പഠനം മുടങ്ങരുത് പട്ടികവർഗ വിദ്യാർത്ഥികൾക്കായി കൂടെ പദ്ധതിയുമായി വയനാട്

വയനാട്ടിൽ പട്ടികവർഗ വിദ്യാർത്ഥികളുടെ തുടർപഠനം ഉറപ്പാക്കാൻ 'കൂടെ' പദ്ധതി: ഇടപെടലുകൾ ശക്തമാക്കുന്നു

​സുൽത്താൻ ബത്തേരി: എസ്.എസ്.എൽ.സി വിജയിച്ച പട്ടികവർഗ വിഭാഗത്തിലെ ഒരു വിദ്യാർത്ഥിയുടെ പോലും പഠനം മുടങ്ങില്ലെന്ന് ഉറപ്പുവരുത്തി സുൽത്താൻ ബത്തേരിയിൽ 'കൂടെ' പദ്ധതി. എം.എൽ.എ ഐ.സി. ബാലകൃഷ്ണന്റെ അധ്യക്ഷതയിൽ ചേർന്ന ഉന്നതതല യോഗത്തിലാണ് വിദ്യാർത്ഥികളുടെ തുടർപഠനത്തിനായി കർമ്മപദ്ധതി ആവിഷ്കരിച്ചത്.

​പ്ലസ് വൺ പ്രവേശനം ലഭിച്ചിട്ടും വിവിധ കാരണങ്ങളാൽ ചേരാൻ സാധിക്കാത്ത 46 വിദ്യാർത്ഥികളെയും, സപ്ലിമെന്ററി അലോട്ട്മെന്റിന് അവസരം നഷ്ടപ്പെട്ട മൂന്ന് വിദ്യാർത്ഥികളെയും ഈ മാസം 25, 26 തീയതികളിൽ ജനപ്രതിനിധികളുടെയും ഉദ്യോഗസ്ഥരുടെയും സാന്നിധ്യത്തിൽ നേരിൽ കണ്ട് പ്രശ്നങ്ങൾ പരിഹരിക്കും. പ്രവേശന നടപടികൾ വേഗത്തിലാക്കാൻ സർക്കാർ തലത്തിൽ ഇടപെടലുകൾ നടത്തുമെന്നും യോഗം വ്യക്തമാക്കി.

​ഇതിനുപുറമെ, സപ്ലിമെന്ററി അലോട്ട്മെന്റിന് അപേക്ഷിക്കാത്ത 142 വിദ്യാർത്ഥികളുടെ തുടർപഠനത്തിനായി അലോട്ട്മെന്റ് പ്രസിദ്ധീകരിച്ച ശേഷം പ്രത്യേക നടപടികൾ സ്വീകരിക്കാനും യോഗത്തിൽ തീരുമാനമായി. വിദ്യാർത്ഥികളെ വിദ്യാഭ്യാസത്തിന്റെ മുഖ്യധാരയിൽ നിലനിർത്തുന്നതിനായി തദ്ദേശ സ്വയംഭരണ സ്ഥാപനങ്ങളും ഉദ്യോഗസ്ഥരും തമ്മിലുള്ള ഏകോപനം ശക്തമാക്കുമെന്ന് എം.എൽ.എ അറിയിച്ചു. യോഗത്തിൽ വിവിധ വകുപ്പ് ഉദ്യോഗസ്ഥരും ജനപ്രതിനിധികളും പങ്കെടുത്തു.