വയലൻസിനപ്പുറം മനോഹരമായ അമ്മ മകൻ ബന്ധം നാനി ചിത്രം ദ പാരഡൈസ് സെപ്റ്റംബർ 24 ന് റിലീസ്
ശ്രീകാന്ത് ഒഡേല സംവിധാനം ചെയ്യുന്ന നാനി ചിത്രം ദ പാരഡൈസ് സെപ്റ്റംബർ 24 ന് തിയേറ്ററുകളിലെത്തും. ട്രെയിലർ ഇല്ലാതെ എത്തുന്ന ചിത്രം വൈകാരികമായ അമ്മ മകൻ ബന്ധത്തിന്റെ കഥയാണെന്ന് അണിയറപ്രവർത്തകർ വ്യക്തമാക്കുന്നു.
Sabari 
'ദ പാരഡൈസ്' വയലൻസിനപ്പുറം മനോഹരമായ അമ്മ-മകൻ ബന്ധത്തിന്റെ കഥ; ചിത്രം സെപ്റ്റംബർ 24-ന് തിയേറ്ററുകളിൽ
തെലുങ്ക് സൂപ്പർ താരം നാനിയെ നായകനാക്കി ശ്രീകാന്ത് ഒഡേല സംവിധാനം ചെയ്യുന്ന പാൻ ഇന്ത്യൻ ചിത്രം ‘ദ പാരഡൈസ്’ സെപ്റ്റംബർ 24-ന് ആഗോള റിലീസായി തിയേറ്ററുകളിലെത്തും. മുൻപ് റിലീസ് തീയതി രണ്ട് തവണ മാറ്റിവെക്കേണ്ടി വന്നെങ്കിലും ഇനിയൊരു കാലതാമസം ഉണ്ടാകില്ലെന്നും നിശ്ചയിച്ച തീയതിയിൽ തന്നെ ചിത്രം പ്രേക്ഷകരിലേക്ക് എത്തിക്കാൻ ടീം 24/7 പ്രവർത്തിക്കുകയാണെന്നും അണിയറപ്രവർത്തകർ വ്യക്തമാക്കി.
ടീസർ കണ്ട പലരും ചിത്രം വയലൻസ് നിറഞ്ഞതാണെന്ന് കരുതുന്നുണ്ടെങ്കിലും, യഥാർത്ഥത്തിൽ ‘ദ പാരഡൈസ്’ മനോഹരമായ ഒരു അമ്മ-മകൻ ബന്ധത്തിന്റെ കഥയാണെന്ന് നാനി മാധ്യമങ്ങളോട് പറഞ്ഞു. വയലൻസിനേക്കാൾ അതിന് പിന്നിലെ വൈകാരികതയ്ക്കാണ് പ്രാധാന്യമെന്നും, തന്റെ കരിയറിൽ ശാരീരികമായും മാനസികമായും ഏറ്റവും ക്ഷീണിപ്പിച്ച ചിത്രമാണിതെന്നും താരം കൂട്ടിച്ചേർത്തു. 'ജദാൽ' എന്ന കഥാപാത്രത്തെയാണ് നാനി ചിത്രത്തിൽ അവതരിപ്പിക്കുന്നത്.
ഒരു വിപ്ലവാത്മകമായ വൈകാരിക ചിത്രമാണ് ‘ദ പാരഡൈസ്’ എന്ന് സംവിധായകൻ ശ്രീകാന്ത് ഒഡേല വ്യക്തമാക്കി. അമ്മയും മകനും തമ്മിലുള്ള ബന്ധത്തിനൊപ്പം പാർശ്വവൽക്കരിക്കപ്പെട്ട ഒരു സമൂഹത്തിന്റെ കഥയും പോരാട്ടവുമാണ് ചിത്രം സംസാരിക്കുന്നത്. 2 മണിക്കൂർ 49 മിനിറ്റ് ദൈർഘ്യമുള്ള ചിത്രത്തിന് പ്രത്യേകമായി ട്രെയിലർ പുറത്തിറക്കില്ലെന്നും അണിയറപ്രവർത്തകർ അറിയിച്ചു. ചിത്രം മുൻകൂട്ടി വെളിപ്പെടുത്താതെ നേരിട്ട് തിയേറ്ററിൽ അനുഭവിക്കുന്നതാണ് ഉചിതമെന്ന നിലപാടിലാണ് ഇവർ.
‘ദസറ’ എന്ന ഹിറ്റ് ചിത്രത്തിന് ശേഷം നാനി, സംവിധായകൻ ശ്രീകാന്ത് ഒഡേല, നിർമ്മാതാവ് സുധാകർ ചെറുകുറി (എസ്എൽവി സിനിമാസ്) എന്നിവർ വീണ്ടും ഒന്നിക്കുന്ന ചിത്രമാണിത്. ബോളിവുഡ് താരം രാഘവ് ജൂയൽ വിക്രം മാലിക് എന്ന വില്ലൻ കഥാപാത്രത്തെ അവതരിപ്പിക്കുന്നു. കൂടാതെ മോഹൻ ബാബു, സമ്പൂർണേഷ് ബാബു, സോണാലി കുൽക്കർണി, ഈശ്വരി റാവു, രാജ രവീന്ദ്ര, തനികേല ഭരണി തുടങ്ങിയവരും പ്രധാന വേഷങ്ങളിലുണ്ട്.
അനിരുദ്ധ് രവിചന്ദറാണ് ചിത്രത്തിന് സംഗീതം നൽകുന്നത്. നാനിയും അനിരുദ്ധും ഒന്നിക്കുന്ന മൂന്നാമത്തെ ചിത്രമാണിത്. സി എച്ച് സായ് ഛായാഗ്രഹണവും നവീൻ നൂലി എഡിറ്റിംഗും നിർവ്വഹിക്കുന്നു. തെലുങ്ക്, കന്നഡ, മലയാളം, തമിഴ്, ഹിന്ദി, ബംഗാളി, ഇംഗ്ലീഷ്, സ്പാനിഷ് എന്നീ 8 ഭാഷകളിലാണ് ചിത്രം ആഗോളതലത്തിൽ പ്രദർശനത്തിനെത്തുന്നത്.
