വ്യത്യസ്തമായൊരു സൗഹൃദക്കഥയുമായി എന്നും ടീസർ എത്തി

വിഷ്ണു ഉണ്ണികൃഷ്ണനും പൂജയും ഒന്നിക്കുന്നു; രാജേഷ് ബാബു കെ. ശൂരനാടിന്റെ 'എന്നും' ടീസർ പുറത്തിറങ്ങി

​കൊച്ചി: മലയാള സിനിമയിൽ നിർമ്മാതാവായും സംഗീത സംവിധായകനായും ശ്രദ്ധേയനായ രാജേഷ് ബാബു കെ. ശൂരനാട് ആദ്യമായി തിരക്കഥയെഴുതി സംവിധാനം ചെയ്യുന്ന പുതിയ ചിത്രമാണ് 'എന്നും'. വിഷ്ണു ഉണ്ണികൃഷ്ണനും പൂജയും കേന്ദ്രകഥാപാത്രങ്ങളായി എത്തുന്ന ചിത്രത്തിന്റെ ഒഫീഷ്യൽ ടീസർ അണിയറ പ്രവർത്തകർ പുറത്തുവിട്ടു. വളരെ വ്യത്യസ്തമായ ഒരു സൗഹൃദത്തിന്റെ കഥ പറയുന്ന ഈ ചിത്രം ഉടൻ തന്നെ തിയേറ്ററുകളിൽ എത്തുമെന്നാണ് അണിയറപ്രവർത്തകർ അറിയിച്ചിരിക്കുന്നത്.

​ഇരുപതിലധികം സിനിമകൾക്ക് സംഗീതം നൽകിയിട്ടുള്ള രാജേഷ് ബാബു, 'പെർഫ്യൂം - ഹെർ ഫ്രാഗ്രൻസ്', 'ബൈനറി', 'ഴ', 'ഇനി' തുടങ്ങിയ ചിത്രങ്ങളുടെ നിർമ്മാതാവുകൂടിയാണ്. സംഗീതത്തിന് ഏറെ പ്രാധാന്യമുള്ള ഈ ചിത്രത്തിലെ ഗാനങ്ങൾക്ക് കൈതപ്രം ദാമോദരൻ നമ്പൂതിരി, വയലാർ ശരത്‌ചന്ദ്ര വർമ്മ, പി.കെ. ഗോപി, മിത്രൻ വിശ്വനാഥ്, സുധി, അലി എന്നിവരാണ് വരികൾ കുറിച്ചിരിക്കുന്നത്. പുറത്തിറങ്ങിയ ചിത്രത്തിന്റെ ടീസറിന് മികച്ച പ്രതികരണമാണ് സമൂഹമാധ്യമങ്ങളിൽ ലഭിച്ചുകൊണ്ടിരിക്കുന്നത്.

​ചിത്രത്തിൽ വിഷ്ണു ഉണ്ണികൃഷ്ണനും പൂജയ്ക്കുമൊപ്പം മുൻന സൈമൺ, സുധീഷ്, ലാലി പി.എം., സോഹൻ സീനുലാൽ, കൈലാഷ്, ഡയാന ഹമീദ്, നവാസ് വള്ളിക്കുന്ന്, അനീഷ് രവി, അൻസിൽ റഹ്മാൻ, ഷനൂപ്, പ്രണവ് മോഹൻ, ശ്രുതി വൈശാഖ്, നൈറ നിഹാർ, അനശ്വര, നിധിഷാ കരുണൻ തുടങ്ങിയ നീണ്ട താരനിര തന്നെ അണിനിരക്കുന്നുണ്ട്. അഭിനേതാവായ ഷനൂപാണ് ചിത്രത്തിന്റെ പ്രൊഡക്ഷൻ കൺട്രോളർ.