ചേലാകർമ്മത്തിലെ ചികിത്സാപ്പിഴവ് കുഞ്ഞിന് 50 ലക്ഷം രൂപ നഷ്ടപരിഹാരം നൽകാൻ ഉപഭോക്തൃ കമ്മീഷൻ വിധി
മലപ്പുറം പെരുമ്പടപ്പിലെ സ്വകാര്യ ആശുപത്രിയിലെ ചേലാകർമ്മത്തിനിടെയുണ്ടായ ഗുരുതര ചികിത്സാപ്പിഴവിനെത്തുടർന്ന് 23 ദിവസം പ്രായമായ കുഞ്ഞിന് 50 ലക്ഷം രൂപ നഷ്ടപരിഹാരം നൽകാൻ മലപ്പുറം ജില്ലാ ഉപഭോക്തൃ കമ്മീഷൻ ഉത്തരവിട്ടു.
അനില എം കൃഷ്ണൻ 
ചേലാകർമ്മത്തിലെ ചികിത്സാപ്പിഴവ്: സ്വകാര്യ ആശുപത്രിക്കും ഡോക്ടർക്കുമെതിരെ 50 ലക്ഷം രൂപ നഷ്ടപരിഹാരം ചുമത്തി ഉപഭോക്തൃ കമ്മീഷൻ
മലപ്പുറം: 23 ദിവസം മാത്രം പ്രായമായ കുഞ്ഞിന്റെ ചേലാകർമ്മത്തിൽ (പരിച്ഛേദനം) ഗുരുതരമായ വീഴ്ച വരുത്തിയ പെരുമ്പടപ്പിലെ സ്വകാര്യ ആശുപത്രിക്കും ഡോക്ടർക്കുമെതിരെ മലപ്പുറം ജില്ലാ ഉപഭോക്തൃ കമ്മീഷന്റെ ശക്തമായ നടപടി. ഇരയായ കുഞ്ഞിന് 50 ലക്ഷം രൂപ നഷ്ടപരിഹാരം നൽകാൻ കമ്മീഷൻ ഉത്തരവിട്ടു. കെ. മോഹൻദാസ് പ്രസിഡന്റും, പ്രീതി ശിവരാമൻ, മുഹമ്മദ് ഇസ്മായിൽ സി.വി. എന്നിവർ അംഗങ്ങളുമായ കമ്മീഷനാണ് ഈ നിർണായക വിധി പ്രസ്താവിച്ചത്.
2018 ഏപ്രിലിലായിരുന്നു കേസിനാസ്പദമായ സംഭവം നടന്നത്. ചേലാകർമ്മത്തിന് ശേഷം കുഞ്ഞിന് കടുത്ത അണുബാധയേൽക്കുകയും പഴുപ്പ് ബാധിക്കുകയും ചെയ്തു. തുടർന്ന് ഗുരുതരാവസ്ഥയിലായ കുഞ്ഞിനെ തൃശൂർ അമലാ ആശുപത്രിയിലും പിന്നീട് ജൂബിലി മിഷൻ ആശുപത്രിയിലും പ്രവേശിപ്പിച്ചു. രണ്ടാഴ്ചയോളം തീവ്രപരിചരണ വിഭാഗത്തിൽ (ICU) കഴിഞ്ഞ ശേഷമാണ് കുഞ്ഞിന്റെ ജീവൻ രക്ഷിക്കാനായത്. ഭാവിയിൽ കൂടുതൽ ശസ്ത്രക്രിയകൾ ആവശ്യമായി വരുമെന്ന നിർദ്ദേശത്തോടെയായിരുന്നു അന്ന് കുട്ടിയെ ഡിസ്ചാർജ് ചെയ്തത്.
സംഭവത്തെക്കുറിച്ച് ജില്ലാ മെഡിക്കൽ ഓഫീസറുടെ (DMO) നേതൃത്വത്തിലുള്ള വിദഗ്ധ സംഘവും ആരോഗ്യ വിജിലൻസും വിശദമായ അന്വേഷണം നടത്തിയിരുന്നു. ശസ്ത്രക്രിയ നടത്താൻ ആവശ്യമായ അടിസ്ഥാന സൗകര്യങ്ങൾ പെരുമ്പടപ്പിലെ ആശുപത്രിയിൽ ഉണ്ടായിരുന്നില്ലെന്നും, ഡോക്ടറുടെ പരിചയക്കുറവാണ് കുഞ്ഞിന് കടുത്ത അണുബാധയുണ്ടാകാൻ കാരണമായതെന്നും അന്വേഷണത്തിൽ വ്യക്തമായി. മുൻപ് സംസ്ഥാന മനുഷ്യാവകാശ കമ്മീഷൻ വിഷയത്തിൽ ഇടപെടുകയും താത്കാലിക ആശ്വാസമായി കുഞ്ഞിന് രണ്ട് ലക്ഷം രൂപ നൽകാൻ സർക്കാരിനോട് നിർദ്ദേശിക്കുകയും ചെയ്തിരുന്നു.
ആശുപത്രിയിലെ ശുചിത്വമില്ലായ്മയും മെഡിക്കൽ ഉപകരണങ്ങളുടെ അശാസ്ത്രീയമായ ഉപയോഗവും കാരണം കുട്ടിക്ക് ജീവിതകാലം മുഴുവൻ അനുഭവിക്കേണ്ടി വരുന്ന ശാരീരിക ബുദ്ധിമുട്ടുകൾ മുൻനിർത്തിയാണ് കമ്മീഷൻ ഇപ്പോൾ കടുത്ത നടപടി സ്വീകരിച്ചിരിക്കുന്നത്.
നഷ്ടപരിഹാര തുകയുടെ ഘടന ഇങ്ങനെ:
കുട്ടി അനുഭവിക്കുന്ന ശാരീരിക-മാനസിക ദുരന്തത്തിന് നഷ്ടപരിഹാരമായി: 25 ലക്ഷം രൂപ
ഭാവിയിലെ ശസ്ത്രക്രിയകൾക്കും ചികിത്സാ ചെലവുകൾക്കുമായി: 25 ലക്ഷം രൂപ
കോടതി ചെലവിലേക്ക്: 25,000 രൂപ
ഉത്തരവ് കൈപ്പറ്റി ഒരു മാസത്തിനകം ഈ തുക പരാതിക്കാർക്ക് നൽകണം. നിശ്ചിത സമയത്തിനകം തുക നൽകിയില്ലെങ്കിൽ, പരാതി നൽകിയ തീയതി മുതൽ ഒൻപതു ശതമാനം (9%) പലിശ സഹിതം തുക ഈടാക്കുമെന്നും ഉപഭോക്തൃ കമ്മീഷൻ വിധിന്യായത്തിൽ വ്യക്തമാക്കിയിട്ടുണ്ട്.
