മലയാള ചിത്രം ഹാഫ് ടൊറന്റോ അന്താരാഷ്ട്ര ഫിലിം ഫെസ്റ്റിവലിലേക്ക്
ഫ്രാഗ്രൻറ് നേച്ചർ ഫിലിം ക്രിയേഷൻസ് ഒരുക്കിയ മലയാളം വാമ്പയർ ആക്ഷൻ ത്രില്ലർ ചിത്രം ഹാഫ് ടൊറന്റോ ഇന്റർനാഷണൽ ഫിലിം ഫെസ്റ്റിവലിലെ മിഡ്നൈറ്റ് മാഡ്നെസ്സ് വിഭാഗത്തിൽ പ്രദർശിപ്പിക്കും. എക്സൽ എന്റർടൈൻമെന്റും AA ഫിലിംസും ചേർന്നാണ് ചിത്രം ഹിന്ദിയിൽ അവതരിപ്പിക്കുന്നത്.
Sabari 
മലയാള ചിത്രം "ഹാഫ്" ടൊറന്റോ അന്താരാഷ്ട്ര ഫിലിം ഫെസ്റ്റിവലിലേക്ക്; ഉത്തരേന്ത്യയിൽ വിതരണം എക്സൽ എന്റർടൈൻമെന്റും AA ഫിലിംസും
കൊച്ചി: ഫ്രാഗ്രൻറ് നേച്ചർ ഫിലിം ക്രിയേഷൻസ് നിർമ്മിച്ച് സംജാദ് സംവിധാനം ചെയ്യുന്ന മലയാളം വാമ്പയർ ആക്ഷൻ ത്രില്ലർ ചിത്രം "ഹാഫ്" പ്രശസ്തമായ ടൊറന്റോ ഇന്റർനാഷണൽ ഫിലിം ഫെസ്റ്റിവലിൽ (TIFF) പ്രീമിയർ ചെയ്യും. സെപ്റ്റംബറിൽ നടക്കുന്ന ഫെസ്റ്റിവലിലെ പ്രശസ്തമായ 'മിഡ്നൈറ്റ് മാഡ്നെസ്സ്' (Midnight Madness) വിഭാഗത്തിലാണ് ചിത്രം പ്രദർശിപ്പിക്കുന്നത്. പ്രമുഖ ബോളിവുഡ് നിർമ്മാണ കമ്പനിയായ എക്സൽ എന്റർടൈൻമെന്റും AA ഫിലിംസും ചേർന്നാണ് ചിത്രം ഉത്തരേന്ത്യയിലുടനീളം ഹിന്ദിയിൽ അവതരിപ്പിക്കുകയും വിതരണം ചെയ്യുകയും ചെയ്യുന്നത്. മലയാള ചലച്ചിത്രമേഖലയുമായുള്ള എക്സൽ എന്റർടൈൻമെന്റിന്റെ ആദ്യ സഹകരണമാണിത്.
രണ്ട് ഹാഫ് ബ്ലഡ് വാമ്പയറുകളുടെ കഥ പറയുന്ന ചിത്രം റോഡ് ആക്ഷൻ, റിവെഞ്ച്, വാമ്പയർ സങ്കൽപ്പങ്ങൾ എന്നിവ കോർത്തിണക്കിയാണ് ഒരുക്കിയിരിക്കുന്നത്. രഞ്ജിത് സജീവ്, ഐശ്വര്യ രാജ്, അബ്ബാസ്, അമല പോൾ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ആൻ സജീവും സജീവ് P.K. യും ചേർന്ന് നിർമ്മിച്ച ഈ ചിത്രത്തിന്റെ രചന നിർവ്വഹിച്ചിരിക്കുന്നത് പ്രവീൺ വിശ്വനാഥ് ആണ്.
ചിത്രത്തിന്റെ സവിശേഷമായ പ്രമേയത്തെയും അവതരണത്തെയും എക്സൽ എന്റർടൈൻമെന്റ് സഹസ്ഥാപകരായ റിതേഷ് സിധ്വാനിയും ഫർഹാൻ അക്തറും വാനോളം പുകഴ്ത്തി. വ്യത്യസ്തത പുലർത്തുന്ന സിനിമകൾ എപ്പോഴും തന്നിൽ ആവേശമുണർത്താറുണ്ടെന്ന് റിതേഷ് സിധ്വാനി പറഞ്ഞു. "ഹാഫ് ആദ്യ കാഴ്ചയിൽ തന്നെ വേറിട്ടുനിൽക്കുന്നു. ഇതിന് സവിശേഷമായ സിനിമാറ്റിക് ശബ്ദവും ശക്തമായ സർഗ്ഗാത്മക കാഴ്ചപ്പാടുമുണ്ട്. ഈ ശ്രദ്ധേയമായ ചിത്രം വലിയ സ്ക്രീനിൽ പ്രേക്ഷകരിലേക്ക് എത്തിക്കുന്നതിൽ സന്തോഷമുണ്ട്," എന്ന് അദ്ദേഹം കൂട്ടിച്ചേർത്തു.
