കൊട്ടിയൂരിൽ അടുത്ത വർഷം 150 ശുചിമുറികൾ കൂടി നിർമ്മിക്കും അവലോകന യോഗം ചേർന്നു
കൊട്ടിയൂർ വൈശാഖ മഹോത്സവത്തോടനുബന്ധിച്ച് തീർത്ഥാടകർക്കായി അടുത്ത വർഷം 150 ശുചിമുറികളും മൂന്ന് കുഴൽ കിണറുകളും നിർമ്മിക്കുമെന്ന് ദേവസ്വം അറിയിച്ചു.
Rajeev 
കൊട്ടിയൂർ വൈശാഖ മഹോത്സവം: അടുത്ത വർഷം 150 ശുചിമുറികൾ കൂടി നിർമ്മിക്കും
കൊട്ടിയൂർ: അടുത്ത വർഷത്തെ വൈശാഖ മഹോത്സവത്തോടനുബന്ധിച്ച് തീർത്ഥാടകർക്കായി 150 ശുചിമുറികൾ കൂടി നിർമ്മിക്കുമെന്ന് കൊട്ടിയൂർ ദേവസ്വം എക്സിക്യൂട്ടീവ് ഓഫീസർ കെ. ഗോകുൽ അറിയിച്ചു. കലക്ടറേറ്റിൽ ചേർന്ന കൊട്ടിയൂർ വൈശാഖ മഹോത്സവത്തിന്റെ പ്രതിമാസ അവലോകനയോഗത്തിലാണ് അദ്ദേഹം ഇക്കാര്യം വ്യക്തമാക്കിയത്.
തീർത്ഥാടകരുടെ സൗകര്യാർത്ഥം ശുചിമുറി നിർമ്മാണത്തിന് പുറമെ, കുടിവെള്ള ലഭ്യത ഉറപ്പാക്കുന്നതിനായി അടുത്ത വർഷം മൂന്ന് കുഴൽ കിണറുകൾ കൂടി കുഴിക്കാനും തീരുമാനിച്ചിട്ടുണ്ട്.
ഈ വർഷത്തെ ഉത്സവ സീസൺ വളരെ ഭംഗിയായാണ് നടന്നതെന്ന് യോഗത്തിൽ പങ്കെടുത്ത ജില്ലാ പഞ്ചായത്ത് പ്രസിഡന്റ് ബിനോയ് കുര്യൻ വിലയിരുത്തി. മാലിന്യസംസ്കരണം, ഗതാഗതം, പാർക്കിംഗ് തുടങ്ങിയ പ്രധാന വിഷയങ്ങളിൽ ഇത്തവണ വലിയ പരാതികൾ ഒന്നും തന്നെ ഉണ്ടായില്ലെന്ന് യോഗത്തിൽ അധ്യക്ഷത വഹിച്ച ജില്ലാ കലക്ടർ പി. വിഷ്ണുരാജ് വ്യക്തമാക്കി. ഇതര സംസ്ഥാനങ്ങളിൽ നിന്ന് എത്തുന്ന തീർത്ഥാടകർ പുഴയിൽ തുണി ഉപേക്ഷിക്കുന്ന പ്രവണത കൃത്യമായ ബോധവൽക്കരണത്തിലൂടെ തടയാൻ കഴിഞ്ഞത് നേട്ടമായി.
വരും വർഷങ്ങളിൽ കൂടുതൽ തീർത്ഥാടകർ എത്താൻ സാധ്യതയുള്ളതിനാൽ, പ്രദേശവാസികൾ ഹോംസ്റ്റേ മാതൃകകൾ നടപ്പിലാക്കുന്നത് മികച്ച വരുമാനമാർഗമായി മാറുമെന്ന് ജില്ലാ പഞ്ചായത്ത് പ്രസിഡന്റ് ചൂണ്ടിക്കാട്ടി. പേരാവൂർ ബ്ലോക്ക് പരിധിയിലുള്ള ഗ്രാമപഞ്ചായത്തുകളിൽ നിന്നും ഹരിതകർമ്മ സേന അംഗങ്ങളെ ശുചീകരണ പ്രവർത്തനങ്ങൾക്കായി വിനിയോഗിക്കും. ഇവരുടെ പട്ടിക ഉത്സവം തുടങ്ങുന്നതിന് ഒരു മാസം മുമ്പ് തന്നെ കൈമാറാൻ നിർദ്ദേശം നൽകിയിട്ടുണ്ട്.
റോഡിന്റെ വശങ്ങൾ വൃത്തിയാക്കൽ, കുടിവെള്ള വിതരണത്തിനായുള്ള പൈപ്പിടൽ തുടങ്ങിയ പ്രവൃത്തികൾ ഉത്സവ സീസൺ ആരംഭിക്കുന്നതിന് മുമ്പ് പൂർത്തിയാക്കണം. റോഡുകളുടെ വീതി കൂട്ടി വൈദ്യുതി പോസ്റ്റുകൾ മാറ്റിയാൽ ഗതാഗത തടസ്സങ്ങൾക്ക് ശാശ്വത പരിഹാരം കാണാനാകും. കുടിവെള്ള ശുദ്ധീകരണത്തിനായി കേന്ദ്രീകൃത സംവിധാനം നടപ്പാക്കാൻ സാധിക്കുമോ എന്ന് പരിശോധിക്കാൻ ജല അതോറിറ്റിയോട് ജില്ലാ കളക്ടർ നിർദ്ദേശിച്ചു.
യോഗത്തിൽ പേരാവൂർ ബ്ലോക്ക് പഞ്ചായത്ത് പ്രസിഡന്റ് ഇന്ദിര ശ്രീധരൻ, തലശ്ശേരി സബ് കളക്ടർ ഇൻ-ചാർജ് സി.വി പ്രകാശൻ, ഇരിട്ടി തഹസിൽദാർ എൻ. സീമ, ഹുസൂർ ശിരസ്തദാർ രാജേഷ് ഖന്ന എന്നിവർക്കൊപ്പം വിവിധ വകുപ്പുകളിലെ ഉദ്യോഗസ്ഥരും സംബന്ധിച്ചു.
