പ്രധാനമന്ത്രി നരേന്ദ്ര മോദി നാളെ കൊച്ചിയിൽ എൻഡിഎ തിരഞ്ഞെടുപ്പ് പ്രചാരണത്തിന് തുടക്കമാകും
പ്രധാനമന്ത്രി നരേന്ദ്ര മോദിയുടെ കൊച്ചി സന്ദർശനത്തിന്റെ ഭാഗമായി വിപുലമായ ഒരുക്കങ്ങൾ. റോഡ് ഷോ, വികസന പദ്ധതികളുടെ ഉദ്ഘാടനം, എൻഡിഎ തിരഞ്ഞെടുപ്പ് കൺവെൻഷൻ എന്നിവയിൽ പ്രധാനമന്ത്രി പങ്കെടുക്കും.
അനില എം കൃഷ്ണൻ 
കൊച്ചിയിൽ ആവേശം വിതറാൻ പ്രധാനമന്ത്രി നാളെയെത്തും; എൻഡിഎയുടെ തിരഞ്ഞെടുപ്പ് പ്രചാരണത്തിന് തുടക്കമാകും
കൊച്ചി: കേരളത്തിലെ നിയമസഭാ തിരഞ്ഞെടുപ്പ് ഗോദയിൽ ആവേശം നിറയ്ക്കാൻ പ്രധാനമന്ത്രി നരേന്ദ്ര മോദി നാളെ കൊച്ചിയിലെത്തും. ദേശീയ ജനാധിപത്യ സഖ്യത്തിന്റെ (എൻഡിഎ) ഔദ്യോഗിക തിരഞ്ഞെടുപ്പ് പ്രചാരണത്തിന് തുടക്കം കുറിക്കുന്നതിനൊപ്പം വിവിധ കേന്ദ്ര സർക്കാർ പദ്ധതികളുടെ ഉദ്ഘാടനവും അദ്ദേഹം നിർവഹിക്കും. പതിനായിരക്കണക്കിന് പ്രവർത്തകർ അണിനിരക്കുന്ന ബൃഹത്തായ റോഡ് ഷോയോടെയാണ് കൊച്ചി നഗരം പ്രധാനമന്ത്രിയെ വരവേൽക്കുന്നത്.
പ്രധാനമന്ത്രിയുടെ സന്ദർശന പരിപാടികൾ:
രാവിലെ 11.30: കൊച്ചി വിമാനത്താവളത്തിൽ എത്തുന്ന പ്രധാനമന്ത്രി ഹെലികോപ്റ്റർ മാർഗം ഐഎൻഎസ് ഗരുഡയിൽ ഇറങ്ങും.
മറൈൻ ഡ്രൈവ്: അഖില കേരള ധീവര സഭയുടെ സുവർണ ജൂബിലി സമ്മേളനത്തിന്റെ ഉദ്ഘാടനം.
കലൂർ സ്റ്റേഡിയം: സ്റ്റേഡിയം കവാടം മുതൽ സമ്മേളന വേദി വരെ പതിനായിരം പേർ പങ്കെടുക്കുന്ന റോഡ് ഷോ.
ഉച്ചയ്ക്ക് 12.30: റെയിൽവേ പദ്ധതികൾ ഉൾപ്പെടെയുള്ള കേന്ദ്ര സർക്കാർ പദ്ധതികളുടെ സമർപ്പണം.
ഉച്ചയ്ക്ക് 1.00: എൻഡിഎ തിരഞ്ഞെടുപ്പ് കൺവെൻഷൻ ഉദ്ഘാടനം.
ഉച്ചയ്ക്ക് 2.30: കൊച്ചിയിൽ നിന്നും തിരുച്ചിറപ്പള്ളിയിലേക്ക് തിരിക്കും.
'വികസിത കേരളം മോദിക്കൊപ്പം'
‘മാറ്റം തുടങ്ങാം, വികസിത കേരളം മോദിക്കൊപ്പം’ എന്ന മുദ്രാവാക്യമുയർത്തിയാണ് ഇക്കുറി എൻഡിഎ തിരഞ്ഞെടുപ്പിനെ നേരിടുന്നത്. എറണാകുളം, തൃശൂർ ജില്ലകളിൽ നിന്നായി അര ലക്ഷത്തോളം പ്രവർത്തകർ സമ്മേളനത്തിൽ പങ്കെടുക്കും. ബിഡിജെഎസ്, ട്വന്റി 20, നാഷനലിസ്റ്റ് കേരള കോൺഗ്രസ് തുടങ്ങിയ എൻഡിഎയിലെ പന്ത്രണ്ടോളം ഘടകകക്ഷികളുടെ പ്രമുഖ നേതാക്കൾ വേദിയിലുണ്ടാകും. കേരളത്തിനായുള്ള എൻഡിഎയുടെ വികസനരേഖയും പ്രകടനപത്രികയും പ്രധാനമന്ത്രി ചടങ്ങിൽ പ്രകാശനം ചെയ്തേക്കുമെന്ന് ബിജെപി നേതാക്കൾ അറിയിച്ചു.