സംജാദിന്റെ അവതരണത്തിലെ വളരെ പച്ചയായതും വൈകാരികവുമായ ഘടകങ്ങളാണ് തന്റെ ശ്രദ്ധ ആകർഷിച്ചതെന്ന് ഫർഹാൻ അക്തർ പറഞ്ഞു. ചിത്രം പ്രേക്ഷകമനസ്സിൽ മായാതെ നിൽക്കുമെന്നും ഈ സിനിമയുടെ ഭാഗമാകാൻ സാധിച്ചതിൽ വലിയ ആവേശമുണ്ടെന്നും അദ്ദേഹം വ്യക്തമാക്കി.
രഞ്ജിത് സജീവ്, ദിലീഷ് പോത്തൻ എന്നിവർ അഭിനയിച്ച് 2024-ൽ പുറത്തിറങ്ങിയ 'ഗോളം' എന്ന ഇൻവെസ്റ്റിഗേഷൻ ത്രില്ലറിന് ശേഷം ഫ്രാഗ്രൻറ് നേച്ചർ ഫിലിം ക്രിയേഷൻസ്, സംവിധായകൻ സംജാദ്, തിരക്കഥാകൃത്ത് പ്രവീൺ വിശ്വനാഥ് എന്നിവർ വീണ്ടും ഒന്നിക്കുന്ന ചിത്രമാണ് 'ഹാഫ്'.
ഹോളിവുഡ് നിലവാരത്തിലുള്ള 'സീറോ സ്ലോ-മോഷൻ' ആക്ഷൻ
'ദി റെയ്ഡ് 2', 'ദി നൈറ്റ് കംസ് ഫോർ അസ്' തുടങ്ങിയ അന്താരാഷ്ട്ര ശ്രദ്ധനേടിയ ചിത്രങ്ങളിൽ പ്രവർത്തിച്ച പ്രശസ്ത ആക്ഷൻ കൊറിയോഗ്രാഫർ വെരി ട്രൈ യുലിസ്മാൻ ആണ് ഈ ചിത്രത്തിലെ ആക്ഷൻ രംഗങ്ങൾ ഒരുക്കിയിരിക്കുന്നത്. ഇതിനായി കേന്ദ്ര കഥാപാത്രങ്ങളായ രഞ്ജിത് സജീവിനും ഐശ്വര്യ രാജിനും മാസങ്ങളോളം പ്രത്യേക പരിശീലനം നൽകിയിരുന്നു. സ്റ്റണ്ടുകൾ അഭിനേതാക്കൾ സ്വയം തന്നെയാണ് നിർവ്വഹിച്ചിരിക്കുന്നത്. സാധാരണ ഇന്ത്യൻ സിനിമകളിൽ കാണുന്ന സ്ലോ-മോഷൻ രീതികൾ ഒഴിവാക്കി, വേഗതയേറിയ 'സീറോ സ്ലോ-മോഷൻ' ആക്ഷൻ സീക്വൻസുകളാണ് ചിത്രത്തിൽ ഉൾപ്പെടുത്തിയിരിക്കുന്നത്.
ദേശീയ അവാർഡ് ജേതാക്കളായ മഹേഷ് ഭുവനേന്ദ് (എഡിറ്റിംഗ്), മോഹൻദാസ് (പ്രൊഡക്ഷൻ ഡിസൈൻ), വിഷ്ണു ഗോവിന്ദ് (സൗണ്ട് ഡിസൈൻ) എന്നിവർക്കൊപ്പം പാപ്പിനു (ഛായാഗ്രഹണം), മിഥുൻ മുകുന്ദൻ (സംഗീതം) എന്നിവരും ചിത്രത്തിന്റെ സാങ്കേതിക വിഭാഗത്തിൽ പ്രവർത്തിക്കുന്നു.
രാജസ്ഥാനിലെ മരുഭൂമികൾ, കേരളത്തിലെ ഹിൽ സ്റ്റേഷനുകൾ, കസാക്കിസ്ഥാനിലെ മഞ്ഞുമൂടിയ പ്രദേശങ്ങൾ എന്നിവിടങ്ങളിലായി 117 ദിവസങ്ങൾ കൊണ്ടാണ് ചിത്രീകരണം പൂർത്തിയാക്കിയത്. മലയാളം, തമിഴ്, തെലുങ്ക്, ഹിന്ദി, കന്നഡ എന്നീ ഭാഷകളിൽ വൻകിട പാൻ-ഇന്ത്യൻ റിലീസായി എത്തുന്ന ചിത്രത്തിന്റെ ആഗോള റിലീസ് തീയതി ഉടൻ പ്രഖ്യാപിക്കുമെന്ന് നിർമ്മാതാക്കൾ അറിയിച്ചു.
