ട്രെൻഡിങ്ങായി ഡർബി യിലെ ആദ്യ ഗാനം റങ്ക് തെളിന്ദവളല്ലേ പുറത്തിറങ്ങി ചിത്രം മാർച്ച് 27ന് തിയേറ്ററുകളിലേക്ക്
ക്യാമ്പസ് പശ്ചാത്തലത്തിൽ ഒരുങ്ങുന്ന ഡർബി എന്ന ചിത്രത്തിലെ ആവേശകരമായ ആദ്യ ഗാനം പുറത്തിറങ്ങി. ഗോപി സുന്ദർ ഈണം നൽകിയ റങ്ക് തെളിന്ദവളല്ലേ എന്ന ഗാനം മണിക്കൂറുകൾക്കുള്ളിൽ ദശലക്ഷക്കണക്കിന് കാഴ്ചക്കാരെ നേടി സോഷ്യൽ മീഡിയയിൽ തരംഗമാവുകയാണ്.
Pratheesh Sekhar 
കൊച്ചി: പെരുന്നാൾ ആഘോഷങ്ങൾക്ക് ആവേശം പകരാൻ യുവനിരയുടെ കരുത്തിൽ ഒരുങ്ങുന്ന 'ഡർബി'യിലെ ആദ്യ ഗാനം റിലീസായി. "റങ്ക് തെളിന്ദവളല്ലേ" എന്ന് തുടങ്ങുന്ന ഗാനമാണ് അണിയറ പ്രവർത്തകർ പുറത്തുവിട്ടത്. പ്രമുഖ സംഗീത സംവിധായകൻ ഗോപി സുന്ദർ ഈണം നൽകിയ ഗാനം ഇതിനോടകം തന്നെ യൂട്യൂബ് ട്രെൻഡിങ് ലിസ്റ്റിൽ ഇടംപിടിച്ചു കഴിഞ്ഞു. റിലീസ് ചെയ്ത് ഏഴ് മണിക്കൂറിനുള്ളിൽ പതിനാല് ലക്ഷത്തിലധികം പേരാണ് ഗാനം കണ്ടത്.
ബി.കെ. ഹരിനാരായണന്റെ വരികൾക്ക് ഗോപി സുന്ദർ, ആതിര ജനകൻ, ക്രിസ്റ്റ ജ്യോതി എന്നിവർ ചേർന്നാണ് ശബ്ദം നൽകിയിരിക്കുന്നത്. മികച്ച താളബദ്ധമായ ഈ ഗാനം പെരുന്നാൾ വിപണിയിൽ വലിയ ചലനം സൃഷ്ടിക്കുമെന്നാണ് പ്രതീക്ഷ.
യുവത്വത്തിന്റെ പ്രസരിപ്പും പ്രണയവും ആക്ഷനും ഇമോഷനും കോർത്തിണക്കിയ ഒരു കംപ്ലീറ്റ് കളർഫുൾ എൻ്റർടെയ്നറായാണ് ചിത്രം ഒരുക്കിയിരിക്കുന്നത്. ആദം സാബിക്ക്, സാഗർ സൂര്യ, അമീൻ തുടങ്ങിയ വലിയൊരു യുവതാരനിരയ്ക്കൊപ്പം ജോണി ആന്റണി, അബു സലിം, ശബരീഷ് വർമ്മ തുടങ്ങി പരിചയസമ്പന്നരായ താരങ്ങളും അണിനിരക്കുന്നുണ്ട്.
ഡിമാൻസ് ഫിലിം ഫാക്ടറിയുടെ ബാനറിൽ മൻസൂർ അബ്ദുൽ റസാഖ് നിർമ്മിക്കുന്ന ചിത്രം മാർച്ച് 27ന് തിയേറ്ററുകളിലെത്തും. അഭിനന്ദൻ രാമനുജം ഛായാഗ്രഹണവും ആർ. ജെറിൻ എഡിറ്റിംഗും നിർവ്വഹിക്കുന്നു. സ്ട്രൈറ്റ് ലൈൻ സിനിമാസാണ് ചിത്രം കേരളത്തിൽ വിതരണത്തിനെത്തിക്കുന്നത്.
