ഗൾഫിൽ കുടുങ്ങിയവരെ നാട്ടിലെത്തിക്കാൻ കൂടുതൽ വിമാന സർവീസുകൾ വിമാനത്താവളങ്ങളിൽ നിയന്ത്രണം തുടരുന്നു
ഗൾഫ് രാജ്യങ്ങളിൽ കുടുങ്ങിക്കിടക്കുന്ന ഇന്ത്യക്കാരെ നാട്ടിലെത്തിക്കാൻ എയർ ഇന്ത്യ, ഇൻഡിഗോ, സ്പൈസ് ജെറ്റ് കമ്പനികൾ കൂടുതൽ സർവീസുകൾ ആരംഭിച്ചു. കേരളത്തിലെ വിവിധ വിമാനത്താവളങ്ങളിലെ വിമാന സർവീസുകളുടെ പുതിയ വിവരങ്ങൾ അറിയാം
Angel Varghese 
ഗൾഫിൽ കുടുങ്ങിയവരെ എത്തിക്കാൻ കൂടുതൽ വിമാനങ്ങൾ; എയർ ഇന്ത്യയും ഇൻഡിഗോയും സ്പൈസ് ജെറ്റും രംഗത്ത്
കൊച്ചി/ന്യൂഡൽഹി: ഗൾഫ് രാജ്യങ്ങളിൽ കുടുങ്ങിക്കിടക്കുന്ന ഇന്ത്യക്കാരെ നാട്ടിലെത്തിക്കുന്നതിനായി വിമാനക്കമ്പനികൾ സർവീസുകൾ വർദ്ധിപ്പിച്ചു. ഇന്ത്യൻ വിമാനക്കമ്പനികൾക്ക് പുറമേ എമിറേറ്റ്സ് ഉൾപ്പെടെയുള്ള വിദേശ വിമാനക്കമ്പനികളും പ്രത്യേക സർവീസുകൾ നടത്തുന്നുണ്ട്. നിലവിൽ വിദേശ രാജ്യങ്ങളിൽ കുടുങ്ങിക്കിടക്കുന്ന യാത്രക്കാർക്ക് മുൻഗണന നൽകിക്കൊണ്ടാണ് ഈ നീക്കം.
വിമാനക്കമ്പനികളുടെ പ്രധാന തീരുമാനങ്ങൾ:
എയർ ഇന്ത്യ: ഗൾഫിൽ കുടുങ്ങിയവരെ തിരികെ എത്തിക്കുന്നതിനായി മൂന്ന് വലിയ (വൈഡ് ബോഡി) വിമാനങ്ങൾ വിന്യസിച്ചു. മുംബൈയിൽ നിന്ന് ദുബായിലേക്കും ജിദ്ദയിലേക്കും, ഡൽഹിയിൽ നിന്ന് ദുബായിലേക്കുമാണ് ഈ സർവീസുകൾ. ഈ വിമാനങ്ങൾ ഇന്ന് ഇന്ത്യയിലേക്ക് മടങ്ങും.
എയർ ഇന്ത്യ എക്സ്പ്രസ്: മസ്കത്തിൽ നിന്നുള്ള സർവീസുകൾ ഇന്നും തുടരും. കൊച്ചി, ഡൽഹി, മുംബൈ എന്നിവിടങ്ങളിലേക്ക് അധിക സർവീസുകൾ ഏർപ്പെടുത്തിയിട്ടുണ്ട്.
ഇൻഡിഗോ: ജിദ്ദയിലേക്ക് നാലും മസ്കത്തിലേക്ക് ഒന്നും വിമാനങ്ങളാണ് യാത്രക്കാരെ എത്തിക്കാനായി ഇൻഡിഗോ ക്രമീകരിച്ചിരിക്കുന്നത്.
സ്പൈസ് ജെറ്റ്: ഇന്ന് ഫുജൈറയിൽ നിന്ന് മുംബൈയിലേക്കും ഡൽഹിയിലേക്കും സ്പൈസ് ജെറ്റ് സർവീസ് നടത്തും.
കേരളത്തിലെ വിമാനത്താവളങ്ങളിലെ സ്ഥിതി:
ഇന്നലെ ഗൾഫിൽ നിന്നുള്ള അഞ്ച് വിമാനങ്ങളിലായി എഴുനൂറോളം പേർ കൊച്ചിയിൽ തിരിച്ചെത്തി. മസ്കത്തിൽ നിന്ന് മാത്രം മൂന്ന് സർവീസുകൾ ഉണ്ടായിരുന്നു. പാകിസ്ഥാനിലെ കറാച്ചിയിൽ കുടുങ്ങിയ മലയാളി കുടുംബവും ഇന്നലെ നാട്ടിൽ തിരിച്ചെത്തി.
അതേസമയം, വിവിധ വിമാനത്താവളങ്ങളിൽ സർവീസുകൾ റദ്ദാക്കുന്നത് യാത്രക്കാരെ വലയ്ക്കുന്നുണ്ട്.
തിരുവനന്തപുരം: ഇന്നലെ വിവിധ ഗൾഫ് രാജ്യങ്ങളിലേക്കും തിരിച്ചുമായി നടത്തേണ്ടിയിരുന്ന 30 സർവീസുകൾ റദ്ദാക്കി.
കരിപ്പൂർ: ഇന്നലെയും ഇന്നുമായി നടത്തേണ്ടിയിരുന്ന 25 പുറപ്പെടൽ സർവീസുകളും, 25 വരവ് സർവീസുകളും റദ്ദാക്കിയിട്ടുണ്ട്. എന്നാൽ ഇന്നലെ 10 രാജ്യാന്തര സർവീസുകൾ കരിപ്പൂരിൽ നിന്ന് നടന്നു.
കണ്ണൂർ: കണ്ണൂർ വിമാനത്താവളത്തിൽ നിന്നുള്ള രാജ്യാന്തര സർവീസുകൾ തുടർച്ചയായ മൂന്നാം ദിവസവും റദ്ദാക്കി.
