മാലിയിൽ വൻ ഭീകരാക്രമണം പ്രതിരോധ മന്ത്രി സാദിയോ കാമറ കൊല്ലപ്പെട്ടു
മാലി പ്രതിരോധ മന്ത്രി സാദിയോ കാമറ കാർ ബോംബ് സ്ഫോടനത്തിൽ കൊല്ലപ്പെട്ടു. തലസ്ഥാനമായ ബമാകോയ്ക്ക് സമീപം നടന്ന ആക്രമണത്തിന് പിന്നിൽ ജെഎൻഐഎം, തുവാരെഗ് വിമത സഖ്യമാണെന്ന് റിപ്പോർട്ട്.
Angel Varghese 
മാലിയിൽ വൻ ഭീകരാക്രമണം: പ്രതിരോധ മന്ത്രി സാദിയോ കാമറ കൊല്ലപ്പെട്ടു; വടക്കൻ നഗരമായ കിടാൽ വിമതർ പിടിച്ചെടുത്തു
ബമാകോ: മാലിയിലെ സൈനിക ഭരണകൂടത്തിന് കനത്ത പ്രഹരമേൽപ്പിച്ച് പ്രതിരോധ മന്ത്രി സാദിയോ കാമറ ഭീകരാക്രമണത്തിൽ കൊല്ലപ്പെട്ടു. തലസ്ഥാനമായ ബമാകോയ്ക്ക് സമീപമുള്ള കിറ്റയിലെ വസതിക്ക് നേരെ നടന്ന കാർ ബോംബ് സ്ഫോടനത്തിലാണ് അദ്ദേഹം മരിച്ചത്. ആക്രമണത്തിൽ കാമറയുടെ രണ്ടാം ഭാര്യയും രണ്ട് പേരക്കുട്ടികളും കൊല്ലപ്പെട്ടതായി ഔദ്യോഗിക വൃത്തങ്ങൾ സ്ഥിരീകരിച്ചു.
2020-ലെ സൈനിക അട്ടിമറിക്ക് ശേഷം രാജ്യം നേരിടുന്ന ഏറ്റവും വലിയ സുരക്ഷാ വെല്ലുവിളിയാണിത്. ഭീകര സംഘടനയായ ജെഎൻഐഎമ്മും (JNIM) തുവാരെഗ് വിമതരുടെ സഖ്യമായ എഫ്എൽഎയും (FLA) ചേർന്നാണ് ആക്രമണം ആസൂത്രണം ചെയ്തത്. ഇതിനു പിന്നാലെ വടക്കൻ നഗരമായ കിടാൽ തുവാരെഗ് വിമതർ പൂർണ്ണമായും പിടിച്ചെടുത്തതായും റിപ്പോർട്ടുകളുണ്ട്.
സൈന്യത്തിന്റെ ആത്മവിശ്വാസം തകർക്കുക എന്ന ലക്ഷ്യത്തോടെയാണ് ഈ ആസൂത്രിത ആക്രമണങ്ങൾ നടക്കുന്നത്. തലസ്ഥാനമായ ബമാകോ ഉൾപ്പെടെയുള്ള നഗരങ്ങളിൽ ജനങ്ങൾ കടുത്ത ഭീതിയിലാണ്. വിമാനത്താവളത്തിന് സമീപമുള്ള സെനു ജില്ലയിലും പ്രധാന സൈനിക താവളങ്ങളിലും സുരക്ഷാ നിയന്ത്രണങ്ങൾ കടുപ്പിച്ചു.
മാലിയിലെ അക്രമ സംഭവങ്ങളെ ഐക്യരാഷ്ട്രസംഘടന ജനറൽ സെക്രട്ടറി അന്റോണിയോ ഗുട്ടെറസും യൂറോപ്യൻ യൂണിയനും ശക്തമായി അപലപിച്ചു. സാഹേൽ മേഖലയിലെ വർദ്ധിച്ചുവരുന്ന ഭീകരവാദം നേരിടാൻ അന്താരാഷ്ട്ര പിന്തുണ അത്യാവശ്യമാണെന്ന് യുഎൻ വക്താവ് വ്യക്തമാക്കി. ഫ്രാൻസുമായുള്ള സൈനിക ബന്ധം അവസാനിപ്പിച്ച് റഷ്യയുടെ സഹായത്തോടെ മുന്നോട്ട് പോകുന്ന മാലി ഭരണകൂടത്തിന് പ്രതിരോധ മന്ത്രിയുടെ വിയോഗം രാഷ്ട്രീയമായും സൈനികമായും വലിയ തിരിച്ചടിയാണ്.
