കായകൽപ്പം ജനസമ്പർക്ക പരിപാടിക്ക് തുടക്കം വിർച്വൽ ഓട്ടോപ്സി നടപ്പാക്കുമെന്ന് മന്ത്രി കെ. മുരളീധരൻ
കേരളത്തിലെ സർക്കാർ ആശുപത്രികളുടെ നവീകരണത്തിന് സി.എസ്.ആർ (CSR) ഫണ്ടുകൾ വിനിയോഗിക്കുമെന്നും വിർച്വൽ ഓട്ടോപ്സി സംവിധാനം നടപ്പാക്കുമെന്നും ആരോഗ്യ മന്ത്രി കെ മുരളീധരൻ. കായകൽപ്പം ജനസമ്പർക്ക പരിപാടി കോഴിക്കോട്ട് ഉദ്ഘാടനം ചെയ്യുകയായിരുന്നു അദ്ദേഹം.
Angel Varghese 
ആശുപത്രി നവീകരണത്തിന് സി.എസ്.ആർ ഫണ്ടുകൾ ഉപയോഗിക്കും; വിർച്വൽ ഓട്ടോപ്സി നടപ്പാക്കുമെന്നും മന്ത്രി കെ. മുരളീധരൻ
കോഴിക്കോട്: സംസ്ഥാനത്തെ സർക്കാർ ആശുപത്രികളുടെ നവീകരണത്തിനായി കോർപ്പറേറ്റ് സാമൂഹിക ഉത്തരവാദിത്ത (CSR) ഫണ്ടുകൾ ഉൾപ്പെടെ പരമാവധി വിനിയോഗിക്കുമെന്ന് ആരോഗ്യ മന്ത്രി കെ. മുരളീധരൻ. ആരോഗ്യമേഖലയിലെ വെല്ലുവിളികൾ നേരിട്ട് മനസ്സിലാക്കി പരിഹരിക്കുന്നതിനായി സംഘടിപ്പിച്ച 'കായകൽപ്പം' ജനസമ്പർക്ക പരിപാടിയുടെ സംസ്ഥാനതല ഉദ്ഘാടനം കോഴിക്കോട്ട് നിർവഹിച്ചു സംസാരിക്കുകയായിരുന്നു അദ്ദേഹം. ആശുപത്രികളെ സഹായിക്കാൻ മുന്നോട്ടുവരുന്ന സ്ഥാപനങ്ങളെ സർക്കാർ പ്രോത്സാഹിപ്പിക്കുമെന്നും ഇതിനെ സ്വകാര്യവൽക്കരണമായി തെറ്റിദ്ധരിപ്പിക്കാൻ ശ്രമിക്കരുതെന്നും മന്ത്രി വ്യക്തമാക്കി.
ആരോഗ്യവകുപ്പിലെ കെട്ടിടങ്ങൾ, ഉപകരണങ്ങൾ, ഡോക്ടർമാർ ഉൾപ്പെടെയുള്ള ജീവനക്കാരുടെ കുറവ് എന്നിവ പരിശോധിച്ച് അടിയന്തര പരിഹാരം കാണും. രോഗികളെ നിലത്ത് കിടത്തുന്ന സാഹചര്യം ഒഴിവാക്കും. കുടിശ്ശിക കാരണം കമ്പനികൾ ജീവൻരക്ഷാ ഉപകരണങ്ങളുടെ വിതരണം നിർത്തിവെച്ചതും മരുന്നുക്ഷാമത്തിന് കാരണമായതും പരിശോധിക്കും. പ്രാഥമികാരോഗ്യ കേന്ദ്രങ്ങൾ മുതൽ ജില്ലാ ആശുപത്രികൾ വരെയുള്ളവ കാര്യക്ഷമമായാൽ മാത്രമേ മെഡിക്കൽ കോളേജുകളിലെ തിരക്കും പ്രതിസന്ധിയും കുറയൂ. ഇതിനായി എം.പി, എം.എൽ.എ ഫണ്ടുകൾക്ക് ആരോഗ്യമേഖലയിൽ മുൻഗണന നൽകണം.
ചികിത്സാപ്പിഴവുകൾ ഉണ്ടാകുമ്പോൾ കൃത്യമായ അന്വേഷണ റിപ്പോർട്ടുകളുടെ അടിസ്ഥാനത്തിൽ മാത്രമേ നടപടിയെടുക്കൂ എന്ന് മന്ത്രി ഉറപ്പുനൽകി. കിഫ്ബി പദ്ധതികളിൽ പൂർത്തിയാക്കാനുള്ളവ വേഗത്തിൽ തീർക്കും. ശരീരം കീറിമുറിക്കാതെ പോസ്റ്റ്മോർട്ടം നടത്തുന്ന 'വിർച്വൽ ഓട്ടോപ്സി' സംവിധാനം നടപ്പാക്കണമെന്ന ഷാഫി പറമ്പിൽ എം.പി.യുടെ ആവശ്യത്തോട് പ്രതികരിച്ച മന്ത്രി, പദ്ധതി ഉടൻ യാഥാർത്ഥ്യമാക്കുമെന്നും പ്രഖ്യാപിച്ചു.
കോഴിക്കോട് വെള്ളയിൽ മീനൂസ് ഓഡിറ്റോറിയത്തിൽ നടന്ന ചടങ്ങിൽ അഡ്വ. കെ. ജയന്ത് എം.എൽ.എ അധ്യക്ഷത വഹിച്ചു. ഷാഫി പറമ്പിൽ എം.പി, ജനപ്രതിനിധികൾ, ആരോഗ്യവകുപ്പ് ഉദ്യോഗസ്ഥർ എന്നിവർ പങ്കെടുത്തു. മണ്ഡലാടിസ്ഥാനത്തിൽ നടന്ന ചർച്ചകളിൽ ആശുപത്രികളുടെ ഫിറ്റ്നസ്, സ്പെഷ്യാലിറ്റി ഡോക്ടർമാരുടെ നിയമനം, പുതിയ തസ്തികകൾ സൃഷ്ടിക്കൽ തുടങ്ങിയ വിഷയങ്ങൾ ഉന്നയിക്കപ്പെട്ടു. പൊതുജനങ്ങളിൽ നിന്നും ജനപ്രതിനിധികളിൽ നിന്നും മന്ത്രി നേരിട്ട് പരാതികൾ സ്വീകരിച്ചു.
