ഹൊറർ കോമഡിക്ക് ശേഷം ഫാന്റസി പ്രകമ്പനം സംവിധായകന്റെ പുതിയ ചിത്രവുമായി ശ്രീ ഗോകുലം ഗോപാലൻ
പ്രകമ്പനം എന്ന ഹിറ്റ് ചിത്രത്തിന് ശേഷം സംവിധായകൻ വിജേഷ് പാണത്തൂരും ശ്രീ ഗോകുലം മൂവീസും ഒന്നിക്കുന്ന പുതിയ ഫാന്റസി ചിത്രത്തിന്റെ പ്രഖ്യാപനം നടന്നു. സെപ്റ്റംബറിൽ ചിത്രീകരണം ആരംഭിക്കും.
Sabari 
പ്രകമ്പന'ത്തിന് ശേഷം വിജേഷ് പാണത്തൂർ; പുതിയ ഫാന്റസി ചിത്രവുമായി ശ്രീ ഗോകുലം മൂവീസ്, ചിത്രീകരണം സെപ്റ്റംബറിൽ
കൊച്ചി: മലയാള സിനിമയിലെ പ്രമുഖ നിർമ്മാണ കമ്പനിയായ ശ്രീ ഗോകുലം മൂവീസിന്റെ ബാനറിൽ ശ്രീ ഗോകുലം ഗോപാലൻ നിർമ്മിക്കുന്ന പുതിയ ചിത്രം പ്രഖ്യാപിച്ചു. ഈ വർഷം തിയേറ്ററുകളിൽ വലിയ വിജയവും ശ്രദ്ധയും നേടിയ 'പ്രകമ്പനം' എന്ന ഹൊറർ കോമഡി ചിത്രത്തിലൂടെ സംവിധായകനായി അരങ്ങേറ്റം കുറിച്ച വിജേഷ് പാണത്തൂരാണ് ഈ ചിത്രം ഒരുക്കുന്നത്. വലിയ കാൻവാസിൽ ഒരുങ്ങുന്ന ഒരു ഫാന്റസി ചിത്രമായിരിക്കും ഇതെന്നാണ് അണിയറപ്രവർത്തകർ നൽകുന്ന സൂചന.
വരുന്ന സെപ്റ്റംബർ മാസത്തിൽ തന്നെ ചിത്രത്തിന്റെ ചിത്രീകരണം ആരംഭിക്കും. ബൈജു ഗോപാലൻ, വി.സി. പ്രവീൺ എന്നിവർ കോ-പ്രൊഡ്യൂസർമാരാകുന്ന ചിത്രത്തിന്റെ എക്സിക്യൂട്ടീവ് പ്രൊഡ്യൂസർ കൃഷ്ണമൂർത്തിയാണ്. ചിത്രത്തിലെ അഭിനേതാക്കളെയും മറ്റ് അണിയറ പ്രവർത്തകരെയും കുറിച്ചുള്ള വിവരങ്ങൾ ഉടൻ പുറത്തുവിടുമെന്നാണ് പ്രതീക്ഷിക്കുന്നത്.
മലയാള സിനിമ കാത്തിരിക്കുന്ന വൻകിട പ്രോജക്റ്റുകളാണ് ശ്രീ ഗോകുലം മൂവീസിന്റേതായി നിലവിൽ അണിയറയിൽ ഒരുങ്ങുന്നത്. ജയസൂര്യ നായകനാകുന്ന ബ്രഹ്മാണ്ഡ ചിത്രം 'കത്തനാർ', എസ്.ജെ. സൂര്യയുടെ 'കില്ലർ', സുരേഷ് ഗോപി നായകനാകുന്ന 'ഒറ്റക്കൊമ്പൻ', മോഹൻലാൽ-വിഷ്ണു മോഹൻ കൂട്ടുകെട്ടിന്റെ 'L367' എന്നിവയ്ക്ക് ശേഷമാണ് വിജേഷ് പാണത്തൂർ ചിത്രവും ഈ പട്ടികയിലേക്ക് എത്തുന്നത്.
