വയനാട്ടിൽ രണ്ട് കുട്ടികൾക്ക് ഷിഗെല്ല സ്ഥിരീകരിച്ചു കളക്ടറുടെ നേതൃത്വത്തിൽ അടിയന്തര യോഗം, കടുത്ത ജാഗ്രത

വയനാട്ടിൽ രണ്ട് കുട്ടികൾക്ക് ഷിഗെല്ല സ്ഥിരീകരിച്ചു; കളക്ടറുടെ നേതൃത്വത്തിൽ അടിയന്തര യോഗം ചേർന്നു, ജാഗ്രതാ നിർദ്ദേശം

​കൽപ്പറ്റ: വയനാട് ജില്ലയിലെ ഒരു വിദ്യാലയത്തിൽ പഠിക്കുന്ന രണ്ട് കുട്ടികൾക്ക് ഷിഗെല്ല രോഗബാധ സ്ഥിരീകരിച്ചു. നാലര വയസ്സുള്ള ആൺകുട്ടിക്കും അഞ്ച് വയസ്സുള്ള പെൺകുട്ടിക്കുമാണ് രോഗം സ്ഥിരീകരിച്ചത്. നിലവിൽ ജില്ലയിൽ 339 പേർക്ക് രോഗലക്ഷണങ്ങൾ റിപ്പോർട്ട് ചെയ്തിട്ടുണ്ട്. ഇവരിൽ 21 പേർ സുൽത്താൻ ബത്തേരി താലൂക്ക് ആസ്ഥാന ആശുപത്രിയിലും, 38 പേർ വിവിധ സ്വകാര്യ ആശുപത്രികളിലും ചികിത്സയിലാണ്. ആരുടെയും ആരോഗ്യനില ഗുരുതരമല്ലെന്ന് ആരോഗ്യവകുപ്പ് അധികൃതർ അറിയിച്ചു. രോഗലക്ഷണങ്ങളോടെ ചികിത്സ തേടിയവരിൽ നിന്ന് 21 സാമ്പിളുകൾ പരിശോധനയ്ക്ക് അയച്ചതിൽ രണ്ട് എണ്ണത്തിന്റെ ഫലമാണ് പോസിറ്റീവായത്. അവശേഷിക്കുന്ന 19 സാമ്പിളുകളുടെ ഫലം വരാനുണ്ട്.

​രോഗബാധ സ്ഥിരീകരിച്ച സാഹചര്യത്തിൽ ജില്ലാ കളക്ടർ ഡി.ആർ. മേഘശ്രീയുടെ അധ്യക്ഷതയിൽ ജില്ലാതല ഉദ്യോഗസ്ഥരുടെ അടിയന്തര യോഗം ചേർന്ന് സ്ഥിതിഗതികൾ വിലയിരുത്തി. ജൂൺ അഞ്ചിന് രോഗലക്ഷണങ്ങളോടെ ചികിത്സ തേടിയ കുട്ടികളിൽ നിന്ന് ശേഖരിച്ച സാമ്പിളുകൾ കോഴിക്കോട് മെഡിക്കൽ കോളേജിൽ ആർ.ടി.പി.സി.ആർ പരിശോധനയ്ക്ക് അയച്ചാണ് രോഗം സ്ഥിരീകരിച്ചതെന്ന് ജില്ലാ മെഡിക്കൽ ഓഫീസർ ഡോ. കെ.ടി രേഖ യോഗത്തിൽ വ്യക്തമാക്കി. നിലവിൽ മറ്റുള്ളവരിലേക്ക് രോഗം പടരാതിരിക്കാനുള്ള പ്രതിരോധ നടപടികൾ യുദ്ധകാലാടിസ്ഥാനത്തിൽ ആരംഭിച്ചിട്ടുണ്ട്.

​പ്രതിരോധ പ്രവർത്തനങ്ങൾ ഊർജ്ജിതം

​രോഗലക്ഷണങ്ങളോടെ ചികിത്സയിലുള്ള കുട്ടികൾക്ക് നിലവിൽ ആന്റിബയോട്ടിക്കുകൾ ഉപയോഗിച്ചുള്ള ചികിത്സയാണ് നൽകുന്നത്. കുട്ടികൾ മരുന്നുകളോട് നന്നായി പ്രതികരിക്കുന്നുണ്ടെന്നും ആരോഗ്യം വീണ്ടെടുക്കുന്നുണ്ടെന്നും ഡി.എം.ഓ അറിയിച്ചു. ഷിഗെല്ല ബാക്ടീരിയയുടെ ഇൻക്യുബേഷൻ കാലയളവ് ഒന്നു മുതൽ നാല് ദിവസം വരെയായതിനാൽ, രോഗബാധയുണ്ടായ കോളിയാടി മാർ ബസേലിയോസ് എ.യു.പി സ്കൂളിലെ മറ്റ് കുട്ടികളെ വരും ദിവസങ്ങളിൽ നിരീക്ഷിക്കും. ഈ സ്കൂളിലെ വിദ്യാർത്ഥികളുടെ സഹോദരങ്ങൾ പഠിക്കുന്ന മറ്റ് വിദ്യാലയങ്ങളിലും നിരീക്ഷണം ശക്തമാക്കിയിട്ടുണ്ട്. ക്ലാസ് അധ്യാപകർ വഴി ഇവരുടെ വീടുകളുമായി ബന്ധപ്പെട്ട് ലക്ഷണങ്ങൾ നിരീക്ഷിച്ചു വരികയാണെന്ന് ജില്ലാ വിദ്യാഭ്യാസ ഓഫീസർ സി.വി. മൻമോഹൻ അറിയിച്ചു.

