഷം നാല് വർഷത്തെ ഇടവേള കഴിഞ്ഞാണ് യാഷ് വെള്ളിത്തിരയിലേക്ക് മടങ്ങിയെത്തുന്നത്. കെ.വി.എൻ പ്രൊഡക്ഷൻസും മോൺസ്റ്റർ മൈൻഡ് ക്രിയേഷൻസും ചേർന്ന് നിർമ്മിക്കുന്ന ചിത്രം കന്നഡ, ഇംഗ്ലീഷ് ഭാഷകളിൽ ഒരേസമയം ചിത്രീകരിച്ച് മലയാളം ഉൾപ്പെടെയുള്ള ഭാഷകളിൽ പുറത്തിറക്കും.
രാജീവ് രവി ക്യാമറയും രവി ബസ്രൂർ സംഗീതവും നിർവ്വഹിക്കുന്ന ചിത്രത്തിൽ ‘ജോൺ വിക്’ ഫെയിം ജെ.ജെ. പെറിയാണ് ആക്ഷൻ രംഗങ്ങൾ ഒരുക്കുന്നത്. 2026 മാർച്ച് 19-ന് ചിത്രം തിയേറ്ററുകളിലെത്തും. പി.ആർ.ഒ: പ്രതീഷ് ശേഖർ.
