ചിരഞ്ജീവി തരംഗം മന ശങ്കര വര പ്രസാദ് ഗാരു 300 കോടിയിലേക്ക്

ചിരഞ്ജീവി തരംഗം; 'മന ശങ്കര വര പ്രസാദ് ഗാരു' 300 കോടിയിലേക്ക്, ആന്ധ്രയിലും തെലുങ്കാനയിലും റെക്കോർഡ് കളക്ഷൻ

​ഹൈദരാബാദ്: തെലുങ്ക് മെഗാസ്റ്റാർ ചിരഞ്ജീവിയെ നായകനാക്കി അനിൽ രവിപുടി സംവിധാനം ചെയ്ത 'മന ശങ്കര വര പ്രസാദ് ഗാരു' ബോക്സ് ഓഫീസിൽ ജൈത്രയാത്ര തുടരുന്നു. ജനുവരി 12-ന് തീയേറ്ററുകളിലെത്തിയ ചിത്രം വെറും ഏഴ് ദിവസത്തിനുള്ളിൽ 292 കോടി രൂപയുടെ ആഗോള ഗ്രോസ് കളക്ഷൻ നേടി 300 കോടി ക്ലബ്ബിലേക്ക് കുതിക്കുകയാണ്. എട്ടാം ദിനം തന്നെ ചിത്രം ഈ ചരിത്ര നേട്ടം കൈവരിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

​പുതിയ ബോക്സ് ഓഫീസ് റെക്കോർഡുകൾ

റിലീസ് ചെയ്ത് ഏഴാം ദിവസവും 31 കോടി രൂപയുടെ ആഗോള കളക്ഷൻ നേടിയ ചിത്രം, ആന്ധ്രപ്രദേശ്, തെലുങ്കാന സംസ്ഥാനങ്ങളിൽ എക്കാലത്തെയും ഉയർന്ന ഏഴാം ദിന 'ഷെയർ' എന്ന റെക്കോർഡും സ്വന്തമാക്കി. അനിൽ രവിപുടിയുടെ കരിയറിലെ തന്നെ ഏറ്റവും വലിയ വിജയമായി മാറിയ ഈ ചിത്രം, അദ്ദേഹത്തിന്റെ മുൻ ചിത്രമായ 'സംക്രാന്തികി വസ്തുന്നത്തെ' മറികടന്നു. വടക്കേ അമേരിക്കയിൽ 2.96 മില്യൺ ഡോളർ നേടിയ ചിത്രം ഉടൻ തന്നെ 3 മില്യൺ ഡോളർ എന്ന നേട്ടത്തിലെത്തും.

​ഫാമിലി എന്റർടൈനർ ഹിറ്റ്

ചിരഞ്ജീവിയുടെ മാസ്സും അനിൽ രവിപുടിയുടെ സിഗ്നേച്ചർ കോമഡിയും ചേർന്നപ്പോൾ എല്ലാ വിഭാഗം പ്രേക്ഷകരെയും തൃപ്തിപ്പെടുത്തുന്ന ഒരു പക്കാ ഫാമിലി എന്റർടൈനറായി ചിത്രം മാറി. ലേഡി സൂപ്പർസ്റ്റാർ നയൻതാര നായികയായെത്തുന്ന ചിത്രത്തിൽ വെങ്കിടേഷ് അതിഥി വേഷത്തിൽ എത്തുന്നു എന്ന പ്രത്യേകതയുമുണ്ട്. കാതറീൻ ട്രീസ, വിടിവി ഗണേഷ് എന്നിവരാണ് മറ്റ് പ്രധാന വേഷങ്ങളിൽ.

​സാഹു ഗരപതിയുടെ ഷൈൻ സ്ക്രീൻ ബാനറും സുഷ്മിത കൊണിഡെലയുടെ ഗോൾഡ് ബോക്സ് എന്റർടൈൻമെൻറ്സും ചേർന്നാണ് ചിത്രം നിർമ്മിച്ചിരിക്കുന്നത്. ഭീംസ് സിസിറോളിയോയുടെ സംഗീതവും സമീർ റെഡ്‌ഡിയുടെ ഛായാഗ്രഹണവും ചിത്രത്തിന് കരുത്തേകുന്നു. സംക്രാന്തി റിലീസുകളിൽ ഏറ്റവും വലിയ വിജയമായി 'മന ശങ്കര വര പ്രസാദ് ഗാരു' മാറിയിരിക്കുകയാണ്.