സാമ്പത്തിക തർക്കം ചെറുതോണിയിൽ യുവാവിന് കുത്തേറ്റു പെൺസുഹൃത്ത് ഉൾപ്പെടെ നാലുപേർ പിടിയിൽ
ഇടുക്കി ചെറുതോണിയിൽ ബൈക്ക് വാങ്ങാൻ നൽകിയ പണത്തെച്ചൊല്ലിയുണ്ടായ തർക്കത്തിനൊടുവിൽ യുവാവിന് കുത്തേറ്റു. പെൺസുഹൃത്ത് ഉൾപ്പെടെ നാല് പേരെ പോലീസ് അറസ്റ്റ് ചെയ്തു.
അനില എം കൃഷ്ണൻ 
സാമ്പത്തിക തർക്കം: ചെറുതോണിയിൽ യുവാവിന് കുത്തേറ്റു; പെൺസുഹൃത്ത് ഉൾപ്പെടെ നാലുപേർ പിടിയിൽ
ചെറുതോണി: ബൈക്ക് വാങ്ങാൻ നൽകിയ പണത്തെച്ചൊല്ലിയുണ്ടായ തർക്കത്തെ തുടർന്ന് ചെറുതോണിയിൽ യുവാവിന് കുത്തേറ്റു. ഭൂമിയാംകുളം സ്വദേശി കണിയാംകുന്നേൽ ജിൻസിനാണ് (21) പരിക്കേറ്റത്. സംഭവവുമായി ബന്ധപ്പെട്ട് ജിൻസിന്റെ മുൻ പെൺസുഹൃത്ത് ഉൾപ്പെടെ നാലംഗ സംഘത്തെ ഇടുക്കി പോലീസ് അറസ്റ്റ് ചെയ്തു.
ആലപ്പുഴ സ്വദേശി അതുകുമാർ (24), മാവേലിക്കര സ്വദേശി വി.ജെ. അഭിജിത് (25), തലശ്ശേരി സ്വദേശി യദുകൃഷ്ണൻ (24), പാലക്കാട് സ്വദേശി സി.എം. അനു (22) എന്നിവരാണ് പിടിയിലായത്. കഴിഞ്ഞ ദിവസം പുലർച്ചെ അഞ്ചരയോടെ ചെറുതോണി പുതിയ പാലത്തിന് സമീപമുള്ള ഗാന്ധി നഗർ ജംക്ഷനിലായിരുന്നു സംഭവം.
തർക്കത്തിന് കാരണം ബൈക്ക് ഇടപാട്
ജിൻസും പിടിയിലായ പെൺസുഹൃത്തും എറണാകുളത്ത് ഒരുമിച്ച് ജോലി ചെയ്യുന്നവരാണ്. ഇവർക്ക് സഞ്ചരിക്കാനായി ബൈക്ക് വാങ്ങാൻ 50,000 രൂപ നൽകിയത് പെൺകുട്ടിയായിരുന്നു. എന്നാൽ പിന്നീട് ജിൻസ് ഈ ബന്ധത്തിൽ നിന്ന് അകലുകയും മറ്റൊരു പെൺകുട്ടിയുമായി സൗഹൃദത്തിലാവുകയും ചെയ്തു. ഇതോടെ താൻ നൽകിയ പണം അല്ലെങ്കിൽ ബൈക്ക് തിരികെ നൽകണമെന്ന് പെൺകുട്ടി ആവശ്യപ്പെട്ടെങ്കിലും ജിൻസ് തയ്യാറായില്ല.
ഇക്കാര്യം സംസാരിക്കാനായി കാറിലെത്തിയ പെൺകുട്ടിയും സുഹൃത്തുക്കളും ചെറുതോണിയിൽ വെച്ച് ജിൻസിനെ കാണുകയും തർക്കമുണ്ടാവുകയുമായിരുന്നു. വാക്കേറ്റം രൂക്ഷമായതോടെ സംഘത്തിലുണ്ടായിരുന്നവർ ജിൻസിനെ കുത്തി പരിക്കേൽപ്പിച്ചു. ആക്രമണത്തിന് ശേഷം കാറിൽ കടന്നുകളഞ്ഞ സംഘത്തെ എറണാകുളത്ത് നിന്നാണ് പോലീസ് കസ്റ്റഡിയിലെടുത്തത്. പരിക്കേറ്റ ജിൻസ് ഇടുക്കി മെഡിക്കൽ കോളേജിൽ ചികിത്സ തേടി. പരിക്ക് ഗുരുതരമല്ല.
