പെരുമ്പാവൂരിൽ പരസ്യ ചിത്രീകരണത്തിനെത്തിയ ഡൽഹി സ്വദേശിയായ മോഡൽ പാറമടയിൽ മുങ്ങിമരിച്ചു
പെരുമ്പാവൂർ മുടക്കുഴയിലെ പാറമടയിൽ പരസ്യ ചിത്രീകരണത്തിന് ലൊക്കേഷൻ കാണാനെത്തിയ ഡൽഹി സ്വദേശിയായ മോഡൽ വെള്ളക്കെട്ടിൽ മുങ്ങിമരിച്ചു.
Angel Varghese 
പെരുമ്പാവൂരിൽ പരസ്യ ചിത്രീകരണത്തിനെത്തിയ ഡൽഹി സ്വദേശിയായ മോഡൽ പാറമടയിൽ മുങ്ങിമരിച്ചു
പെരുമ്പാവൂർ: പരസ്യ ചിത്രീകരണത്തിനായി ലൊക്കേഷൻ പരിശോധിക്കാനെത്തിയ സംഘത്തിലെ ഡൽഹി സ്വദേശിയായ യുവാവ് പെരുമ്പാവൂരിൽ പാറമടയിലെ വെള്ളക്കെട്ടിൽ മുങ്ങിമരിച്ചു. ഡൽഹി അംബേദ്കർ നഗർ സ്വദേശി ദിവ്യാൻഷു ജോഷി (26) ആണ് മരിച്ചത്. പെരുമ്പാവൂർ കുറുപ്പംപടിക്ക് സമീപം മുടക്കുഴ പഞ്ചായത്തിലെ പെട്ടിമല പാറമടയിൽ ഇന്ന് വൈകിട്ടോടെയായിരുന്നു അപകടം. പാറമടയിലെ വെള്ളത്തിൽ ഇറങ്ങുന്നതിനിടെ കാൽവഴുതി ആഴത്തിലേക്ക് താഴ്ന്നുപോവുകയായിരുന്നു.
ഡൽഹി ആസ്ഥാനമായി പ്രവർത്തിക്കുന്ന പ്രമുഖ വസ്ത്രനിർമാണ കമ്പനിയുടെ പരസ്യ ചിത്രീകരണത്തിനായാണ് നാലംഗ സംഘം കേരളത്തിലെത്തിയത്. ചാലക്കുടിയിലുള്ള ഒരു പരസ്യ ഏജൻസിക്കായിരുന്നു ചിത്രീകരണത്തിന്റെ ചുമതല. ഇന്ന് സർക്കാർ അവധിയായതിനാൽ, നാളെ മുടക്കുഴ പഞ്ചായത്തിൽ നിന്നും ഷൂട്ടിങ്ങിനുള്ള ഔദ്യോഗിക അനുമതി വാങ്ങാനിരിക്കുകയായിരുന്നു സംഘമെന്ന് കോടനാട് പോലീസ് അറിയിച്ചു. ഇതിനിടയിലാണ് ലൊക്കേഷൻ മുൻകൂട്ടി കാണുന്നതിനായി സംഘം പെട്ടിമലയിൽ എത്തിയത്.
അപകടം വീഡിയോ ചിത്രീകരിക്കുന്നതിനിടെ
ലൊക്കേഷൻ കാണുന്നതിനിടെ ദിവ്യാൻഷു ജോഷി പാറമടയിലെ വെള്ളത്തിലേക്ക് ഇറങ്ങുകയായിരുന്നു. കൂടെയുണ്ടായിരുന്ന സുഹൃത്ത് മൊബൈൽ ഫോണിൽ വീഡിയോ ചിത്രീകരിക്കുന്നതിനിടെയാണ് ദിവ്യാൻഷു പെട്ടെന്ന് നിയന്ത്രണം വിട്ട് ഒഴുക്കിൽപ്പെട്ടതും ആഴത്തിലേക്ക് മുങ്ങിത്താഴ്ന്നതും.
കൂടെയുണ്ടായിരുന്നവർ ഉടൻ തന്നെ വിവരമറിയിച്ചതിനെ തുടർന്ന് പെരുമ്പാവൂരിൽ നിന്നും ഫയർഫോഴ്സ് സംഘം സ്ഥലത്തെത്തി ദ്രുതഗതിയിൽ തിരച്ചിൽ ആരംഭിച്ചു. നൂറിലധികം അടി താഴ്ചയുള്ളതും പല തട്ടുകളായി കിടക്കുന്നതുമായ അതീവ അപകടം നിറഞ്ഞ പാറമടയാണിത്. ഒടുവിൽ ഫയർഫോഴ്സ് 'പാതാളക്കരണ്ടി' ഉപയോഗിച്ച് നടത്തിയ വിപുലമായ തിരച്ചിലിനൊടുവിൽ, ഏകദേശം 30 അടി താഴ്ചയിൽ നിന്നാണ് യുവാവിന്റെ മൃതദേഹം കണ്ടെടുത്തത്.
ഉടൻ തന്നെ പെരുമ്പാവൂർ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇൻക്വസ്റ്റ് ഉൾപ്പെടെയുള്ള തുടർനടപടികൾക്കായി മൃതദേഹം ഇപ്പോൾ ആശുപത്രി മോർച്ചറിയിലേക്ക് മാറ്റിയിരിക്കുകയാണ്. കോടനാട് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
അപകടമേഖല: മുൻപും ജീവനുകൾ പൊലിഞ്ഞു
മുൻപും സമാനമായ രീതിയിൽ യുവാക്കൾ മുങ്ങിമരിച്ച സംഭവങ്ങൾ ഈ പാറമടയിൽ ഉണ്ടായിട്ടുണ്ട്. ഇതു കണക്കിലെടുത്ത് അധികൃതർ ഇവിടേക്കുള്ള പ്രവേശനം കർശനമായി നിരോധിച്ചിരുന്നതാണ്. ഇത് വകവെക്കാതെയാണ് സംഘം അപകടമേഖലയിലേക്ക് ഇറങ്ങിയതെന്നാണ് സൂചന.