​രോഗം റിപ്പോർട്ട് ചെയ്ത സാഹചര്യത്തിൽ ജില്ലയിലെ മറ്റ് സ്കൂളുകളിലെ കിണറുകളിലെ വെള്ളം അടിയന്തരമായി പരിശോധനയ്ക്ക് അയക്കാൻ കളക്ടർ നിർദ്ദേശം നൽകി. സ്കൂളുകളിലെയും രോഗബാധിതരുടെ വീടുകളിലെയും കിണറുകൾ കൃത്യമായി ക്ലോറിനേറ്റ് ചെയ്യുന്നുണ്ടെന്ന് ഉറപ്പാക്കാൻ വിദ്യാഭ്യാസ-ആരോഗ്യ വകുപ്പുകളോട് ആവശ്യപ്പെട്ടിട്ടുണ്ട്. നിലവിലെ സാഹചര്യം നേരിടാൻ സുൽത്താൻ ബത്തേരി താലൂക്ക് ആശുപത്രി സജ്ജമാണെന്നും, ആവശ്യമെങ്കിൽ അടിയന്തരമായി പ്രത്യേക വാർഡ് സജ്ജമാക്കുമെന്നും ഡി.എം.ഓ അറിയിച്ചു. ചികിത്സയ്ക്ക് ആവശ്യമായ എല്ലാ മരുന്നുകളും നിലവിൽ സ്റ്റോക്കുണ്ട്.

​എന്താണ് ഷിഗെല്ല? ലക്ഷണം മനസ്സിലാക്കാം

​ഷിഗെല്ല എന്ന ബാക്ടീരിയ ശരീരത്തിൽ പ്രവേശിക്കുന്നത് മൂലം കുടലിലുണ്ടാകുന്ന ഒരിനം അണുബാധയാണിത്. മറ്റ് വയറിളക്ക രോഗങ്ങളെ അപേക്ഷിച്ച് വളരെ പെട്ടെന്ന് പടർന്നുപിടിക്കാൻ സാധ്യതയുള്ളതിനാൽ കടുത്ത ജാഗ്രത ആവശ്യമാണ്. ബാക്ടീരിയ ഉള്ളിൽ പ്രവേശിച്ച് ഒന്നോ രണ്ടോ ദിവസത്തിനകം ലക്ഷണങ്ങൾ പ്രകടമാകും. കടുത്ത പനിയോടുകൂടിയ വയറിളക്കം, മലത്തിൽ രക്തവും കഫവും കാണപ്പെടുക, കടുത്ത വയറുവേദന, വയറുകോച്ചിപ്പിടുത്തം, ഓക്കാനം, ഛർദ്ദി, കടുത്ത ക്ഷീണം എന്നിവയാണ് പ്രധാന ലക്ഷണങ്ങൾ. കുട്ടികളിലും വയോജനങ്ങളിലും ഉണ്ടാകുന്ന നിർജലീകരണം വലിയ അപകടസാധ്യതയാണ് സൃഷ്ടിക്കുന്നത്.

​പ്രധാന പ്രതിരോധ മാർഗ്ഗങ്ങൾ:

​ആഹാരം കഴിക്കുന്നതിന് മുൻപും മലവിസർജ്ജനത്തിന് ശേഷവും കൈകൾ സോപ്പുപയോഗിച്ച് നന്നായി കഴുകുക.

​തിളപ്പിച്ചാറ്റിയ വെള്ളം മാത്രം കുടിക്കാൻ ഉപയോഗിക്കുക. ഭക്ഷണപദാർത്ഥങ്ങൾ എപ്പോഴും അടച്ചുസൂക്ഷിക്കുക.

​പഴങ്ങളും പച്ചക്കറികളും ശുദ്ധജലത്തിൽ നന്നായി കഴുകിയ ശേഷം മാത്രം ഉപയോഗിക്കുക.

​തുറസ്സായ സ്ഥലങ്ങളിലെ മലവിസർജ്ജനം പൂർണ്ണമായും ഒഴിവാക്കുക, പരിസരശുചിത്വം ഉറപ്പാക്കുക.

​രോഗലക്ഷണങ്ങളുള്ളവർ ഉടൻ തന്നെ അടുത്തുള്ള ആരോഗ്യകേന്ദ്രത്തിൽ ചികിത്സ തേടുക.

​ജില്ലയിൽ ആരോഗ്യവകുപ്പിന്റെ നേതൃത്വത്തിൽ രോഗനിരീക്ഷണവും പകർച്ചവ്യാധി പ്രതിരോധപ്രവർത്തനങ്ങളും ഊർജ്ജിതമാക്കിയിട്ടുണ്ടെന്നും പൊതുജനങ്ങൾ പരിഭ്രാന്തരാകേണ്ടതില്ലെന്നും ജില്ലാ കളക്ടറും ഡി.എം.ഓയും അറിയിച്ചു. അടിയന്തര യോഗത്തിൽ സബ് കളക്ടർ അതുൽ സാഗർ, ജില്ലാ പോലീസ് മേധാവി അരുൺ പവിത്രൻ, എ.ഡി.എം എ. ജയശ്രീ, ഡെപ്യൂട്ടി കളക്ടർമാർ, തഹസിൽദാർമാർ എന്നിവർ പങ്കെടുത്തു