നോക്കുവിദ്യാ പാവകളിയെ ലോകവേദിയിലെത്തിച്ച പത്മശ്രീ മോനിപ്പള്ളി പങ്കജാക്ഷി അന്തരിച്ചു
പരമ്പരാഗത കലാരൂപമായ നോക്കുവിദ്യാ പാവകളിയെ അന്താരാഷ്ട്ര തലത്തിൽ ശ്രദ്ധേയയാക്കിയ പത്മശ്രീ ജേതാവ് മോനിപ്പള്ളി പങ്കജാക്ഷി (90) അന്തരിച്ചു. കോട്ടയത്തെ വസതിയിലായിരുന്നു അന്ത്യം.
അനില എം കൃഷ്ണൻ 
നോക്കുവിദ്യാ പാവകളിയെ ലോകവേദിയിലെത്തിച്ച പത്മശ്രീ മോനിപ്പള്ളി പങ്കജാക്ഷി അന്തരിച്ചു
കോട്ടയം: അപൂർവ പരമ്പരാഗത കലാരൂപമായ നോക്കുവിദ്യാ പാവകളിയെ ലോകശ്രദ്ധയിലേക്ക് നയിച്ച പ്രശസ്ത കലാകാരി പത്മശ്രീ മോനിപ്പള്ളി പങ്കജാക്ഷി (90) അന്തരിച്ചു. വാർധക്യസഹജമായ അസുഖങ്ങളെത്തുടർന്ന് ചികിത്സയിലിരിക്കെ കോട്ടയം മോനിപ്പള്ളിയിലെ വസതിയിലായിരുന്നു അന്ത്യം. നോക്കുവിദ്യാ പാവകളി എന്ന കലാരൂപത്തെ ജീവനോടെ നിലനിർത്തിയ അവസാനത്തെ കണ്ണികളിൽ പ്രമുഖയായിരുന്നു അവർ. കലാരംഗത്തെ അതുല്യമായ സംഭാവനകൾ പരിഗണിച്ച് 2020-ൽ രാജ്യം പത്മശ്രീ നൽകി പങ്കജാക്ഷിയെ ആദരിച്ചിരുന്നു.
തന്റെ എട്ടാം വയസ്സിൽ മാതാപിതാക്കളിൽ നിന്നാണ് പങ്കജാക്ഷി നോക്കുവിദ്യയുടെ ആദ്യപാഠങ്ങൾ അഭ്യസിച്ചത്. മൂക്കിനും മേൽച്ചുണ്ടിനും ഇടയിൽ മൂന്നടി നീളമുള്ള തണ്ടിൽ മരപ്പാവകളെ ബാലൻസ് ചെയ്തു നിർത്തി, കൈകൾ ഉപയോഗിക്കാതെ കണ്ണുകളുടെ ചലനവും ഏകാഗ്രതയും കൊണ്ട് മാത്രം അവയെ ചലിപ്പിക്കുന്ന അപൂർവമായ അവതരണ ശൈലിയായിരുന്നു ഇവരുടേത്. രാമായണത്തിലെയും മഹാഭാരതത്തിലെയും കഥാസന്ദർഭങ്ങൾ പശ്ചാത്തല സംഗീതത്തിന്റെ അകമ്പടിയോടെ പാവകളിയിലൂടെ അവർ ജനങ്ങളിലേക്ക് എത്തിച്ചു. പങ്കജാക്ഷിയുടെ ഭർത്താവ് പരേതനായ ശിവരാമ പണിക്കർ ഈ കലാരൂപത്തിന് ആവശ്യമായ പാട്ടുകൾ രചിച്ചും പശ്ചാത്തല പിന്തുണ നൽകിയും സജീവമായി ഒപ്പമുണ്ടായിരുന്നു.
കേരളത്തിലെ ക്ഷേത്രമുറ്റങ്ങളിൽ നിന്നും ഉത്സവപ്പറമ്പുകളിൽ നിന്നും ഈ കലാരൂപത്തെ പാരീസ് ഉൾപ്പെടെയുള്ള രാജ്യാന്തര വേദികളിലേക്ക് ഉയർത്തിയത് പങ്കജാക്ഷിയുടെ കഠിനാധ്വാനമായിരുന്നു. പ്രായാധിക്യവും അസുഖങ്ങളും അലട്ടിയതോടെ കഴിഞ്ഞ കുറച്ചുകാലമായി അവർ വേദികളിൽ നിന്ന് വിട്ടുനിൽക്കുകയായിരുന്നു.
തന്റെ കാലശേഷം ഈ കല ഇല്ലാതായിപ്പോകരുത് എന്ന നിർബന്ധത്താൽ അവർ കൊച്ചുമകളായ കെ.എസ്. രഞ്ജിനിയെ ഇത് പൂർണ്ണമായും പഠിപ്പിച്ചു നൽകിയിരുന്നു. നിലവിൽ ലോകത്ത് ഈ കലാരൂപം അവതരിപ്പിക്കാൻ അറിയാവുന്ന ഏക വ്യക്തി രഞ്ജിനിയാണ്. സംസ്കാരം പിന്നീട് നടക്കും.
