തൊടുപുഴയിൽ ലൗലജനായി മോഹൻലാൽ; തരുൺ മൂർത്തി ചിത്രം L366 അണിയറ വിശേഷങ്ങൾ
മലയാള സിനിമ കാത്തിരിക്കുന്ന മോഹൻലാൽ തരുൺ മൂർത്തി ചിത്രം L366 ന്റെ ലൊക്കേഷൻ വിശേഷങ്ങൾ കാണാം. ഒരു സാധാരണക്കാരനായ പോലീസ് ഓഫീസറുടെ കഥ പറയുന്ന ഈ റിയലിസ്റ്റിക് ഡ്രാമയിൽ മീരാ ജാസ്മിനാണ് നായിക. ആഷിക്ക് ഉസ്മാൻ നിർമ്മിക്കുന്ന ചിത്രത്തിന്റെ കൂടുതൽ വിശേഷങ്ങളിലേക്ക്.
Vazhoor Jose 
തൊടുപുഴയുടെ പശ്ചാത്തലത്തിൽ വീണ്ടും മോഹൻലാൽ; തരുൺ മൂർത്തി ചിത്രം 'L366' ചിത്രീകരണം പുരോഗമിക്കുന്നു
കൊച്ചി: 'തുടരും' എന്ന ഹിറ്റ് ചിത്രത്തിന് ശേഷം തരുൺ മൂർത്തിയും മോഹൻലാലും വീണ്ടും ഒന്നിക്കുന്ന പുതിയ ചിത്രത്തിന്റെ വിശേഷങ്ങൾ സോഷ്യൽ മീഡിയയിൽ തരംഗമാകുന്നു. 'L366' എന്ന് താൽക്കാലികമായി പേരിട്ടിരിക്കുന്ന ചിത്രത്തിന്റെ പ്രധാന ലൊക്കേഷൻ തൊടുപുഴയാണ്. ജനുവരി 23-ന് ആരംഭിച്ച സിനിമയുടെ ചിത്രീകരണം നിലവിൽ കൊച്ചിയിലും തൊടുപുഴയിലുമായി പുരോഗമിക്കുകയാണ്.
ആഷിക്ക് ഉസ്മാൻ പ്രൊഡക്ഷൻസിൻ്റെ ബാനറിൽ ആഷിക്ക് ഉസ്മാൻ നിർമ്മിക്കുന്ന ഈ ചിത്രത്തിൽ ലൗലജൻ എന്ന സാധാരണക്കാരനായ പോലീസ് സബ് ഇൻസ്പെക്ടറുടെ വേഷത്തിലാണ് മോഹൻലാൽ എത്തുന്നത്. ഒരു റിയലിസ്റ്റിക് ഇമോഷണൽ ഡ്രാമയായി ഒരുങ്ങുന്ന സിനിമ, സാധാരണക്കാരൻ്റെ ജീവിതവും വികാരങ്ങളും സംഘർഷഭരിതമായ മുഹൂർത്തങ്ങളിലൂടെയാണ് അവതരിപ്പിക്കുന്നത്.
മീരാ ജാസ്മിൻ നായികയായി എത്തുന്ന ചിത്രത്തിൽ ലാലു അലക്സ്, മനോജ് കെ. ജയൻ, ജഗദീഷ്, ഇർഷാദ് തുടങ്ങിയ വൻ താരനിര തന്നെ അണിനിരക്കുന്നുണ്ട്. 'ഇഷ്ക്', 'ആലപ്പുഴ ജിംഖാന' തുടങ്ങിയ ചിത്രങ്ങളിലൂടെ ശ്രദ്ധേയനായ രതീഷ് രവിയാണ് തിരക്കഥ ഒരുക്കുന്നത്. ഷാജികുമാർ ഛായാഗ്രഹണവും വിവേക് ഹർഷൻ എഡിറ്റിംഗും നിർവ്വഹിക്കുന്നു. ജെയ്ക്സ് ബിജോയ്സാണ് സംഗീതം. സെൻട്രൽ പിക്ചേഴ്സ് ചിത്രം തിയേറ്ററുകളിൽ എത്തിക്കും.
