​72 ാമത് നെഹ്‌റു ട്രോഫി വള്ളംകളി ആഗസ്റ്റ് 22 ന് 6 കോടി രൂപയുടെ ബജറ്റ് പാസാക്കി

​72-ാമത് നെഹ്‌റു ട്രോഫി വള്ളംകളി ആഗസ്റ്റ് 22-ന്; 6 കോടി രൂപയുടെ ബജറ്റ് പാസാക്കി

ആലപ്പുഴ: ലോകപ്രശസ്തമായ 72-ാമത് നെഹ്‌റു ട്രോഫി വള്ളംകളി (NTBR 2026) മുൻനിശ്ചയിച്ച പ്രകാരം ഈ വർഷം ആഗസ്റ്റ് 22-ന് തന്നെ നടത്താൻ തീരുമാനിച്ചു. എം.പിമാരായ കെ.സി. വേണുഗോപാൽ, കൊടിക്കുന്നിൽ സുരേഷ് എന്നിവരുടെ സാന്നിധ്യത്തിൽ കളക്ടറേറ്റ് കോൺഫറൻസ് ഹാളിൽ ചേർന്ന നെഹ്‌റു ട്രോഫി ബോട്ട് റേസ് സൊസൈറ്റിയുടെ (NTBRS) ഈ വർഷത്തെ ആദ്യ ജനറൽ ബോഡി യോഗത്തിലാണ് ഈ പ്രഖ്യാപനം. സൊസൈറ്റി ചെയർമാനും ജില്ലാ കളക്ടറുമായ ഷാജി വി. നായർ യോഗത്തിൽ അധ്യക്ഷത വഹിച്ചു.

​നെഹ്‌റു ട്രോഫി വള്ളംകളി പണ്ഡിറ്റ് ജവഹർലാൽ നെഹ്‌റുവുമായുള്ള വൈകാരിക ബന്ധം മുൻനിർത്തി ആഗസ്റ്റ് മാസത്തിലെ രണ്ടാം ശനിയാഴ്ച നടത്തുന്നതാണ് ഉചിതമെന്ന് കെ.സി. വേണുഗോപാൽ എം.പി അഭിപ്രായപ്പെട്ടു. എന്നാൽ, തീയതി നേരത്തെ പ്രഖ്യാപിച്ചതിനാൽ വള്ളസമിതികളും ക്ലബുകളും മാസങ്ങൾക്കു മുൻപേ തന്നെ തയ്യാറെടുപ്പുകൾ തുടങ്ങിയ സാഹചര്യത്തിൽ, അവർക്ക് പ്രായോഗിക ബുദ്ധിമുട്ടുകൾ ഉണ്ടാകാതിരിക്കാനാണ് ആഗസ്റ്റ് 22-ന് തന്നെ മേളയുമായി മുന്നോട്ട് പോകാൻ തീരുമാനിച്ചതെന്നും അദ്ദേഹം വ്യക്തമാക്കി. ആലപ്പുഴയുടെ പൈതൃകമായ ജലോത്സവം വൻ വിജയമാക്കാൻ ഉദ്യോഗസ്ഥരും സൊസൈറ്റിയും ഒത്തൊരുമിച്ച് പ്രവർത്തിക്കണമെന്ന് കൊടിക്കുന്നിൽ സുരേഷ് എം.പി ആഹ്വാനം ചെയ്തു.

​6.04 കോടിയുടെ ബജറ്റ് പാസാക്കി

ഈ വർഷത്തെ ജലമേളയ്ക്കായി 6,04,70,000 രൂപയുടെ ബജറ്റ് യോഗം അംഗീകരിച്ചു. 3.5 കോടി രൂപ സ്പോൺസർഷിപ്പിലൂടെ കണ്ടെത്താനാണ് ലക്ഷ്യമിടുന്നത്. കൂടാതെ സംസ്ഥാന ടൂറിസം ഗ്രാന്റായി ഒരു കോടി രൂപയും, കേന്ദ്ര ടൂറിസം ഗ്രാന്റായി 50 ലക്ഷം രൂപയും പ്രതീക്ഷിക്കുന്നുണ്ട്. ടിക്കറ്റ് വിൽപനയിലൂടെ 90 ലക്ഷം രൂപയും ആങ്കറിങ് ചാർജ് ഇനത്തിൽ 10 ലക്ഷം രൂപയും വരുമാനം ലഭിക്കുമെന്നാണ് കണക്കുകൂട്ടൽ.

​ചെലവഴിക്കുന്ന തുകയിൽ സിംഹഭാഗവും വള്ളങ്ങൾക്കുള്ള ബോണസിനായാണ് മാറ്റിവെച്ചിരിക്കുന്നത് (1.65 കോടി രൂപ). ഇൻഫ്രാസ്ട്രക്ചർ കമ്മിറ്റിക്ക് 60 ലക്ഷം രൂപയും, 2024, 2025 വർഷങ്ങളിലെ മെയിന്റനൻസ് ഗ്രാന്റ് ഇനത്തിൽ 36 ലക്ഷം രൂപയും വകയിരുത്തിയിട്ടുണ്ട്. കൾച്ചറൽ കമ്മിറ്റിക്ക് 15 ലക്ഷം, പബ്ലിസിറ്റിക്ക് 9 ലക്ഷം, പ്രൈസ് മണിക്ക് 8.25 ലക്ഷം രൂപ എന്നിങ്ങനെയാണ് മറ്റു പ്രധാന വകയിരുത്തലുകൾ.

​ഒരുക്കങ്ങൾ സജീവം

വള്ളംകളി ഉദ്ഘാടന ചടങ്ങിലേക്ക് മുഖ്യാതിഥികളെ കണ്ടെത്താൻ ജില്ലാ കളക്ടറെ യോഗം ചുമതലപ്പെടുത്തി. പ്രവേശന ടിക്കറ്റ് നിരക്കുകളിൽ മാറ്റമുണ്ടാകില്ല. സ്പോൺസർഷിപ്പിനായി ഉടൻ ടെൻഡർ ക്ഷണിക്കും. വിവിധ സബ് കമ്മിറ്റികളുടെ കൺവീനർമാരായി ആലപ്പുഴ ആർ.ഡി.ഒ (ഫിനാൻസ്, സ്പോൺസർഷിപ്പ്), ഇറിഗേഷൻ എക്സിക്യൂട്ടീവ് എഞ്ചിനീയർ (ഇൻഫ്രാസ്ട്രക്ചർ), എ.ഡി.എം (സുവനീർ), ജില്ലാ ഇൻഫർമേഷൻ ഓഫീസർ (പബ്ലിസിറ്റി) തുടങ്ങിയ പ്രമുഖ ഉദ്യോഗസ്ഥരെ ചുമതലപ്പെടുത്തിയിട്ടുണ്ട്.

​യോഗത്തിൽ മുൻ എം.എൽ.എമാരായ അഡ്വ. എ.എ. ഷുക്കൂർ, സി.കെ. സദാശിവൻ, കെ.കെ. ഷാജു, എ.ഡി.എം സി. പ്രേംജി, ഡെപ്യൂട്ടി കളക്ടർ കല ഭാസ്കർ, ഡിവൈ.എസ്.പി ഗിൽസൺ മാത്യു, ചുണ്ടൻവള്ളം ഉടമ അസോസിയേഷൻ പ്രസിഡന്റ് ആർ.കെ. കുറുപ്പ് തുടങ്ങിയവർ പങ്കെടുത്തു.