അമാനുഷ്യ ശക്തികൾക്കെതിരെ പോരാടാൻ റഹ്മാൻ ജമീന്ദാറായി തമിഴിൽ പുതിയ ബ്രഹ്മാണ്ഡ ചിത്രം
എവർഗ്രീൻ സ്റ്റാർ റഹ്മാൻ നായകനാകുന്ന ഭാരതി ബാലകുമാരൻ ചിത്രത്തിന്റെ ഷൂട്ടിങ് പുതുക്കോട്ടയിൽ ആരംഭിച്ചു. 1980 കളിലെ നാട്ടാർ മർമ്മ കഥ പറയുന്ന ചിത്രത്തിൽ ജമീന്ദാറായാണ് റഹ്മാൻ എത്തുന്നത്.
Ajay Kumar 
അമാനുഷ്യ ബ്രഹ്മാണ്ഡ തമിഴ് ചിത്രത്തിൽ ജമീന്ദാറായി റഹ്മാൻ; ഷൂട്ടിങ് പുതുക്കോട്ടയിൽ
ചെന്നൈ: 'എവർഗ്രീൻ സ്റ്റാർ' റഹ്മാൻ ജമീന്ദാറുടെ വേഷത്തിൽ നായകനാകുന്ന, ഇനിയും പേരിട്ടിട്ടില്ലാത്ത പുതിയ തമിഴ് ചിത്രത്തിന്റെ ചിത്രീകരണം പുതുക്കോട്ടയിൽ ആരംഭിച്ചു. ഗ്രാമീണ പശ്ചാത്തലത്തിലൊരുങ്ങുന്ന ചിത്രത്തിൽ ഇതുവരെ ചെയ്യാത്ത തികച്ചും വ്യത്യസ്തവും ശക്തവുമായ കഥാപാത്രത്തെയാണ് റഹ്മാൻ അവതരിപ്പിക്കുന്നത്. 'വിഴാ' എന്ന ചിത്രത്തിലൂടെ ശ്രദ്ധേയനായ ഭാരതി ബാലകുമാരനാണ് ചിത്രത്തിന്റെ സംവിധായകൻ. 'ചാമ്പ്യൻ' എന്ന സിനിമയിലൂടെ പ്രേക്ഷകശ്രദ്ധ നേടിയ വിശ്വയാണ് ചിത്രത്തിലെ മറ്റൊരു പ്രധാന നായകൻ.
മലയാളത്തിൽ 'മിഡിൽ ക്ലാസ് മാത്തുക്കുട്ടി' എന്ന ചിത്രം നിർമ്മിച്ച കോമളാ ഹരി പിക്ചേഴ്സിന്റെ ബാനറിൽ കോമള - ഹരി ഭാസ്കരൻ ദമ്പതികൾ നിർമ്മിക്കുന്ന നാലാമത്തെ ചിത്രമാണിത്. ഒരു വലിയ ബ്രഹ്മാണ്ഡ ചിത്രമായിട്ടാണ് ഇത് അണിയറയിൽ ഒരുങ്ങുന്നത്.
നാട്ടാർ മർമ്മ കഥയുമായി ഒരു പീരിയഡ് ത്രില്ലർ
തമിഴ്നാട്ടിലെ തെക്കൻ ജില്ലകളിൽ നിലനിന്നിരുന്ന 'നാട്ടാർ' ആചാരങ്ങളും അവയ്ക്ക് പിന്നിലെ അമാനുഷ്യ കഥകളുമാണ് ചിത്രത്തിന്റെ പ്രമേയം. 1980-കളുടെ പശ്ചാത്തലത്തിൽ, അക്കാലത്ത് നടന്ന ചില രക്തച്ചൊരിച്ചിലുകളുടെയും അമാനുഷ്യ സംഭവങ്ങളുടെയും പശ്ചാത്തലത്തിലാണ് സിനിമ കഥ പറയുന്നത്. അമാനുഷ്യ സംഭവങ്ങളാൽ തകർച്ചയിലാകുന്ന തന്റെ കുടുംബത്തെ രക്ഷിക്കാൻ തീവ്രശ്രമം നടത്തുന്ന ഒരു ജമീന്ദാറുടെ വേഷമാണ് റഹ്മാന്റേത്.
"ആദ്യം ഈ കഥാപാത്രം ചെയ്യാൻ റഹ്മാൻ സാർ വിസമ്മതിച്ചിരുന്നു. എന്നാൽ കഥ മുഴുവൻ കേട്ടപ്പോൾ, ഇതിന്റെ വ്യത്യസ്തതയും തനിമയും മനസ്സിലാക്കി അദ്ദേഹം സമ്മതം മൂളുകയായിരുന്നു. റഹ്മാൻ സാറിന്റെ സിനിമാ ജീവിതത്തിലെ ഏറ്റവും പ്രധാനപ്പെട്ട ഒരു ചിത്രമായിരിക്കും ഇത്," സംവിധായകൻ ഭാരതി ബാലകുമാരൻ വ്യക്തമാക്കി.
വമ്പൻ താരനിരയും അണിയറപ്രവർത്തകരും
അനുപമ കുമാർ, രമ്യാ സുരേഷ്, റിഷാ ജേക്കബ്സ്, 'ആടുകളം' നരേൻ, മൈം ഗോപി, മുനിഷ് കാന്ത്, ബാബാ ഭാസ്കർ തുടങ്ങി തമിഴിലെ പ്രമുഖ താരങ്ങൾ അണിനിരക്കുന്ന ചിത്രത്തിന് വേണ്ടി ക്യാമറ ചലിപ്പിക്കുന്നത് ഭാനു മുരുകനാണ്. 'അമരൻ' എന്ന ചിത്രത്തിലൂടെ ശ്രദ്ധേയനായ കലൈവാണനാണ് എഡിറ്റിങ് നിർവ്വഹിക്കുന്നത്. ദിനേശ് കാശിയാണ് സ്റ്റണ്ട് മാസ്റ്റർ. പി.ആർ.ഒ: ജോൺസൺ, സി.കെ. അജയ് കുമാർ.
