മലയാളി സംവിധായകൻ വിനോദ് സാം പീറ്ററിന്റെ മറാത്തി ചിത്രം പഗ്ല്യാ റിലീസിനൊരുങ്ങുന്നു

മലയാളി സംവിധായകന്റെ മറാത്തി ചിത്രം 'പഗ്ല്യാ' ലോകവേദികളിലെ തിളക്കത്തിന് ശേഷം റിലീസിനൊരുങ്ങുന്നു

​കൊച്ചി: ലോകസിനിമയിലെ പ്രശസ്തമായ ചലച്ചിത്ര മേളകളിൽ അംഗീകാരങ്ങൾ വാരിക്കൂട്ടിയ മലയാളി സംവിധായകൻ വിനോദ് സാം പീറ്ററിന്റെ മറാത്തി ചിത്രം 'പഗ്ല്യാ' (Puglya) ഈ മാസം 27-ന് റിലീസ് ചെയ്യും. കുട്ടികളുടെ വൈകാരിക ലോകത്തെ പ്രമേയമാക്കി ഒരുക്കിയ ചിത്രം മഹാരാഷ്ട്രയിലുടനീളമാണ് പ്രദർശനത്തിന് എത്തുന്നത്.

​അന്താരാഷ്ട്ര അംഗീകാരങ്ങൾ

മോസ്കോ അന്താരാഷ്ട്ര ചലച്ചിത്രമേളയിൽ മികച്ച വിദേശഭാഷാ ഫീച്ചർ ഫിലിം പുരസ്കാരം നേടിയ പഗ്ല്യാ, ഇതിനോടകം വിവിധ രാജ്യങ്ങളിൽ നിന്നായി ഇരുപതോളം പുരസ്കാരങ്ങൾ സ്വന്തമാക്കിയിട്ടുണ്ട്. വേൾഡ് പ്രീമിയർ ഫിലിം അവാർഡ്സിൽ മികച്ച ചിത്രം, സംവിധായകൻ, നടൻ, നടി, പശ്ചാത്തല സംഗീതം എന്നിങ്ങനെ അഞ്ച് പ്രധാന വിഭാഗങ്ങളിൽ പുരസ്കാരം നേടി ചിത്രം ചരിത്രം കുറിച്ചു. രണ്ടായിരത്തോളം ചിത്രങ്ങളോട് മത്സരിച്ചാണ് 'പഗ്ല്യാ' ഈ നേട്ടം കരസ്ഥമാക്കിയത്. ലണ്ടൻ, കാലിഫോർണിയ, ഇറ്റലി, ഓസ്‌ട്രേലിയ തുടങ്ങി നിരവധി രാജ്യങ്ങളിൽ ചിത്രം പ്രദർശിപ്പിക്കുകയും പ്രശംസ പിടിച്ചുപറ്റുകയും ചെയ്തിട്ടുണ്ട്.

​പ്രമേയം

ഒരു നായ്ക്കുട്ടിയും രണ്ട് കുട്ടികളും തമ്മിലുള്ള ആത്മബന്ധമാണ് ചിത്രത്തിന്റെ ഇതിവൃത്തം. നഗരത്തിലും ഗ്രാമത്തിലുമായി വളരുന്ന രണ്ട് കുട്ടികളുടെ ജീവിതത്തിലേക്ക് ഒരു നായ്ക്കുട്ടി കടന്നുവരുന്നതും തുടർന്നുണ്ടാകുന്ന സംഭവവികാസങ്ങളുമാണ് സിനിമ പങ്കുവെക്കുന്നത്. കുട്ടികളുടെ മാനസിക സംഘർഷങ്ങളും അവരുടെ നിഷ്കളങ്കതയും ഹൃദയസ്പർശിയായി സംവിധായകൻ വിനോദ് സാം പീറ്റർ ഈ ചിത്രത്തിലൂടെ അവതരിപ്പിക്കുന്നു.

​അണിയറപ്രവർത്തകർ

എബ്രഹാം ഫിലിംസിന്റെ ബാനറിൽ വിനോദ് സാം പീറ്ററാണ് ചിത്രം നിർമ്മിച്ചിരിക്കുന്നത്. സംവിധായകന് പുറമെ ചിത്രത്തിന്റെ സാങ്കേതിക മേഖലയിലും നിരവധി മലയാളികൾ പ്രവർത്തിച്ചിട്ടുണ്ട്. സന്തോഷ് ചന്ദ്രൻ (പശ്ചാത്തല സംഗീതം), ബെന്നി ജോൺസൺ (സംഗീതം), രാജേഷ് പീറ്ററാണ് (ക്യാമറ), സച്ചിൻകൃഷ്ണ, വിഷ്ണു കുമാർ (കോസ്റ്റ്യൂം) എന്നിവരാണ് അണിയറയിലെ മലയാളിക്കരുത്ത്. ഗണേഷ് ഷെൽക്കെ, പുനം ചന്ദോർക്കർ എന്നിവരാണ് പ്രധാന വേഷങ്ങളിൽ എത്തുന്നത്.