നിപ പ്രതിരോധം ഊർജ്ജിതം;മന്ത്രി എ.പി. അനിൽകുമാറിന്റെ നേതൃത്വത്തിൽ അടിയന്തര അവലോകന യോഗം ചേർന്നു
ജില്ലയിലെ നിപ രോഗബാധയുമായി ബന്ധപ്പെട്ട് റവന്യൂ മന്ത്രി എ.പി. അനിൽകുമാറിന്റെ നേതൃത്വത്തിൽ അടിയന്തര അവലോകന യോഗം ചേർന്നു. രോഗിയുടെ അടുത്ത ബന്ധുക്കളുടെ പരിശോധനാ ഫലം നെഗറ്റീവാണെന്ന് കലക്ടർ അറിയിച്ചു.
Mathew P M 
നിപ പ്രതിരോധം: മന്ത്രി എ.പി. അനിൽകുമാറിന്റെ നേതൃത്വത്തിൽ അവലോകന യോഗം ചേർന്നു; ആശങ്കപ്പെടേണ്ട സാഹചര്യമില്ലെന്ന് കലക്ടർ
കോഴിക്കോട്: ജില്ലയിൽ നിപ രോഗബാധ റിപ്പോർട്ട് ചെയ്ത സാഹചര്യത്തിൽ പ്രതിരോധ പ്രവർത്തനങ്ങൾ ഊർജ്ജിതമാക്കി അധികൃതർ. റവന്യൂ മന്ത്രി എ.പി. അനിൽകുമാറിന്റെ നേതൃത്വത്തിൽ ജില്ലാ കലക്ടറുടെ ചേംബറിൽ അടിയന്തര അവലോകന യോഗം ചേർന്നു. രോഗബാധിതന്റെയും അദ്ദേഹവുമായി സമ്പർക്കത്തിൽ ഏർപ്പെട്ടവരുടെയും നിലവിലെ വിവരങ്ങൾ മന്ത്രി യോഗത്തിൽ ചോദിച്ചറിഞ്ഞു. സമ്പർക്കപ്പട്ടികയിലുള്ളവർക്ക് ആവശ്യമായ എല്ലാ മെഡിക്കൽ സഹായങ്ങളും സുരക്ഷാ സംവിധാനങ്ങളും ഉറപ്പാക്കാൻ മന്ത്രി ഉദ്യോഗസ്ഥർക്ക് കർശന നിർദേശം നൽകി.
ആവശ്യമായ മെഡിക്കൽ ഉപകരണങ്ങൾ, മരുന്നുകൾ എന്നിവയുടെ ലഭ്യതയും യോഗം വിലയിരുത്തി. മുൻപ് ജില്ലയിൽ നിപ ബാധയുണ്ടായപ്പോൾ വിജയകരമായി നടപ്പാക്കിയ പ്രതിരോധ മാതൃകകളും മുൻകരുതലുകളും അതേപടി തുടരണമെന്ന് മന്ത്രി നിർദേശിച്ചു. ജില്ലയിൽ സന്ദർശനത്തിനെത്തിയ ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ICMR) സംഘവുമായും മന്ത്രി കൂടിക്കാഴ്ച നടത്തി സ്ഥിതിഗതികൾ ചർച്ച ചെയ്തു.
ബന്ധുക്കളുടെ പരിശോധനാ ഫലം നെഗറ്റീവ്
നിപ പ്രോട്ടോക്കോൾ പ്രകാരം കൃത്യമായ പ്രതിരോധ നടപടികളാണ് ജില്ലയിൽ പുരോഗമിക്കുന്നതെന്ന് ജില്ലാ കലക്ടർ എം.എസ്. മാധവിക്കുട്ടി യോഗത്തിൽ അറിയിച്ചു. രോഗബാധിതന്റെ അടുത്ത ബന്ധുക്കളായ മൂന്ന് പേരുടെ സ്രവ പരിശോധന നടത്തിയതായും, ഇവർക്ക് രോഗബാധയില്ലെന്ന് സ്ഥിരീകരിച്ചതായും കലക്ടർ വ്യക്തമാക്കി. രോഗബാധ സ്ഥിരീകരിച്ച പ്രദേശങ്ങളിലെ വീടുകൾ ആരോഗ്യപ്രവർത്തകർ നേരിട്ട് സന്ദർശിച്ച് വിവരങ്ങൾ ശേഖരിക്കുകയും ബോധവൽക്കരണം നടത്തുകയും ചെയ്യുന്നുണ്ട്. നിലവിൽ ആശങ്കപ്പെടേണ്ട സാഹചര്യമില്ലെന്നും പ്രതിരോധ സംവിധാനങ്ങൾ സജ്ജമാണെന്നും കലക്ടർ അറിയിച്ചു.
അവലോകന യോഗത്തിൽ എ.ഡി.എം പി. അഖിൽ, പബ്ലിക് ഹെൽത്ത് അഡീഷണൽ ഡയറക്ടർ ഡോ. കെ.പി. റീത്ത, ഡി.എം.ഒ ഡോ. വി.പി. രാജേഷ്, മെഡിക്കൽ കോളേജ് പ്രിൻസിപ്പൽ ഡോ. സജീത്ത് കുമാർ, വൺ ഹെൽത്ത് സെന്റർ നോഡൽ ഓഫീസർ ഡോ. നവീൻ എന്നിവരും വിവിധ വകുപ്പുകളിലെ ഉന്നത ഉദ്യോഗസ്ഥരും പങ്കെടുത്തു.
