മറവിയിലാണ്ട രാജപാത മലയോരത്തിന്റേത് അതിജീവന പോരാട്ടം നൂറ്റാണ്ടിന്റെ അവഗണനയ്‌ക്കെതിരെ കോതമംഗലത്ത് ജനകീയ ധർണ

കോതമംഗലം: ചരിത്രത്തിന്റെ ഏടുകളിൽ മറഞ്ഞുപോയ 'കരിന്തിരി പാത'യുടെ പുനർജനിക്കായി മലയോര ജനതയുടെ അതിജീവന പോരാട്ടം ശക്തമാകുന്നു. ബി.സി 300-കളിൽ മുസിരിസിനെയും മധുരയെയും ബന്ധിപ്പിച്ചിരുന്നതും പിൽക്കാലത്ത് ബ്രിട്ടീഷുകാർ വികസിപ്പിച്ചതുമായ പഴയ ആലുവ - മൂന്നാർ രാജപാത തുറക്കണമെന്നാവശ്യപ്പെട്ട് ജനകീയ പ്രക്ഷോഭം ആളിപ്പടരുകയാണ്. കോതമംഗലം നഗരസഭയുടെയും കീരംപാറ, കുട്ടമ്പുഴ, മാങ്കുളം പഞ്ചായത്തുകളുടെയും റോഡ് ആക്‌ഷൻ കൗൺസിലിന്റെയും സംയുക്താഭിമുഖ്യത്തിൽ കോതമംഗലം പി.ഡബ്ല്യു.ഡി (റോഡ് വിഭാഗം) സബ് ഡിവിഷൻ ഓഫിസിനു മുൻപിൽ ബഹുജന ധർണ സംഘടിപ്പിച്ചു. കോതമംഗലം രൂപത ബിഷപ്പ് മാർ ജോർജ് മഠത്തിക്കണ്ടത്തിൽ ധർണ ഉദ്ഘാടനം ചെയ്തു.

​രാജാക്കന്മാരുടെ കാലത്ത് ജനങ്ങൾക്കായി തുറന്നുകൊടുത്ത പാത വനം വകുപ്പ് തടസ്സപ്പെടുത്തുന്നത് അന്യായമാണെന്ന് ബിഷപ്പ് പറഞ്ഞു. നൂറുകണക്കിന് ആളുകൾ പങ്കെടുത്ത റാലി കെ.എസ്.ആർ.ടി.സി ജങ്ഷനിൽ നിന്നാരംഭിച്ച് പി.ഡബ്ല്യു.ഡി ഓഫീസിന് മുന്നിൽ സമാപിച്ചു.

​പ്രളയത്തിൽ മുങ്ങിയ ചരിത്രം

​1891-ൽ പൂർണ്ണരൂപത്തിലായ ഈ പാത 1924-ലെ (കൊല്ലവർഷം 1099) മഹാപ്രളയത്തിൽ കരിന്തിരി മലയിലുണ്ടായ ഉരുൾപൊട്ടലിലാണ് നാമാവശേഷമായത്. മൂന്നാറിൽ നിന്ന് കരിന്തിരി, പെരുമ്പൻകുത്ത്, പൂയംകുട്ടി വഴി ആലുവയിലെത്തിയിരുന്ന ഈ പാത തകർന്നതോടെ 1931-ൽ റാണി സേതു ലക്ഷ്മി ഭായിയുടെ ഭരണകാലത്ത് കോതമംഗലം - അടിമാലി വഴി ഇന്നത്തെ പുതിയ റോഡ് നിർമിച്ചു. ഇതോടെ പഴയ രാജപാത വനംവകുപ്പിന്റെ നിയന്ത്രണത്തിലാവുകയും വന്യതയ്ക്ക് വഴിമാറുകയും ചെയ്തു.

