ജി. സുധാകരൻ അമ്പലപ്പുഴയിൽ യുഡിഎഫ് സ്വതന്ത്രനായേക്കും സിപിഎം അനുനയ നീക്കം ഉപേക്ഷിച്ചു
അമ്പലപ്പുഴയിൽ ജി. സുധാകരനെ സ്വതന്ത്രനായി മത്സരിപ്പിക്കാൻ യുഡിഎഫ് നീക്കം. സിപിഎം അനുനയ ചർച്ചകൾ അവസാനിപ്പിച്ചു.
Angel Varghese 
ജി. സുധാകരൻ യുഡിഎഫ് സ്വതന്ത്രനായേക്കും; അനുനയ നീക്കങ്ങൾ അവസാനിപ്പിച്ച് സിപിഎം
ആലപ്പുഴ: മുതിർന്ന നേതാവ് ജി. സുധാകരനെ പാർട്ടിയിലേക്ക് മടക്കിക്കൊണ്ടുവരാനുള്ള ശ്രമങ്ങൾ സിപിഎം ഔദ്യോഗികമായി അവസാനിപ്പിച്ചു. ഇതോടെ വരാനിരിക്കുന്ന നിയമസഭാ തിരഞ്ഞെടുപ്പിൽ അമ്പലപ്പുഴ മണ്ഡലത്തിൽ സുധാകരനെ പൊതുസ്വതന്ത്രനായി മത്സരിപ്പിക്കാനുള്ള നീക്കങ്ങൾ കോൺഗ്രസ് സജീവമാക്കി. യുഡിഎഫ് നേതൃത്വം സുധാകരനുമായി പ്രാഥമിക ചർച്ചകൾ നടത്തിയതായാണ് വിവരം.
അംഗത്വം പുതുക്കില്ലെന്ന ഉറച്ച നിലപാടിൽ സുധാകരൻ തുടരുന്ന സാഹചര്യത്തിൽ, അദ്ദേഹം സ്വതന്ത്രനായി രംഗത്തിറങ്ങിയാൽ പൂർണ്ണ പിന്തുണ നൽകുമെന്ന് കോൺഗ്രസ് നേതൃത്വം ഉറപ്പുനൽകിയിട്ടുണ്ട്. സുധാകരൻ സ്വന്തം നിലയിൽ സ്ഥാനാർത്ഥിത്വം പ്രഖ്യാപിച്ച ശേഷം യുഡിഎഫ് പിന്തുണ പ്രഖ്യാപിക്കുന്ന രീതിയിലുള്ള തന്ത്രമാണ് അണിയറയിൽ ഒരുങ്ങുന്നത്. സുധാകരന്റെ തീരുമാനത്തിന് ശേഷം മാത്രമേ അമ്പലപ്പുഴയിലെ സ്ഥാനാർത്ഥി കാര്യത്തിൽ അന്തിമ തീരുമാനമെടുക്കാവൂ എന്ന് കെപിസിസി ജില്ലാ നേതൃത്വത്തിന് നിർദ്ദേശം നൽകിയിട്ടുണ്ട്.
സിപിഎം പിന്മാറുന്നു
സംസ്ഥാന സെക്രട്ടറി എം.വി. ഗോവിന്ദനും ജില്ലാ സെക്രട്ടറി ആർ. നാസറും നേരിട്ട് ഇടപെട്ടിട്ടും സുധാകരൻ വഴങ്ങിയിരുന്നില്ല. കഴിഞ്ഞ ദിവസം സി.എസ്. സുജാതയും ജി. ഹരിശങ്കറും സുധാകരന്റെ വീട്ടിലെത്തി ഒരു മണിക്കൂറോളം ചർച്ച നടത്തിയെങ്കിലും തന്റെ ഫെയ്സ്ബുക്ക് പോസ്റ്റിലെ നിലപാടിൽ മാറ്റമില്ലെന്ന് അദ്ദേഹം വ്യക്തമാക്കി. ഇതോടെയാണ് ഇനി അനുനയത്തിനില്ലെന്ന കടുത്ത നിലപാടിലേക്ക് സിപിഎം എത്തിയത്. വ്യക്തിപരമായ സൗഹൃദത്തിന്റെ പേരിൽ എം.എ. ബേബി ബന്ധപ്പെട്ടേക്കാമെന്നല്ലാതെ ഔദ്യോഗികമായ ചർച്ചകൾ ഇനി ഉണ്ടാകില്ലെന്ന് പാർട്ടി വൃത്തങ്ങൾ സൂചിപ്പിക്കുന്നു.
