കാർത്തിയും മോഹൻ രാജയും കൈകോർക്കുന്നു; വമ്പൻ ഫാമിലി എന്റർടെയ്നറുമായി പ്രിൻസ് പിക്ചേഴ്സ്
നടൻ കാർത്തിയും സംവിധായകൻ മോഹൻ രാജയും ഒന്നിക്കുന്ന പുതിയ ഫാമിലി എന്റർടെയ്നർ ചിത്രം പ്രിൻസ് പിക്ചേഴ്സ് പ്രഖ്യാപിച്ചു. എസ്. ലക്ഷ്മൺ കുമാർ നിർമ്മിക്കുന്ന ചിത്രത്തിന്റെ ഷൂട്ടിംഗ് ഉടൻ ആരംഭിക്കും.
Sabari 
കാർത്തിയും മോഹൻ രാജയും കൈകോർക്കുന്നു; വമ്പൻ ഫാമിലി എന്റർടെയ്നറുമായി പ്രിൻസ് പിക്ചേഴ്സ്
ചെന്നൈ: തെന്നിന്ത്യൻ താരം കാർത്തിയും പ്രശസ്ത സംവിധായകൻ മോഹൻ രാജയും ആദ്യമായി ഒന്നിക്കുന്ന പുതിയ ചിത്രം ഔദ്യോഗികമായി പ്രഖ്യാപിച്ചു. 'സിങ്കം 2', 'സർദാർ' തുടങ്ങിയ നിരവധി ബ്ലോക്ക്ബസ്റ്റർ ഹിറ്റുകൾ സമ്മാനിച്ച പ്രിൻസ് പിക്ചേഴ്സിന്റെ ബാനറിൽ എസ്. ലക്ഷ്മൺ കുമാർ ആണ് ഈ ബ്രഹ്മാണ്ഡ ചിത്രം നിർമ്മിക്കുന്നത്. ഒരു ഗ്രാൻഡ് ഫാമിലി എന്റർടെയ്നർ ആയാണ് ചിത്രം അണിയിച്ചൊരുക്കുന്നത്.
കുടുംബ മൂല്യങ്ങൾ, ഹൃദയസ്പർശിയായ മുഹൂർത്തങ്ങൾ, പ്രേക്ഷകരെ ആവേശം കൊള്ളിക്കുന്ന ഹീറോയിസം എന്നിവയുടെ വലിയൊരു ദൃശ്യാവിഷ്കാരമായിരിക്കും ഈ ചിത്രമെന്ന് അണിയറപ്രവർത്തകർ വ്യക്തമാക്കി. കരിയറിൽ നിരവധി ഫാമിലി സൂപ്പർ ഹിറ്റുകൾ നൽകിയിട്ടുള്ള കാർത്തി, ഈ ചിത്രത്തിലൂടെ ഫാമിലി എന്റർടെയ്നർ വിഭാഗത്തിലേക്ക് ശക്തമായ തിരിച്ചുവരവ് നടത്തുന്നു എന്ന പ്രത്യേകതയുമുണ്ട്. എല്ലാ വിഭാഗം പ്രേക്ഷകരെയും ഒരുപോലെ രസിപ്പിക്കുന്ന രീതിയിലാണ് ചിത്രം ഒരുങ്ങുന്നത്.
'സന്തോഷ് സുബ്രഹ്മണ്യം', 'വേലായുധം', 'തനി ഒരുവൻ' തുടങ്ങിയ ജനപ്രിയ ചിത്രങ്ങളിലൂടെ ശ്രദ്ധേയനായ മോഹൻ രാജയുടെ സിനിമാജീവിതത്തിലെ 25-ാം വാർഷിക വേളയിലാണ് ഈ പുതിയ പ്രോജക്ട് പ്രഖ്യാപിച്ചിരിക്കുന്നത്. അദ്ദേഹത്തിന്റെ ശക്തമായ തിരിച്ചുവരവായി മാറുന്ന ഈ ചിത്രത്തിനായി വലിയ പ്രതീക്ഷയോടെയാണ് സിനിമാലോകവും ആരാധകരും കാത്തിരിക്കുന്നത്.
ചിത്രത്തിൽ വൻതാരനിരയും പ്രമുഖ സാങ്കേതിക വിദഗ്ധരും അണിനിരക്കുമെന്ന് നിർമ്മാതാക്കൾ അറിയിച്ചു. ചിത്രത്തിന്റെ ഷൂട്ടിംഗ് ഉടൻ ആരംഭിക്കും. അഭിനേതാക്കൾ, സാങ്കേതിക പ്രവർത്തകർ, റിലീസ് പ്ലാനുകൾ എന്നിവയെക്കുറിച്ചുള്ള കൂടുതൽ വിവരങ്ങൾ വരും ആഴ്ചകളിൽ ഔദ്യോഗികമായി പുറത്തുവിടും. “ഒരു പുതിയ യാത്ര ആരംഭിക്കുന്നു” എന്ന കുറിപ്പോടെയാണ് പ്രിൻസ് പിക്ചേഴ്സ് ഈ പുതിയ ചിത്രത്തിന്റെ പ്രഖ്യാപനം പുറത്തുവിട്ടത്.
