ഏഷ്യയിലെ ഏറ്റവും വലിയ വൈറ്റ് വാട്ടർ കയാക്കിങ് മത്സരമായ മലബാർ റിവർ ഫെസ്റ്റിവൽ ആവേശം കൂട്ടാൻ വൈവിധ്യമാർന്ന പ്രീ ഇവന്റുകളുമായി കോഴിക്കോട്
ഏഷ്യയിലെ ഏറ്റവും വലിയ വൈറ്റ് വാട്ടർ കയാക്കിങ് മത്സരമായ മലബാർ റിവർ ഫെസ്റ്റിവലിന് മുന്നോടിയായി കോഴിക്കോട് ജില്ലയിലെ വിവിധയിടങ്ങളിൽ സംഘടിപ്പിക്കുന്ന പ്രീ ഇവന്റുകളുടെ വിവരങ്ങൾ.
അനില എം കൃഷ്ണൻ 
മലബാർ റിവർ ഫെസ്റ്റിവൽ: ആവേശം കൂട്ടാൻ വൈവിധ്യമാർന്ന പ്രീ-ഇവന്റുകൾ; സംഘാടക സമിതി രൂപീകരിച്ചു
കോഴിക്കോട്: ഏഷ്യയിലെ ഏറ്റവും വലിയ വൈറ്റ് വാട്ടർ കയാക്കിങ് മത്സരവും രാജ്യത്തെ പ്രമുഖ സാഹസിക കായിക മേളകളിലൊന്നുമായ മലബാർ റിവർ ഫെസ്റ്റിവലിന് മുന്നോടിയായി ജില്ലയിൽ വൈവിധ്യമാർന്ന പ്രീ-ഇവന്റുകൾ സംഘടിപ്പിക്കുന്നു. ജൂലൈ 30 മുതൽ ഓഗസ്റ്റ് 2 വരെ കോഴിക്കോട് ചാലിപ്പുഴയിലും ഇരുവഞ്ഞിപ്പുഴയിലുമായാണ് മേളയുടെ പന്ത്രണ്ടാം പതിപ്പ് അരങ്ങേറുന്നത്. വിവിധ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിലാണ് ജനപങ്കാളിത്തത്തോടെയുള്ള പ്രീ-ഇവന്റുകൾ ഒരുക്കുന്നത്.
പ്രീ-ഇവന്റുകളുടെ സമയവിവരങ്ങൾ:
ജൂലൈ 18: തിരുവമ്പാടിയിൽ നീന്തൽ മത്സരം.
ജൂലൈ 19: കൂടരഞ്ഞിയിൽ കൈറ്റ് ഫെസ്റ്റ്, തുഷാരഗിരി അഡ്വഞ്ചർ പാർക്കിൽ ഓഫ്റോഡ് ഫൺ ഡ്രൈവ്, മുക്കത്ത് കബഡി ചാമ്പ്യൻഷിപ്പ്, കൊടിയത്തൂരിൽ 4x4 വണ്ടിപ്പൂട്ട്.
ജൂലൈ 20: വയനാട് ചുരത്തിൽ മഴനടത്തം.
ജൂലൈ 23: കോടഞ്ചേരി മുതൽ തേവർമല വരെ മഴനടത്തം.
ജൂലൈ 25: ഓമശ്ശേരിയിൽ മഡ് ഫുട്ബോൾ, കൂളിമാട് മുതൽ തുഷാരഗിരി വരെ സൈക്ലിങ് ടൂർ.
ജൂലൈ 26: കക്കാടംപൊയിലിൽ മീൻപിടിത്ത മത്സരം, കോഴിക്കോട് മുതൽ കയാക്കിങ് സെന്റർ വരെ മൺസൂൺ ബുള്ളറ്റ് ഫൺ റൈഡ്.
ജൂലൈ 29: തുഷാരഗിരിയിൽ 'കയാക്കിങ് ബ്രഷ് സ്ട്രോക്സ്'.
ഇവയ്ക്ക് പുറമെ വയനാട് ചുരം റൺ, തലാപ്പിയ ഫിഷിങ് ചാമ്പ്യൻഷിപ്പ്, ട്രക്കിങ് എന്നിവ ഇതിനകം പ്രീ-ഇവന്റുകളുടെ ഭാഗമായി പൂർത്തിയായിട്ടുണ്ട്.
കേരള വിനോദസഞ്ചാര വകുപ്പ്, കേരള അഡ്വഞ്ചർ ടൂറിസം പ്രമോഷൻ സൊസൈറ്റി (KATPS), ജില്ലാ ടൂറിസം പ്രമോഷൻ കൗൺസിൽ (DTPC), തദ്ദേശീയ ത്രിതല പഞ്ചായത്തുകൾ എന്നിവയുടെ സംയുക്താഭിമുഖ്യത്തിലാണ് മേള സംഘടിപ്പിക്കുന്നത്.
മേളയുടെ വിജയകരമായ നടത്തിപ്പിനായുള്ള സംഘാടക സമിതി യോഗം കോടഞ്ചേരി ഗ്രാമപഞ്ചായത്ത് രാജീവ് ഗാന്ധി ഓഡിറ്റോറിയത്തിൽ സി.കെ. കാസിം എം.എൽ.എ ഉദ്ഘാടനം ചെയ്തു. തിരുവമ്പാടി ഗ്രാമപഞ്ചായത്ത് പ്രസിഡന്റ് ജിതിൻ പല്ലാട്ട്, കോടഞ്ചേരി ഗ്രാമപഞ്ചായത്ത് വൈസ് പ്രസിഡന്റ് അലക്സ് തോമസ് ചെമ്പകശ്ശേരി, കൊടുവള്ളി ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ ജോബി ഇലന്തൂർ, ടൂറിസം വകുപ്പ് ഡെപ്യൂട്ടി ഡയറക്ടർ പ്രദീപ് ചന്ദ്രൻ, അഡ്വഞ്ചർ ടൂറിസം സി.ഇ.ഒ ബിനു കുര്യാക്കോസ് എന്നിവരുൾപ്പെടെ പ്രമുഖ ജനപ്രതിനിധികളും വിവിധ വകുപ്പ് ഉദ്യോഗസ്ഥരും യോഗത്തിൽ പങ്കെടുത്തു സംസാരിച്ചു.
