മലങ്കര ഡാം ഷട്ടറുകളിൽ അടിയന്തര അറ്റകുറ്റപ്പണി മൂവാറ്റുപുഴ, തൊടുപുഴ നദീതീരങ്ങളിൽ അതീവ ജാഗ്രത
കാലവർഷ മുന്നൊരുക്കങ്ങളുടെ ഭാഗമായി മലങ്കര ഡാമിലെ ഷട്ടറുകളുടെ അടിയന്തര അറ്റകുറ്റപ്പണി ഇന്ന് (മേയ് 26) മുതൽ ആരംഭിക്കും. മൂന്നാഴ്ചത്തേക്ക് ഡാമിലെ ജലനിരപ്പ് 36.90 മീറ്ററിലേക്ക് താഴ്ത്തുന്നതിനാൽ മൂവാറ്റുപുഴ, തൊടുപുഴ നദീതീരങ്ങളിലുള്ളവർ ജാഗ്രത പാലിക്കണമെന്ന് അധികൃതർ അറിയിച്ചു.
അനില എം കൃഷ്ണൻ 
തൊടുപുഴ: കാലവർഷം എത്തുന്നതിന് മുന്നോടിയായി മലങ്കര ഡാമിലെ ഷട്ടറുകളിൽ അടിയന്തര അറ്റകുറ്റപ്പണികൾ ആരംഭിക്കുന്നു. ഇന്ന് (മേയ് 26) മുതൽ മൂന്നാഴ്ചക്കാലമാണ് അറ്റകുറ്റപ്പണികൾ നടക്കുക. ഇതിന്റെ ഭാഗമായി ഡാമിലെ ജലനിരപ്പ് നിലവിലെ അളവിൽ നിന്നും 36.90 മീറ്ററിലേക്ക് താഴ്ത്താൻ തീരുമാനിച്ചതായി അധികൃതർ അറിയിച്ചു.
ഡാമിലെ വെള്ളം നിയന്ത്രിത അളവിൽ പുറത്തേക്ക് ഒഴുക്കിവിട്ടാണ് ജലനിരപ്പ് താഴ്ത്തുന്നത്. ഇതുമൂലം തൊടുപുഴയാറിലെയും മൂവാറ്റുപുഴയാറിലെയും ജലനിരപ്പ് ഉയരാൻ സാധ്യതയുണ്ട്. അതിനാൽ ഈ നദികളുടെ ഇരുപതിരുകളിലും താമസിക്കുന്നവരും നദിയുമായി ബന്ധപ്പെട്ട് മറ്റ് ജോലികളിൽ ഏർപ്പെടുന്നവരും കടുത്ത ജാഗ്രത പുലർത്തണമെന്ന് മുവാറ്റുപുഴ വാലി ഇറിഗേഷൻ പ്രോജക്റ്റ് (MVIP) എക്സിക്യൂട്ടീവ് എഞ്ചിനീയർ അറിയിച്ചു.
കുടിവെള്ള വിതരണത്തിന് ബദൽ സംവിധാനം
മലങ്കര ഡാമിലെ ജലനിരപ്പ് താഴുന്നത് സമീപ പ്രദേശങ്ങളിലെ കുടിവെള്ള വിതരണത്തെ ബാധിക്കാൻ സാധ്യതയുണ്ട്. ഡാമിനെ ആശ്രയിച്ച് പ്രവർത്തിക്കുന്ന അറക്കുളം, വെള്ളിയാമറ്റം, കുടയത്തൂർ, ആലക്കോട് തുടങ്ങിയ പഞ്ചായത്തുകളിലെ ശുദ്ധജല വിതരണം തടസ്സപ്പെടാതിരിക്കാൻ കേരള വാട്ടർ അതോറിറ്റിയും ബന്ധപ്പെട്ട തദ്ദേശ സ്വയംഭരണ സ്ഥാപനങ്ങളും അടിയന്തരമായി ബദൽ സംവിധാനങ്ങൾ ഏർപ്പെടുത്തണം. പൊതുജനങ്ങൾക്ക് ബുദ്ധിമുട്ടുണ്ടാകാത്ത രീതിയിൽ ആവശ്യമായ മുൻകരുതലുകൾ സ്വീകരിക്കാനും നിർദ്ദേശമുണ്ട്.
മൂന്നാഴ്ചത്തെ അറ്റകുറ്റപ്പണികൾ പൂർത്തിയാകുന്ന മുറയ്ക്ക് ഡാമിലെ ജലനിരപ്പ് ഘട്ടംഘട്ടമായി പൂർവ്വസ്ഥിതിയിലേക്ക് ഉയർത്തുമെന്നും ഇറിഗേഷൻ വകുപ്പ് വ്യക്തമാക്കി.
