ജോ കോമ്പോ വീണ്ടും ജി.വി പ്രകാശിനൊപ്പം മാളവിക മനോജ് സംവിധാനം ഹരിഹരൻ റാം

​ജി.വി. പ്രകാശും ഹരിഹരൻ റാമും ഒന്നിക്കുന്നു; 'ജോ' ടീമിനൊപ്പം മാളവിക മനോജും, നിർമ്മാണം ലാർക്ക് സ്റ്റുഡിയോസ്

​ചെന്നൈ: 'ജോ' എന്ന സൂപ്പർഹിറ്റ് ചിത്രത്തിന് ശേഷം സംവിധായകൻ ഹരിഹരൻ റാം ഒരുക്കുന്ന പുതിയ ചിത്രത്തിൽ ജി.വി. പ്രകാശ് കുമാർ നായകനാകുന്നു. ലാർക്ക് സ്റ്റുഡിയോയും പാരലൽ യൂണിവേഴ്സ് പിക്ചേഴ്സും ചേർന്നാണ് ഈ ബിഗ് ബജറ്റ് ചിത്രം നിർമ്മിക്കുന്നത്. 'കരുഡൻ', 'മാമൻ' എന്നീ ബ്ലോക്ക്ബസ്റ്ററുകൾക്ക് ശേഷം ലാർക്ക് സ്റ്റുഡിയോ നിർമ്മിക്കുന്ന മൂന്നാമത്തെ ചിത്രമാണിത്.

​തന്റെ ആദ്യ ചിത്രമായ 'ജോ'യിലൂടെ തെന്നിന്ത്യൻ സിനിമാപ്രേമികളുടെ ശ്രദ്ധ പിടിച്ചുപറ്റിയ ഹരിഹരൻ റാം, തികച്ചും വ്യത്യസ്തമായ ഒരു പ്രമേയമാണ് ഈ ചിത്രത്തിനായി ഒരുക്കിയിരിക്കുന്നത്. ചിത്രത്തിൽ നായകനായി എത്തുന്ന ജി.വി. പ്രകാശ് കുമാർ തന്നെയാണ് സംഗീത സംവിധാനവും നിർവ്വഹിക്കുന്നത്. കഥാപാത്രത്തിനായി വലിയ രീതിയിലുള്ള തയ്യാറെടുപ്പുകളിലൂടെയാണ് താരം ഇപ്പോൾ കടന്നുപോകുന്നത്.

​'ജോ'യിലെ പ്രകടനത്തിലൂടെ പ്രേക്ഷകമനം കവർന്ന മാളവിക മനോജ് ആണ് ചിത്രത്തിൽ നായികയായെത്തുന്നത്. 'കർണൻ', 'വാഴ' എന്നീ ചിത്രങ്ങളിലൂടെ ശ്രദ്ധേയനായ തേനി ഈശ്വർ ഛായാഗ്രഹണം നിർവ്വഹിക്കുന്നു. തമിഴിലെ പ്രമുഖ താരങ്ങളും സാങ്കേതിക വിദഗ്ധരും ചിത്രത്തിന്റെ ഭാഗമാകുമെന്നാണ് റിപ്പോർട്ടുകൾ. നിലവിൽ പ്രീ-പ്രൊഡക്ഷൻ ജോലികൾ പുരോഗമിക്കുന്ന ചിത്രത്തിന്റെ ചിത്രീകരണം ജൂണിൽ ആരംഭിക്കും.