25,000 രൂപ സമ്മാനം വിക്ടർ ജോർജ്ജ് സ്മരണാർത്ഥം മഴ പറഞ്ഞ കഥ ഫോട്ടോ മത്സരം എൻട്രികൾ ക്ഷണിക്കുന്നു

വിക്ടർ ജോർജ്ജ് സ്മരണയിൽ 'മഴ പറഞ്ഞ കഥ' അഖിലേന്ത്യാ ഫോട്ടോഗ്രഫി മത്സരം; രണ്ടാം പതിപ്പുമായി കോക്ക (COCA)

​കോഴിക്കോട്: മലയാള ഫോട്ടോഗ്രഫി ലോകത്ത് മഴച്ചിത്രങ്ങളിലൂടെ വിസ്മയം തീർക്കുകയും, വെണ്ണിയാനി മലയിലെ ഉരുൾപൊട്ടൽ ദൃശ്യങ്ങൾ പകർത്തുന്നതിനിടയിൽ പ്രകൃതിയോട് ലയിച്ചുചേരുകയും ചെയ്ത പ്രശസ്ത ഫോട്ടോഗ്രാഫർ വിക്ടർ ജോർജ്ജിന്റെ ഓർമ്മകൾക്ക് മുന്നിൽ പ്രണാമമർപ്പിച്ച് അഖിലേന്ത്യാ ഫോട്ടോ മത്സരം സംഘടിപ്പിക്കുന്നു. 'സെൻട്രൽ ഓർഗനൈസേഷൻ ഓഫ് ക്യാമറ ആർട്ടിസ്റ്റ്സ്' (COCA) കോഴിക്കോട് ജില്ലാ കമ്മിറ്റിയുടെ നേതൃത്വത്തിലാണ് മൂന്ന് വർഷത്തിലൊരിക്കൽ നടത്തുന്ന "മഴ പറഞ്ഞ കഥ" ഫോട്ടോഗ്രഫി മത്സരത്തിന്റെ രണ്ടാം പതിപ്പ് (Second Edition) പ്രഖ്യാപിച്ചത്. 2026 ജൂലൈ 9-ന് വിക്ടർ ജോർജ്ജ് ഓർമ്മയായിട്ട് 25 വർഷങ്ങൾ പൂർത്തിയാകുന്ന വേളയിലാണ് ഈ മത്സരം.

​മഹാരാഷ്ട്ര, ബംഗാൾ തുടങ്ങി ഇന്ത്യയിലെ വിവിധ സംസ്ഥാനങ്ങളിൽ നിന്നുള്ള ഫോട്ടോഗ്രാഫർമാരുടെ പങ്കാളിത്തം കൊണ്ട് ശ്രദ്ധേയമായ 2022-ലെ ആദ്യ എഡിഷന് ശേഷമാണ് ഇപ്പോൾ രണ്ടാം പതിപ്പ് ഒരുങ്ങുന്നത്. ആദ്യ മത്സരത്തിലെ മികച്ച ചിത്രങ്ങൾ ഉൾപ്പെടുത്തി കോഴിക്കോട് ലളിതകലാ അക്കാദമിയിൽ വിപുലമായ ചിത്രപ്രദർശനവും അവാർഡ് ദാന ചടങ്ങും സംഘടിപ്പിച്ചിരുന്നു.

​ദേശീയ അന്തർദ്ദേശീയ തലങ്ങളിൽ ശ്രദ്ധേയനായ മലയാള സിനിമയിലെ പ്രമുഖ സംവിധായകനും തിരക്കഥാകൃത്തുമായ പാമ്പള്ളിയാണ് മത്സരത്തിന്റെ ജൂറി ചെയർമാൻ. മികച്ച നവാഗത സംവിധായകനുള്ള ഇന്ദിരാഗാന്ധി അവാർഡും ജസാരി ഭാഷയിലെ മികച്ച ചിത്രത്തിനുള്ള ദേശീയ പുരസ്കാരവും 'സിൻജാർ' എന്ന ചിത്രത്തിലൂടെ സ്വന്തമാക്കിയ അദ്ദേഹം, 67-ാമത് ദേശീയ ചലച്ചിത്ര അവാർഡിൽ ജൂറി അംഗമായും 2021-ലെ ഓസ്കാർ അവാർഡിലേക്കുള്ള ഇന്ത്യൻ എൻട്രി സെലക്ഷൻ കമ്മിറ്റി അംഗമായും പ്രവർത്തിച്ചിട്ടുണ്ട്.

​മത്സര നിബന്ധനകളും സമ്മാനങ്ങളും:

മത്സരത്തിൽ ഒന്നാം സമ്മാനം നേടുന്നയാൾക്ക് 25,000 രൂപയും പ്രശസ്തി പത്രവും ലഭിക്കും. രണ്ടാം സമ്മാനമായി 10,000 രൂപയും പ്രശസ്തി പത്രവും, മൂന്നാം സമ്മാനമായി 5,000 രൂപയും പ്രശസ്തി പത്രവും നൽകുന്നതാണ്. 300 രൂപയാണ് എൻട്രി ഫീസായി നിശ്ചയിച്ചിരിക്കുന്നത്. ഒരാൾക്ക് രണ്ട് ഫോട്ടോകൾ വരെ അയക്കാം.

​മത്സരാർത്ഥി തന്നെ പകർത്തിയ ചിത്രങ്ങൾ ആയിരിക്കണം. ആർട്ടിഫിഷ്യൽ ഇന്റലിജൻസ് (AI) ഉപയോഗിച്ച് നിർമ്മിച്ച ചിത്രങ്ങളോ മറ്റുള്ളവരുടെ ചിത്രങ്ങളോ അനുവദിക്കില്ല. അടിസ്ഥാന ഫോട്ടോ എഡിറ്റിംഗ് (Brightness, Contrast, Crop) മാത്രമേ ചിത്രങ്ങളിൽ അനുവദിക്കുകയുള്ളൂ. ഫോട്ടോകൾ JPEG ഫോർമാറ്റിൽ മത്സരാർത്ഥിയുടെ പേര്, ഫോൺ നമ്പർ എന്നിവ സഹിതം mansooncontest2026@gmail.com എന്ന ഇമെയിൽ വിലാസത്തിലോ അല്ലെങ്കിൽ https://forms.gle/8MCcDEmpFpK3tGMr9 എന്ന ഗൂഗിൾ ഫോം ലിങ്ക് വഴിയോ അയക്കാവുന്നതാണ്. വിധികർത്താക്കളുടെ തീരുമാനം അന്തിമമായിരിക്കും.

​കൂടുതൽ വിവരങ്ങൾക്ക് ബന്ധപ്പെടേണ്ട ഫോൺ നമ്പറുകൾ: 9895989198, 9995606435, 9846777402, 7012806576.