ദ പാരഡൈസ് വില്ലനായി ബോളിവുഡ് താരം രാഘവ് ജൂയാൽ വിക്രം മാലിക്കിന്റെ ക്യാരക്ടർ ഗ്ലിമ്പ്സ് പുറത്ത്

​'ദ പാരഡൈസ്' വില്ലനായി രാഘവ് ജൂയാൽ; വിക്രം മാലിക്കിന്റെ മാസ് ഗ്ലിമ്പ്സ് പുറത്തുവിട്ട് അണിയറപ്രവർത്തകർ

​കൊച്ചി: തെലുങ്ക് സൂപ്പർ താരം നാനിയെ നായകനാക്കി ശ്രീകാന്ത് ഒഡേല സംവിധാനം ചെയ്യുന്ന പാൻ ഇന്ത്യൻ ചിത്രം 'ദ പാരഡൈസ്' ലെ വില്ലൻ കഥാപാത്രത്തിന്റെ ക്യാരക്ടർ ഗ്ലിമ്പ്സ് വീഡിയോ പുറത്തുവിട്ടു. ബോളിവുഡ് താരം രാഘവ് ജൂയാലാണ് ചിത്രത്തിൽ ക്രൂരനായ വില്ലനായെത്തുന്നത്. 'വിക്രം മാലിക്' എന്നാണ് രാഘവ് അവതരിപ്പിക്കുന്ന നെഗറ്റീവ് കഥാപാത്രത്തിന്റെ പേര്. 'കിൽ' എന്ന ബ്ലോക്ക്ബസ്റ്റർ ബോളിവുഡ് ചിത്രത്തിലെ വില്ലൻ വേഷത്തിലൂടെ അന്താരാഷ്ട്ര തലത്തിൽ വരെ ശ്രദ്ധ നേടിയ താരമാണ് രാഘവ് ജൂയാൽ. 2026 ഓഗസ്റ്റ് 21 ന് ചിത്രം ലോകമെമ്പാടുമുള്ള തിയേറ്ററുകളിൽ റിലീസിനെത്തും.

​അതീവ സ്റ്റൈലിഷ് ലുക്കിലാണ് രാഘവ് ജൂയലിനെ ഗ്ലിമ്പ്സ് വീഡിയോയിൽ അവതരിപ്പിച്ചിരിക്കുന്നത്. കഴുത്തിൽ ഒട്ടേറെ സ്വർണ്ണാഭരണങ്ങൾ അണിഞ്ഞ ലുക്കിൽ, നായകനായ നാനിയുടെ 'ജഡാൽ' എന്ന കഥാപാത്രത്തെ തേടിയെത്തുന്ന വിക്രം മാലിക്കിന്റെ മാസ് എൻട്രിയാണ് വീഡിയോയുടെ പ്രധാന ആകർഷണം. 'ദസറ' എന്ന ബ്ലോക്ക്ബസ്റ്റർ ചിത്രത്തിന് ശേഷം നാനി- ശ്രീകാന്ത് ഒഡേല കൂട്ടുകെട്ട് വീണ്ടും ഒന്നിക്കുന്ന ഈ ചിത്രം നിർമ്മിക്കുന്നത് സുധാകർ ചെറുകുറിയാണ്. ശ്രീ ലക്ഷ്മി വെങ്കടേശ്വര സിനിമാസിന്റെ (SLV Cinemas) ബാനറിലാണ് ചിത്രം ഒരുങ്ങുന്നത്.

​യൂട്യൂബിൽ തരംഗമായി 'ആയാ ഷേർ'

​ചിത്രത്തിലേതായി നേരത്തെ പുറത്തുവന്ന ആദ്യ ഗാനമായ "ആയാ ഷേർ" ഇതിനോടകം തന്നെ ആഗോള തലത്തിൽ തരംഗമായി മാറിയിട്ടുണ്ട്. യൂട്യൂബിൽ 175 മില്യണിലധികം കാഴ്ചക്കാരെയും 1.7 മില്യൺ ലൈക്കുകളും നേടി ഈ ഗാനം ഇപ്പോഴും ട്രെൻഡിംഗിൽ തുടരുകയാണ്. ഗാനത്തിൽ നാനി കാഴ്ചവച്ച ഐക്കണിക് ഹുക്ക് സ്റ്റെപ്പും സോഷ്യൽ മീഡിയയിൽ വൈറലായിരുന്നു. ചിത്രത്തിലെ നാനിയുടെ ഇൻട്രൊഡക്ഷൻ ഗാനമായ ഇതിന് സംഗീതം നൽകിയിരിക്കുന്നത് പ്രശസ്ത സംഗീത സംവിധായകൻ അനിരുദ്ധ് രവിചന്ദറാണ്. ജേഴ്സി, ഗാങ് ലീഡർ എന്നീ ചിത്രങ്ങൾക്ക് ശേഷം നാനിയും അനിരുദ്ധും ഒന്നിക്കുന്ന ചിത്രം കൂടിയാണ് 'ദ പാരഡൈസ്'.

​എട്ട് ഭാഷകളിൽ വമ്പൻ റിലീസ്

​നാനിയുടെ കരിയറിലെ തന്നെ ഏറ്റവും വലിയ റിലീസായാണ് 'ദ പാരഡൈസ്' ഒരുങ്ങുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്ററുകളും, 'സ്പാർക്ക് ഓഫ് പാരഡൈസ്' എന്ന ഗ്ലിമ്പ്സ് വീഡിയോയും സോഷ്യൽ മീഡിയയിൽ വലിയ തരംഗം സൃഷ്ടിച്ചിരുന്നു. വലിയ താരനിര അണിനിരക്കുന്ന ചിത്രത്തിൽ രാഘവ് ജൂയാലിന് പുറമെ സമ്പൂർണേഷ് ബാബു, മോഹൻ ബാബു, സോണാലി കുൽക്കർണി, ഈശ്വരി റാവു, രാജ രവീന്ദ്ര, തനികേല ഭരണി, എം.എസ്. ചൗധരി, രാം ജഗൻ എന്നിവരും പ്രധാന വേഷങ്ങളിൽ എത്തുന്നു.

​ആഗോള തലത്തിൽ തെലുങ്ക്, കന്നഡ, മലയാളം, തമിഴ്, ഹിന്ദി, ബംഗാളി, ഇംഗ്ലീഷ്, സ്പാനിഷ് ഉൾപ്പെടെ എട്ട് ഭാഷകളിലാണ് ചിത്രം പ്രദർശനത്തിന് എത്തുക.

​അണിയറ പ്രവർത്തകർ:

​രചന, സംവിധാനം: ശ്രീകാന്ത് ഒഡേല

​നിർമ്മാതാവ്: സുധാകർ ചെറുകുറി

​ബാനർ: എസ്.എൽ.വി സിനിമാസ്

​ഛായാഗ്രഹണം: സി.എച്ച്. സായ്

​സംഗീതം: അനിരുദ്ധ് രവിചന്ദർ

​എഡിറ്റിംഗ്: നവീൻ നൂലി

​പ്രൊഡക്ഷൻ ഡിസൈൻ: അവിനാഷ് കൊല്ല

​ഓഡിയോ: സരിഗമ മ്യൂസിക്

​മാർക്കറ്റിംഗ്: ഫസ്റ്റ് ഷോ