ഓണാഘോഷ ഫണ്ട് കണക്കുകൾ ലഭ്യമല്ല മൂവാറ്റുപുഴ നഗരസഭയുടെ മറുപടി വിവാദത്തിൽ

ഓണാഘോഷ ഫണ്ട് കണക്കുകൾ ലഭ്യമല്ല: മൂവാറ്റുപുഴ നഗരസഭയുടെ മറുപടി വിവാദത്തിൽ

​മൂവാറ്റുപുഴ: 2026-ലെ മൂവാറ്റുപുഴ നഗരസഭാ ഓണാഘോഷത്തിന്റെ ഫണ്ട് ശേഖരണവും ചെലവും സംബന്ധിച്ച വിവരങ്ങൾ ഓഫീസിൽ ലഭ്യമല്ലെന്ന നഗരസഭാ അധികൃതരുടെ മറുപടി വലിയ വിവാദങ്ങൾക്ക് വഴിവെക്കുന്നു. മുൻ കൗൺസിലർ വി.എ. ജാഫർ സാദിഖ് വിവരവകാശ നിയമപ്രകാരം സമർപ്പിച്ച അപേക്ഷയ്ക്കാണ് നഗരസഭ ഈ വിവാദ വിശദീകരണം നൽകിയിരിക്കുന്നത്.

​നഗരസഭയുടെ നേതൃത്വത്തിൽ പ്രൗഢഗംഭീരമായി സംഘടിപ്പിച്ച 'ത്രിവേണിയോണം' ഓണാഘോഷ പരിപാടിയുമായി ബന്ധപ്പെട്ട് എത്ര തുക പിരിവിലൂടെ സമാഹരിച്ചു, സംസ്ഥാന സർക്കാരിൽ നിന്ന് എത്ര ധനസഹായം ലഭിച്ചു, പരിപാടിയുടെ ആകെ ചെലവ് എത്രയായിരുന്നു തുടങ്ങിയ സുപ്രധാന വിവരങ്ങളാണ് അപേക്ഷയിൽ ചോദിച്ചിരുന്നത്. കൂടാതെ, ഫണ്ട് ശേഖരണത്തിനായി ഔദ്യോഗിക രസീതുകൾ ഉപയോഗിച്ചിട്ടുണ്ടോ എന്നും അതിനായി പ്രത്യേക ബാങ്ക് അക്കൗണ്ടുകൾ ആരംഭിച്ചിട്ടുണ്ടോ എന്നും വ്യക്തമാക്കണമെന്നും അപേക്ഷയിൽ ആവശ്യപ്പെട്ടിരുന്നു.

​എന്നാൽ, അപേക്ഷയിൽ ആവശ്യപ്പെട്ട വിവരങ്ങൾ നഗരസഭയുടെ ഫയലുകളിൽ ക്രോഡീകരിച്ചിട്ടില്ലെന്നും ഓഫീസിൽ റെക്കോർഡുകളായി സൂക്ഷിച്ചിട്ടില്ലാത്തതിനാൽ വിവരങ്ങൾ നൽകാൻ നിർവ്വാഹമില്ലെന്നുമാണ് നഗരസഭ നൽകിയ ഔദ്യോഗിക മറുപടി.

​പൊതുജനങ്ങളുടെ പണവും സർക്കാരിന്റെ ധനസഹായവും ഉപയോഗിച്ച് നടത്തുന്ന ആഘോഷങ്ങളുടെ സാമ്പത്തിക വിവരങ്ങൾ ചോദിക്കുമ്പോൾ റെക്കോർഡുകൾ ഇല്ലെന്ന് പറയുന്നത് നഗരസഭയുടെ സുതാര്യതയില്ലായ്മയും ഉത്തരവാദിത്തമില്ലായ്മയുമാണ് വ്യക്തമാക്കുന്നതെന്ന് ചൂണ്ടിക്കാട്ടി ശക്തമായ പ്രതിഷേധവും ആക്ഷേപവുമാണ് ജനങ്ങൾക്കിടയിലും രാഷ്ട്രീയ വൃത്തങ്ങളിലും ഉയരുന്നത്.