എറണാകുളത്ത് മോട്ടോർ വാഹന വകുപ്പിന്റെ മിന്നൽ പരിശോധന 65 വാഹനങ്ങൾ കുടുങ്ങി, 21.48 ലക്ഷം രൂപ പിഴ
എറണാകുളം ജില്ലയിൽ മോട്ടോർ വാഹന വകുപ്പ് എൻഫോഴ്സ്മെന്റ് വിഭാഗം നടത്തിയ പരിശോധനയിൽ അമിതഭാരം കയറ്റിയ 65 വാഹനങ്ങളിൽ നിന്നായി 21.48 ലക്ഷം രൂപ പിഴ ഈടാക്കി. മൂന്ന് ടിപ്പർ വാഹനങ്ങളുടെ ഫിറ്റ്നസ് റദ്ദാക്കി.
അനില എം കൃഷ്ണൻ 
എറണാകുളത്ത് അമിതഭാരം കയറ്റിയ 65 വാഹനങ്ങൾക്കെതിരെ നടപടി; 21.48 ലക്ഷം രൂപ പിഴ ഈടാക്കി
കൊച്ചി: ജില്ലയിൽ അമിതഭാരം കയറ്റി സർവീസ് നടത്തിയ 65 ചരക്കുവാഹനങ്ങൾക്കെതിരെ മോട്ടോർ വാഹന വകുപ്പ് എൻഫോഴ്സ്മെന്റ് വിഭാഗം ശക്തമായ നടപടി സ്വീകരിച്ചു. വിവിധ കേസുകളിലായി ആകെ 21,48,500 രൂപയാണ് പിഴ ഈടാക്കിയത്. പരിശോധനയിൽ റോഡ് സർവീസിന് യോഗ്യമല്ലെന്ന് കണ്ടെത്തിയ മൂന്ന് ടിപ്പർ വാഹനങ്ങളുടെ ഫിറ്റ്നസ് സർട്ടിഫിക്കറ്റ് റദ്ദാക്കിയതായും എറണാകുളം ആർ.ടി.ഒ (എൻഫോഴ്സ്മെന്റ്) അറിയിച്ചു.
റോഡ് സുരക്ഷ ഉറപ്പാക്കുന്നതിനും വാഹനാപകടങ്ങൾ കുറയ്ക്കുന്നതിനും ഒപ്പം പൊതുമരാമത്ത് റോഡുകളുടെയും പാലങ്ങളുടെയും സംരക്ഷണം ലക്ഷ്യമിട്ടാണ് പരിശോധന ശക്തമാക്കിയത്. കഴിഞ്ഞ ഏതാനും ആഴ്ചകളായി ജില്ലയിലെ പ്രധാന പാതകളിൽ രാപ്പകൽ വ്യത്യാസമില്ലാതെ എൻഫോഴ്സ്മെന്റ് സ്ക്വാഡുകൾ പരിശോധന നടത്തിവരികയായിരുന്നു. ആർ.ടി.ഒയുടെ പ്രത്യേക നിർദ്ദേശപ്രകാരം മൂന്ന് സ്ക്വാഡുകളാണ് ഈ പരിശോധനകൾക്ക് നേതൃത്വം നൽകിയത്.
അപകടസാധ്യതയും നിയമനടപടികളും:
അമിതഭാരം കയറ്റുന്നത് വാഹനങ്ങളുടെ ബ്രേക്കിംഗ് സംവിധാനത്തെയും നിയന്ത്രണശേഷിയെയും ഗുരുതരമായി ബാധിക്കുമെന്ന് ഉദ്യോഗസ്ഥർ വ്യക്തമാക്കി. ഇത് വലിയ അപകടങ്ങൾക്കും റോഡുകളുടെ തകർച്ചയ്ക്കും കാരണമാകും. അതിനാൽ വാഹന ഉടമകളും ഡ്രൈവർമാരും അനുവദനീയമായ ഭാരപരിധി കർശനമായി പാലിക്കണമെന്ന് അധികൃതർ ആവശ്യപ്പെട്ടു.
സെൻട്രൽ മോട്ടോർ വെഹിക്കിൾസ് റൂൾസ് ചട്ടം 167 പ്രകാരം, ഓവർലോഡ് കണ്ടെത്തുന്ന വാഹനങ്ങളെ കറുത്ത പട്ടികയിൽ (Blacklist) ഉൾപ്പെടുത്തും. ഇത്തരം വാഹനങ്ങൾക്ക് നികുതി സംബന്ധമായ സേവനങ്ങൾ ഒഴികെ മറ്റ് മോട്ടോർ വാഹന വകുപ്പ് സേവനങ്ങൾ ഒന്നും തന്നെ ലഭ്യമാകില്ല. നിയമലംഘനം ആവർത്തിക്കുന്നവർക്കെതിരെ വരും ദിവസങ്ങളിൽ കൂടുതൽ കർശനമായ നിയമനടപടികൾ സ്വീകരിക്കും. സുരക്ഷിതമായ ചരക്ക് ഗതാഗതം ഉറപ്പാക്കാൻ ജില്ലയിൽ യാതൊരു വിട്ടുവീഴ്ചയുമില്ലാതെ പരിശോധനകൾ തുടരുമെന്ന് ആർ.ടി.ഒ .വ്യക്തമാക്കി
