മാധ്യമങ്ങൾക്ക് പൂട്ടിട്ട് സർക്കാർ സെക്രട്ടറിയേറ്റിൽ അക്രെഡിറ്റേഷനുള്ളവർക്കും വിലക്ക്
സെക്രട്ടറിയേറ്റിൽ മാധ്യമപ്രവർത്തകർക്ക് കർശന നിയന്ത്രണങ്ങളുമായി സർക്കാർ. അക്രെഡിറ്റേഷനുള്ളവർക്ക് പോലും മുൻകൂട്ടി അനുമതി വാങ്ങിയാൽ മാത്രമേ ഇനി പ്രവേശനം അനുവദിക്കൂ. പ്രതിപക്ഷത്ത് നിന്നപ്പോൾ മാധ്യമ സ്വാതന്ത്ര്യത്തിന് വേണ്ടി വാദിച്ചവരുടെ നിലപാടുമാറ്റത്തിനെതിരെ പ്രതിഷേധം ശക്തം
Angel Varghese 
മാധ്യമങ്ങൾക്ക് പൂട്ടിട്ട് സർക്കാർ; സെക്രട്ടറിയേറ്റിൽ അക്രെഡിറ്റേഷനുള്ളവർക്കും വിലക്ക്
തിരുവനന്തപുരം: സെക്രട്ടറിയേറ്റിൽ പൊതുജനങ്ങൾക്ക് ഏർപ്പെടുത്തിയ നിയന്ത്രണങ്ങളുടെ മറവിൽ മാധ്യമപ്രവർത്തകർക്ക് നേരെയും കർശന വിലക്കുകളുമായി സർക്കാർ. ഇനി മുതൽ സർക്കാർ അക്രെഡിറ്റേഷനുള്ള മാധ്യമപ്രവർത്തകർക്ക് പോലും മുൻകൂട്ടി അനുമതിയില്ലാതെ സെക്രട്ടറിയേറ്റ് മന്ദിരത്തിലേക്ക് പ്രവേശിക്കാൻ കഴിയില്ല. പ്രതിപക്ഷത്തിരുന്നപ്പോൾ മാധ്യമ സ്വാതന്ത്ര്യത്തിന് വേണ്ടി ശക്തമായി വാദിച്ച യു.ഡി.എഫ് മുന്നണി, അധികാരത്തിലെത്തിയതോടെ കടുത്ത നിയന്ത്രണങ്ങളിലേക്ക് നിലപാട് മാറ്റുന്നതായാണ് പുതിയ ഉത്തരവുകൾ വ്യക്തമാക്കുന്നത്.
പുതിയ പരിഷ്കാരങ്ങൾ അനുസരിച്ച് സെക്രട്ടറിയേറ്റിൽ എത്തുന്ന മാധ്യമപ്രവർത്തകരെ സുരക്ഷാ ജീവനക്കാർ പ്രത്യേകമായി സജ്ജീകരിച്ചിട്ടുള്ള കാത്തിരിപ്പ് മുറിയിലേക്ക് (Waiting Room) മാറ്റും. അവിടെ വെച്ച് ഏത് വകുപ്പിലെ ഉദ്യോഗസ്ഥരെയാണോ കാണേണ്ടത്, അവരുടെ കൃത്യമായ മുൻകൂർ അനുമതി ലഭിച്ചാൽ മാത്രമേ അകത്തേക്ക് പ്രവേശനം അനുവദിക്കുകയുള്ളൂ.
ഇതിനുപുറമേ, വകുപ്പിൽ നിന്ന് ആരാണ് മാധ്യമപ്രവർത്തകരെ വിളിച്ചതെന്നും, ആർക്കാണ് പ്രവേശന അനുമതി നൽകിയിട്ടുള്ളതെന്നും പ്രത്യേക രജിസ്റ്ററിൽ രേഖപ്പെടുത്തും. ഈ നടപടിക്രമങ്ങൾ പൂർത്തിയാക്കിയ ശേഷം മാത്രമേ മാധ്യമപ്രവർത്തകർക്ക് സെക്രട്ടറിയേറ്റിനകത്തേക്ക് കടക്കാൻ സാധിക്കൂ.
മാധ്യമപ്രവർത്തകർ സ്വതന്ത്രമായി സെക്രട്ടറിയേറ്റിനകത്ത് പ്രവേശിച്ച് ഉദ്യോഗസ്ഥരുമായി സംസാരിക്കുന്നതും, ഭരണപരമായ വീഴ്ചകൾ വെളിവാക്കുന്ന സുപ്രധാന രേഖകളോ വിവരങ്ങളോ കണ്ടെത്തുന്നത് തടയുകയുമാണ് ഈ പുതിയ മാധ്യമവിലക്കിന് പിന്നിലെ പ്രധാന ലക്ഷ്യമെന്നാണ് സൂചന. പ്രതിപക്ഷത്തിരുന്നപ്പോൾ മാധ്യമങ്ങൾക്കൊപ്പമാണെന്ന് പ്രസംഗിച്ചവർ ഭരണത്തിലേറിയപ്പോൾ സ്വതന്ത്ര മാധ്യമപ്രവർത്തനത്തിന്റെ വഴി പൂർണ്ണമായും അടയ്ക്കുകയാണെന്ന ആക്ഷേപവും ഇതോടെ ശക്തമായിട്ടുണ്ട്
