ബാബു ജനാർദ്ദനന്റെ ഗാന്ധിനഗർ സൺഡേ മാർക്കറ്റ് ടൈറ്റിൽ പ്രകാശനം കൊച്ചിയിൽ നടന്നു
പ്രശസ്ത ബോളിവുഡ് താരം ഇർഫാൻ ഖാന്റെ മകൻ ബാബിൽ ഖാൻ നായകനാകുന്ന ബാബു ജനാർദ്ദനൻ ചിത്രം ഗാന്ധിനഗർ സൺഡേ മാർക്കറ്റ് ടൈറ്റിൽ പോസ്റ്റർ പുറത്തിറങ്ങി. കൊച്ചിയിൽ നടന്ന ചടങ്ങിൽ സംവിധായകൻ എം. പത്മകുമാറാണ് ടൈറ്റിൽ പ്രകാശനം നിർവ്വഹിച്ചത്.
Vazhoor Jose
13
കൊച്ചി: പ്രശസ്ത തിരക്കഥാകൃത്തും സംവിധായകനുമായ ബാബു ജനാർദ്ദനൻ സംവിധാനം ചെയ്യുന്ന പുതിയ ചിത്രത്തിന്റെ ടൈറ്റിൽ പ്രകാശനം ചെയ്തു. 'ഗാന്ധിനഗർ സൺഡേ മാർക്കറ്റ്' എന്ന് പേരിട്ടിരിക്കുന്ന ചിത്രത്തിന്റെ ടൈറ്റിൽ ലോഞ്ച് കൊച്ചി ഐ.എം.എ ഹാളിൽ വച്ച് നടന്നു. സംവിധായകൻ എം. പത്മകുമാർ ചടങ്ങിൽ ടൈറ്റിൽ പ്രകാശനം നിർവ്വഹിച്ചു. ഗുരു കൃപാ ഫിലിംസിന്റെ ബാനറിൽ അനിൽകുമാർ ശിവദാസാണ് ചിത്രം നിർമ്മിക്കുന്നത്. നിർമ്മാണ കമ്പനിയുടെ ലോഗോ പ്രകാശനം സംവിധായകൻ ജോണി ആന്റണി നിർവ്വഹിച്ചു.
അന്തരിച്ച ബോളിവുഡ് ഇതിഹാസം ഇർഫാൻ ഖാന്റെ മകൻ ബാബിൽ ഖാൻ ആദ്യമായി മലയാളത്തിൽ കേന്ദ്രകഥാപാത്രത്തെ അവതരിപ്പിക്കുന്നു എന്ന പ്രത്യേകതയും ഈ ചിത്രത്തിനുണ്ട്. അപർണ്ണ ബാലമുരളി, ആത്മീയ, പുതുമുഖം നിഖിൽ നായർ, സുധീർ കരമന, ജഗദീഷ്, ജോണി ആന്റണി, ദിനേശ് പ്രഭാകർ തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നു.
കേരളത്തിലെ കുടിയേറ്റ തൊഴിലാളികളുടെ (ഭായിമാർ) ജീവിത പശ്ചാത്തലത്തിലാണ് സിനിമ ഒരുങ്ങുന്നത്. 90-കളിൽ പെരുമ്പാവൂരിലെ പ്ലൈവുഡ് ഫാക്ടറികളിൽ തുടങ്ങി ഇന്ന് കേരളത്തിന്റെ സാമൂഹിക വ്യവസ്ഥയിൽ അവിഭാജ്യ ഘടകമായി മാറിയ അന്യസംസ്ഥാന തൊഴിലാളികളിൽ നാല് സുഹൃത്തുക്കളുടെ കഥയാണ് ചിത്രം പറയുന്നത്.
സംവിധായകരായ അരുൺ ഗോപി, ടിനു പാപ്പച്ചൻ, തിരക്കഥാകൃത്ത് സുനീഷ് വാരനാട്, നിർമ്മാതാക്കളായ എൻ.എം. ബാദുഷ, അരുൺ നാരായണൻ തുടങ്ങിയവർ ചടങ്ങിൽ ആശംസകൾ നേർന്നു.
മെയ് 19-ന് ജാർഖണ്ഡിലെ സിലിഗുരിയിൽ ചിത്രീകരണം ആരംഭിക്കുന്ന സിനിമയുടെ തുടർന്നുള്ള ഭാഗങ്ങൾ പെരുമ്പാവൂർ, കൊച്ചി എന്നിവിടങ്ങളിലായി ചിത്രീകരിക്കും.
അണിയറ പ്രവർത്തകർ:
സംഗീതം: നന്ദഗോപൻ വി.
ഛായാഗ്രഹണം: ഫാസിൽ നാസർ
എഡിറ്റിംഗ്: സൂരജ് ഇ.എസ്
കലാസംവിധാനം: വിനോദ് പട്ടണക്കാടൻ
മേക്കപ്പ്: റഷീദ് അഹമ്മദ്
