സുരാജ് വെഞ്ഞാറമൂടിന്റെ റൺ മാമാ റൺ ചിത്രീകരണം കൊച്ചിയിൽ ആരംഭിച്ചു

സുരാജ് വെഞ്ഞാറമൂടിന്റെ 'റൺ മാമാ റൺ' ചിത്രീകരണം കൊച്ചിയിൽ ആരംഭിച്ചു

​കൊച്ചി: ഹാസ്യ കഥാപാത്രങ്ങളിലൂടെ പ്രേക്ഷകരുടെ മനസ്സിൽ ഇടം നേടിയ നടൻ സുരാജ് വെഞ്ഞാറമൂട് ഒരു നീണ്ട ഇടവേളയ്ക്ക് ശേഷം മുഴുനീള ഹ്യൂമർ കഥാപാത്രത്തെ അവതരിപ്പിക്കുന്ന 'റൺ മാമാ റൺ' എന്ന ചിത്രത്തിന്റെ ചിത്രീകരണം ഡിസംബർ പതിനഞ്ച് തിങ്കളാഴ്ച കൊച്ചിയിൽ ആരംഭിച്ചു.

​പ്രശസ്ത സംഗീത സംവിധായകൻ സ്റ്റീഫൻ ദേവസ്സിയുടെ ഉടമസ്ഥതയിലുള്ള കളമശ്ശേരിയിലെ എസ്.ഡി. സ്കെയിപ്സ് സ്റ്റുഡിയോയിലായിരുന്നു ചിത്രീകരണത്തിന് തുടക്കമിട്ടത്. ലളിതമായ ചടങ്ങിൽ നടൻ ഇന്ദ്രജിത്ത് സുകുമാരൻ സ്വിച്ചോൺ കർമ്മം നിർവ്വഹിച്ചു. നിധിൻ മൈക്കിളാണ് ഫസ്റ്റ് ക്ലാപ്പ് നൽകിയത്.

​ചടങ്ങിന്റെ ഭാഗമായി സംവിധായകൻ പ്രശാന്ത് വിജയകുമാർ, തിരക്കഥാകൃത്ത് രെജീഷ് മിഥില, കലാസംവിധായകൻ ഷംജിത്ത് രവി, നിർമ്മാതാവ് ഷനാസ് ഹമീദ്, നടന്മാരായ ഇന്ദ്രൻസ്, കോട്ടയം നസീർ, ബാലു വർഗീസ്, ഉണ്ണിരാജ തുടങ്ങിയവർ ഭദ്രദീപം തെളിയിച്ചു.

​കലാസംവിധായകൻ ഷംജിത്ത് രവി ഒരുക്കിയ കൂറ്റൻ സെറ്റിൽ ഇന്ദ്രൻസും ബോളിവുഡ് മോഡലും നടിയുമായ അഞ്ജലി സിംഗും പങ്കെടുക്കുന്ന ഒരു ഗാനരംഗമാണ് ആദ്യം ചിത്രീകരിക്കുന്നത്. നാല് ദിവസത്തോളം ഈ ഗാനരംഗം നീണ്ടുനിൽക്കും.

​'ക്വീൻ ഐലൻഡ്' എന്ന സാങ്കൽപ്പിക ഗ്രാമത്തിലാണ് ചിത്രത്തിന്റെ കഥ നടക്കുന്നത്. ഇവിടെ ചെറിയ തരികിടകളുമായി കഴിയുന്ന എഡിസൺ എന്ന യുവാവിന്റെ ജീവിതത്തിലേക്ക്, എഡിസണേക്കാൾ വലിയ പ്രശ്നങ്ങളുമായി അനന്തരവൻ ഗബ്രിയേൽ കടന്നുവരുന്നതും തുടർന്നുണ്ടാകുന്ന രസകരമായ സംഭവങ്ങളുമാണ് ചിത്രം ഹാസ്യമുഹൂർത്തങ്ങളിലൂടെ അവതരിപ്പിക്കുന്നത്.

​ചിത്രത്തിൽ സുരാജ് വെഞ്ഞാറമൂടും ബാലു വർഗീസുമാണ് യഥാക്രമം എഡിസൺ, ഗബ്രിയേൽ എന്നീ കഥാപാത്രങ്ങളെ അവതരിപ്പിക്കുന്നത്. ബാബുരാജ്, ഷമ്മി തിലകൻ, കോട്ടയം നസീർ, ജനാർദ്ദനൻ, ഉണ്ണിരാജ, നസീർ സംക്രാന്തി, ബോളിവുഡ് നടൻ പങ്കജ് എന്നിവരും പ്രധാന വേഷങ്ങളിലുണ്ട്.

​സ്റ്റോറി ലാബ് മൂവീസിന്റെ ബാനറിൽ ഷനാസ് ഹമീദ്, പ്രശാന്ത് വിജയകുമാർ എന്നിവരാണ് ചിത്രം നിർമ്മിക്കുന്നത്. രെജീഷ് മിഥിലയുടേതാണ് കഥ, തിരക്കഥ, സംഭാഷണം.

​ഗാനങ്ങൾക്ക് ഗോപി സുന്ദർ ഈണം പകരുന്നു. ഛായാഗ്രഹണം കിരൺ കിഷോർ, എഡിറ്റിംഗ് വി. സാജൻ, കലാ സംവിധാനം ഷംജിത്ത് രവി. കൊച്ചിയിലും കൊൽക്കത്തയിലുമായി ചിത്രീകരണം പൂർത്തിയാകും.