​യാത്രാദുരിതത്തിന്റെ കയ്പുനീർ

​പൂയംകുട്ടി മുതൽ മൂന്നാർ വരെയുള്ള ഈ പാത തുറന്നുകിട്ടിയാൽ നിലവിലെ കൊച്ചി - മൂന്നാർ ദൂരത്തിൽ 30 കിലോമീറ്ററോളം കുറവുണ്ടാകും. ദൂരക്കുറവിനേക്കാൾ ഉപരി മാങ്കുളം, ആനക്കുളം തുടങ്ങിയ ഗ്രാമങ്ങളിലെയും വാരിയം പോലുള്ള ഗോത്രവർഗ്ഗ ഊരുകളിലെയും ആയിരക്കണക്കിന് മനുഷ്യർക്ക് ഇതൊരു ജീവനാഡിയാണ്. മതിയായ റോഡ് സൗകര്യമില്ലാതെ രോഗികൾ വഴിമധ്യേ മരണപ്പെടുന്നതും കുട്ടികൾക്ക് സ്കൂളിലെത്താൻ കിലോമീറ്ററുകളോളം കാൽനടയായി സഞ്ചരിക്കേണ്ടി വരുന്നതും ആധുനിക കേരളത്തിന് അപമാനമാണെന്ന് ആക്ഷൻ കൗൺസിൽ ചൂണ്ടിക്കാട്ടി. കൂടാതെ, മികച്ച ഏലവും കുരുമുളകും ഉൽപ്പാദിപ്പിക്കുന്ന ഈ മേഖലയിലെ കർഷകർ റോഡ് സൗകര്യമില്ലാത്തതിനാൽ ഇടനിലക്കാരുടെ ചൂഷണത്തിനും കടക്കെണിക്കും ഇരയാവുകയാണ്.

​വനം വകുപ്പിന്റെ തടസ്സവാദങ്ങൾ

​കോതമംഗലത്ത് നിന്ന് കുട്ടമ്പുഴ വഴി മൂന്നാറിലേക്ക് 72 കിലോമീറ്ററാണ് ദൂരം. ഇതിൽ പൂയംകുട്ടി വരെയുള്ള 28.5 കിലോമീറ്റർ പൊതുമരാമത്ത് വകുപ്പ് ഏറ്റെടുത്ത് നിർമാണം പൂർത്തിയാക്കി. എന്നാൽ പൂയംകുട്ടി മുതൽ പെരുമ്പൻകുത്ത് വരെയുള്ള ബാക്കി 26 കിലോമീറ്റർ ഭാഗം വനം വകുപ്പിന്റേതാണെന്ന വാദവുമായി അധികൃതർ രംഗത്തെത്തിയതോടെ നിർമാണം തടസ്സപ്പെട്ടു.

​ആനത്താരകൾ മുറിയുമെന്ന വനംവകുപ്പിന്റെ തടസ്സവാദങ്ങൾക്ക് പരിഹാരമായി ആധുനിക 'എക്കോ-ബ്രിഡ്ജുകൾ' (Eco-bridges) നിർമ്മിച്ചുകൊണ്ട് പരിസ്ഥിതി സൗഹൃദമായ രീതിയിൽ റോഡ് വികസിപ്പിക്കാമെന്ന് വിദഗ്ധർ പറയുന്നു. പാതയുടെ അതിർത്തി നിർണ്ണയിക്കാൻ ഹൈക്കോടതി ഉത്തരവിട്ടതും 2025 സെപ്റ്റംബറിൽ സർക്കാർ നിയോഗിച്ച ഉന്നതതല സമിതിയുടെ സർവ്വേ നടപടികളും നിലവിൽ പോരാട്ടത്തിന് പ്രതീക്ഷ നൽകുന്നുണ്ട്. ഇടുക്കി എം.പി ഡീൻ കുര്യാക്കോസും കോതമംഗലം എം.എൽ.എ ആന്റണി ജോണും ഉൾപ്പെടെയുള്ള ജനപ്രതിനിധികൾ ഈ ആവശ്യത്തിന് പൂർണ്ണ പിന്തുണയുമായി രംഗത്തുണ്ട്.