​തൊഴിലുറപ്പിൽ വൻ മാറ്റം: സ്വകാര്യ ഭൂമിയിലെ കൃഷി ജോലികൾക്ക് വിലക്ക് വിബിജി റാം ജി പദ്ധതി നാളെ മുതൽ

വിബിജി റാം ജി പദ്ധതി നാളെ മുതൽ; സ്വകാര്യ ഭൂമിയിലെ കൃഷി ജോലികൾക്ക് വിലക്ക്, ജലസംരക്ഷണത്തിന് മുൻഗണന

​തിരുവനന്തപുരം: രാജ്യത്ത് നാളെ മുതൽ ആരംഭിക്കുന്ന പുതിയ ‘വിബിജി റാം ജി’ പദ്ധതിയിൽ വലിയ മാറ്റങ്ങൾ. ഇനി മുതൽ സ്വകാര്യ വ്യക്തികളുടെ ഉടമസ്ഥതയിലുള്ള കൃഷിഭൂമിയിലെ ഭൂവികസന ജോലികൾക്ക് അനുമതിയുണ്ടാകില്ല. അതേസമയം, പ്രധാനമന്ത്രി ആവാസ് യോജന (PMAY) പദ്ധതിക്കു കീഴിൽ സ്വകാര്യ വ്യക്തികൾക്ക് വീട് നിർമിക്കുന്നത് പോലുള്ള പ്രവൃത്തികൾക്ക് അനുമതി തുടരും.

​മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് കീഴിൽ കേരളത്തിൽ നിലനിന്നിരുന്ന പ്രധാന ആനുകൂല്യത്തിനാണ് ഇതോടെ മാറ്റം വരുന്നത്. മുൻപ് ഭൂനികുതി രസീത് സമർപ്പിച്ച് അപേക്ഷിച്ചാൽ സ്വകാര്യ വ്യക്തികളുടെ കൃഷിഭൂമിയിൽ നിലമൊരുക്കൽ, കാടുവെട്ടിത്തെളിക്കൽ തുടങ്ങിയ പ്രവൃത്തികൾ ചെയ്യാമായിരുന്നു. എന്നാൽ പുതിയ പദ്ധതി വരുന്നതോടെ സ്വകാര്യ ഭൂമിയിൽ ജലസംരക്ഷണ പ്രവർത്തനങ്ങൾ മാത്രമേ അനുവദിക്കൂ.

​318 പ്രവൃത്തികളുടെ കരട് പട്ടിക പുറത്ത്

​പുതിയ പദ്ധതി പ്രകാരം നടപ്പാക്കാവുന്ന 318 പ്രവൃത്തികളുടെ ഒരു കരട് പട്ടിക കേന്ദ്ര സർക്കാർ സംസ്ഥാനങ്ങൾക്ക് കൈമാറിയിട്ടുണ്ട്. പ്രധാനമായും നാല് വിഭാഗങ്ങളായാണ് പ്രവൃത്തികളെ തരംതിരിച്ചിരിക്കുന്നത്:

​ജലസുരക്ഷ: കനാലുകൾ, ഓവുചാലുകൾ, ചെറിയ തടയണകൾ, നീർത്തടങ്ങൾ, മഴക്കുഴികൾ എന്നിവയുടെ നിർമാണം, കുഴൽക്കിണർ പുനരുദ്ധാരണം, കിണർ കുഴിക്കൽ, ജലസ്രോതസ്സുകളുടെ സംരക്ഷണം.

​ഗ്രാമീണ അടിസ്ഥാനസൗകര്യം: അങ്കണവാടികൾ, ഗ്രാമീണ ആരോഗ്യകേന്ദ്രങ്ങൾ, വിശ്രമ പന്തലുകൾ, സർക്കാർ സ്കൂളുകൾക്ക് ചുറ്റുമതിലോ ശുചിമുറികളോ നിർമിക്കലും അതിന്റെ അറ്റകുറ്റപ്പണികളും. ടാർ, ഇന്റർലോക്ക്, മണ്ണ് എന്നിവ ഉപയോഗിച്ചുള്ള റോഡ് നിർമാണം, ശ്മശാന നിർമാണം.

​ജീവനോപാധി അടിസ്ഥാനസൗകര്യം: മാലിന്യസംസ്കരണത്തിലൂടെ വരുമാനമുണ്ടാക്കുന്ന കമ്പോസ്റ്റ് കുഴികൾ, വേർതിരിക്കുന്ന ഷെഡുകൾ, ജൈവവള ശേഖരണ സംവിധാനങ്ങൾ. കാർഷിക മേഖലയിൽ കാലികൾക്കുള്ള വെള്ളത്തൊട്ടി, മലഞ്ചെരിവുകളിലെ കൃഷിക്കായുള്ള നീളത്തിലുള്ള കുഴിയെടുപ്പ്, കാർഷിക-ഗ്രാമീണ ഉൽപന്ന വിപണന കേന്ദ്രങ്ങൾ, പ്ലാന്റേഷൻ, മത്സ്യവളർത്തൽ മേഖലകളിലെ ചെറുകിട നിർമാണങ്ങളും നടീൽ പ്രവൃത്തികളും.

​ദുരന്തനിവാരണം: മണ്ണിടിച്ചിൽ തടയാനുള്ള ഭിത്തി കെട്ടൽ, വനവൽക്കരണം, കാട്ടുതീ തടയൽ പ്രവർത്തനങ്ങൾ.

​കേരളത്തിന് വെല്ലുവിളിയായി 'കായിക അധ്വാനം'; കൂലി കേന്ദ്രം തീരുമാനിക്കും

​പുതിയ പദ്ധതിയിൽ ഉൾപ്പെടുത്തിയിരിക്കുന്ന പ്രവൃത്തികളിൽ ഭൂരിഭാഗവും കഠിനമായ കായിക അധ്വാനം ആവശ്യമുള്ളവയാണ്. കേരളത്തിൽ ആകെ രജിസ്റ്റർ ചെയ്തിട്ടുള്ള 22 ലക്ഷം തൊഴിലുറപ്പ് തൊഴിലാളികളിൽ 40 ശതമാനത്തോളം പേരും 60 വയസ്സിന് മുകളിലുള്ളവരാണ്. അതിനാൽ തന്നെ കഠിനമായ ഈ ജോലികൾ പ്രായമായ തൊഴിലാളികൾക്ക് വലിയ പ്രയാസം സൃഷ്ടിക്കുമെന്നാണ് വിലയിരുത്തൽ.

​പുതിയ വിബിജി റാം ജി പദ്ധതിയിലെ തൊഴിലാളികളുടെ കൂലി ഇനി മുതൽ കേന്ദ്ര സർക്കാരാകും നേരിട്ട് തീരുമാനിക്കുക