​കേരളത്തിന്റെ സപ്ലൈകോ മാതൃക പഠിക്കാൻ ആന്ധ്രാപ്രദേശ് പ്രതിനിധി സംഘം സന്ദർശനം നടത്തി

​കേരളത്തിന്റെ സപ്ലൈകോ മാതൃക പഠിക്കാൻ ആന്ധ്രാപ്രദേശ് പ്രതിനിധി സംഘം സന്ദർശനം നടത്തി

​കൊച്ചി: കേരള സ്റ്റേറ്റ് സിവിൽ സപ്ലൈസ് കോർപ്പറേഷന്റെ (സപ്ലൈകോ) മികച്ച പ്രവർത്തനരീതികളും ബിസിനസ് മാതൃകയും നേരിട്ടറിഞ്ഞ് പഠിക്കുന്നതിനായി ആന്ധ്രാപ്രദേശ് സിവിൽ സപ്ലൈസ് വകുപ്പിൽ നിന്നുള്ള നാലംഗ പ്രതിനിധി സംഘം സപ്ലൈകോ സന്ദർശിച്ചു. രണ്ട് ദിവസത്തെ ഔദ്യോഗിക സന്ദർശനത്തിന്റെ ഭാഗമായാണ് സംഘം കേരളത്തിലെത്തിയത്.

​ഡെപ്യൂട്ടി ഡയറക്ടർ ശേശഗിരി റാവു, ജില്ലാ സിവിൽ സപ്ലൈസ് ഓഫീസർ പത്മ, കൺസൾട്ടന്റുമാരായ ഹേമന്ത് കുമാർ കവലി, ശ്രാവണി ജമ്മുല എന്നിവരാണ് പ്രതിനിധി സംഘത്തിലുണ്ടായിരുന്നത്.

​സപ്ലൈകോയുടെ റീട്ടെയിൽ പ്രവർത്തനങ്ങൾ, പൊതുവിതരണ സംവിധാനങ്ങൾ (PDS), വിതരണ ശൃംഖല മാനേജ്മെന്റ് (Supply Chain Management), ഉപഭോക്തൃ സേവന-പ്രചാരണ പ്രവർത്തനങ്ങൾ, സുസ്ഥിര ബിസിനസ് മാതൃകകൾ എന്നിവയെക്കുറിച്ച് വിശദമായി മനസ്സിലാക്കുക എന്ന ലക്ഷ്യത്തോടെയായിരുന്നു സന്ദർശനം. ഉപഭോക്തൃ ക്ഷേമം ഉറപ്പാക്കുന്നതിലും വിപണി ഇടപെടലുകളിലും അവശ്യസാധനങ്ങളുടെ കാര്യക്ഷമമായ വിതരണത്തിലും സപ്ലൈകോ വഹിക്കുന്ന മാതൃകാപരമായ പങ്ക് മറ്റ് സംസ്ഥാനങ്ങൾക്ക് വലിയ പ്രചോദനമാണെന്ന് പ്രതിനിധി സംഘം അഭിപ്രായപ്പെട്ടു.

​സന്ദർശനത്തിന്റെ ഭാഗമായി സപ്ലൈകോയുടെ റീട്ടെയിൽ ശൃംഖല, സംഭരണ-വിതരണ സംവിധാനങ്ങൾ, വിലനിർണയ നയങ്ങൾ എന്നിവ സംഘം വിലയിരുത്തി. സപ്ലൈകോ മാനേജിംഗ് ഡയറക്ടർ ജയകൃഷ്ണൻ V M, ജനറൽ മാനേജർ എം. യു. ബിജു, മാർക്കറ്റിംഗ് അഡിഷണൽ ജനറൽ മാനേജർ ദീപു എം ആർ എന്നിവരുമായി പ്രതിനിധി സംഘം കൂടിക്കാഴ്ച നടത്തുകയും വിപണി ഇടപെടലുകളിലെ കേരളത്തിന്റെ വിജയമാതൃക ചർച്ച ചെയ്യുകയും ചെയ്തു