കാളയ്ക്കും കടുവയ്ക്കും നടുവിൽ ആ യോദ്ധാവ് ആര്? തരംഗമായി ദി വാൻ ഫസ്റ്റ് ലുക്ക്
സിദ്ധാർത്ഥ് മൽഹോത്രയും തമന്ന ഭാട്ടിയയും ഒന്നിക്കുന്ന ബ്രഹ്മാണ്ഡ ബോളിവുഡ് ചിത്രം ദി വാൻ 2026 സെപ്റ്റംബർ 25 ന് തീയേറ്ററുകളിലെത്തും. ചിത്രത്തിന്റെ പുതിയ പോസ്റ്ററും പുറത്തുവിട്ടു.
Sabari 
സിദ്ധാർത്ഥ് മൽഹോത്ര- തമന്ന ഭാട്ടിയ ചിത്രം 'ദി വാൻ'; ആഗോള റിലീസ് 2026 സെപ്റ്റംബർ 25 ന്
മുംബൈ: സിദ്ധാർത്ഥ് മൽഹോത്രയും തമന്ന ഭാട്ടിയയും പ്രധാന വേഷങ്ങളിൽ എത്തുന്ന ബ്രഹ്മാണ്ഡ ബോളിവുഡ് ഫോക്ലോർ എന്റർടെയ്നർ 'ദി വാൻ - ഫോഴ്സ് ഓഫ് ദി ഫോറെസ്റ്റ്' സിനിമയുടെ ആഗോള റിലീസ് തീയതി പ്രഖ്യാപിച്ചു. ചിത്രം 2026 സെപ്റ്റംബർ 25 ന് ലോകമെമ്പാടുമുള്ള തീയേറ്ററുകളിൽ പ്രദർശനത്തിനെത്തും. റിലീസ് തീയതി പ്രഖ്യാപനത്തോടൊപ്പം സിനിമയുടെ വിസ്മയ ലോകം വെളിപ്പെടുത്തുന്ന ആകർഷകമായ ഒരു പുതിയ പോസ്റ്ററും അണിയറ പ്രവർത്തകർ പുറത്തുവിട്ടിട്ടുണ്ട്.
'പഞ്ചായത്ത്' വെബ് സീരീസിലൂടെ ശ്രദ്ധേയനായ ദീപക് കുമാർ മിശ്ര സംവിധാനം ചെയ്യുന്ന ചിത്രം ബാലാജി മോഷൻ പിക്ചേഴ്സും ടിവിഎഫ് (TVF) മോഷൻ പിക്ചേഴ്സും ചേർന്നാണ് നിർമ്മിക്കുന്നത്. ടിവിഎഫുമായി സഹകരിച്ച് ബാലാജി ടെലിഫിലിംസ് ലിമിറ്റഡിന്റെ ഡിവിഷനായ ബാലാജി മോഷൻ പിക്ചേഴ്സും 11.11 പ്രൊഡക്ഷനും ചേർന്നാണ് ചിത്രം അവതരിപ്പിക്കുന്നത്. അരുണാഭ് കുമാർ ആണ് ചിത്രത്തിന്റെ കഥയൊരുക്കിയിരിക്കുന്നത്.
ശ്രദ്ധേയമായി ഫസ്റ്റ് ലുക്ക് പോസ്റ്റർ
നാടകീയത നിറഞ്ഞ രീതിയിൽ, ചുറ്റുമുള്ള കാളയ്ക്കും കടുവയ്ക്കും ഇടയിൽ നിൽക്കുന്ന ശക്തനായ ഒരു യോദ്ധാവിനെപ്പോലെയാണ് പോസ്റ്ററിൽ നായകനെ അവതരിപ്പിച്ചിരിക്കുന്നത്. പൂർണ്ണമായും ഇന്ത്യൻ നാടോടിക്കഥകളെ അടിസ്ഥാനമാക്കിയാണ് ചിത്രം ഒരുക്കിയിരിക്കുന്നതെന്ന സൂചന പോസ്റ്റർ നൽകുന്നുണ്ട്.
ഇന്ത്യൻ ഫോക്ലോർ കഥകളെ വലിയ സ്ക്രീനിലേക്ക് എത്തിക്കാനുള്ള ഏറ്റവും വലിയ സിനിമാശ്രമങ്ങളിൽ ഒന്നാണ് 'ദി വാൻ'. ഫാന്റസി, ആക്ഷൻ, കോമഡി, സാഹസികത എന്നിവ സമന്വയിപ്പിക്കുന്ന ഈ ചിത്രം, അത്യാധുനിക വിഷ്വൽ ഇഫക്റ്റുകളുടെ (VFX) പിന്തുണയോടെ വേറിട്ടൊരു ദൃശ്യവിരുന്നാണ് പ്രേക്ഷകർക്ക് വാഗ്ദാനം ചെയ്യുന്നത്.
അഡാപ്റ്റേഷനുകളും റീമേക്കുകളും ആധിപത്യം പുലർത്തുന്ന നിലവിലെ സിനിമാ കാലഘട്ടത്തിൽ, തികച്ചും യഥാർത്ഥവും പുതുമയുള്ളതുമായ ഒരു കഥാലോകമാണ് 'ദി വാൻ' സൃഷ്ടിക്കുന്നത്. വെറുമൊരു കഥ എന്നതിനപ്പുറം, സ്വന്തമായ കഥാപാത്രങ്ങളും ചിഹ്നങ്ങളും ഐതിഹ്യങ്ങളും നിറഞ്ഞ വിപുലമായ ഒരു നാടോടിക്കഥാ പ്രപഞ്ചത്തിന് ചിത്രം അടിത്തറയിടുന്നു. ഇതിന്റെ ഭാഗമായി 'ദി ലെജൻഡ് ഓഫ് വാൻ' എന്ന കോമിക് ബുക്ക് മുൻപ് നിർമ്മാതാക്കൾ പുറത്തുവിട്ടിരുന്നു.
ശോഭ കപൂർ, ഏക്താ ആർ കപൂർ, അരുണാഭ് കുമാർ, നീരജ് കോത്താരി എന്നിവർ ചേർന്ന് നിർമ്മിക്കുന്ന ചിത്രത്തിന്റെ ഛായാഗ്രഹണവും വിഷ്വൽ ഡിറക്ഷനും നിർവഹിക്കുന്നത് മനു ആനന്ദ് ആണ്.
