ഹസീന കൊലപാതകം ഒളിവിൽ പോയ ഭർത്താവ് സുരേഷിനെ തമിഴ്നാട്ടിൽ ട്രെയിൻ തട്ടി മരിച്ച നിലയിൽ കണ്ടെത്തി
തിരുവനന്തപുരം നാലാഞ്ചിറയിൽ ഭാര്യ ഹസീന ബീവിയെ കഴുത്തറുത്തു കൊലപ്പെടുത്തിയ ശേഷം ഒളിവിൽ പോയ ഭർത്താവ് സുരേഷിനെ തമിഴ്നാട്ടിലെ ചിദംബരത്ത് റെയിൽവേ ട്രാക്കിൽ മരിച്ച നിലയിൽ കണ്ടെത്തി. ട്രെയിനിന് മുന്നിൽ ചാടി ആത്മഹത്യ ചെയ്തതാണെന്നാണ് പോലീസിന്റെ പ്രാഥമിക നിഗമനം.
Rajeev 
ഹസീന കൊലപാതകം: ഒളിവിൽ പോയ ഭർത്താവ് സുരേഷിനെ തമിഴ്നാട്ടിൽ ട്രെയിൻ തട്ടി മരിച്ച നിലയിൽ കണ്ടെത്തി
തിരുവനന്തപുരം: തലസ്ഥാനത്തെ നടുക്കിയ നാലാഞ്ചിറ ഹസീന ബീവി വധക്കേസിലെ പ്രതിയായ ഭർത്താവ് സുരേഷിനെ തമിഴ്നാട്ടിൽ മരിച്ച നിലയിൽ കണ്ടെത്തി. ചിദംബരത്തിന് സമീപം റെയിൽവേ ട്രാക്കിൽ ട്രെയിൻ തട്ടിയ നിലയിലായിരുന്നു മൃതദേഹം. ഭാര്യയെ ക്രൂരമായി കൊലപ്പെടുത്തിയ ശേഷം ഒളിവിൽ പോയ സുരേഷ് ട്രെയിനിന് മുന്നിൽ ചാടി ആത്മഹത്യ ചെയ്തതാണെന്നാണ് പോലീസിന്റെ പ്രാഥമിക നിഗമനം.
കഴിഞ്ഞ ദിവസം പുലർച്ചെ അഞ്ച മണിയോടെയാണ് തിരുവനന്തപുരം നാലാഞ്ചിറ ഉദിയന്നൂർ ക്ഷേത്രത്തിന് സമീപത്തെ വാടകവീട്ടിൽ വെച്ച് ഹസീന ബീവി (42) കൊല്ലപ്പെട്ടത്. കുടുംബവഴക്കിനെയും സുരേഷിന്റെ സംശയരോഗത്തെയും തുടർന്നുണ്ടായ തർക്കമാണ് കൊലപാതകത്തിൽ കലാശിച്ചത്. നാല് മക്കളും ഹസീനയുടെ അമ്മയും വീട്ടിലുള്ളപ്പോഴായിരുന്നു ദാരുണമായ സംഭവം നടന്നത്.
തുടർച്ചയായ കുടുംബകലഹത്തെ തുടർന്ന് ഹസീന ഏതാനും ദിവസങ്ങൾക്ക് മുൻപ് വീടുവിട്ടുപോയിരുന്നു. തുടർന്ന് സുരേഷ് നൽകിയ പരാതിയുടെ അടിസ്ഥാനത്തിൽ മണ്ണന്തല പോലീസ് ഇരുവരെയും സ്റ്റേഷനിൽ വിളിച്ചുവരുത്തി ഒത്തുതീർപ്പ് ചർച്ച നടത്തിയിരുന്നു. ഇതിനുശേഷമാണ് കഴിഞ്ഞ രണ്ടിന് വൈകിട്ടോടെ ഹസീന അമ്മയോടും മക്കളോടും ഒപ്പം വീട്ടിൽ തിരിച്ചെത്തിയത്. സ്കൂൾ തുറന്നിട്ടും കുട്ടികൾ പഠനത്തിന് പോകാതിരുന്നതിനാൽ, അമ്മ മടങ്ങിയെത്തിയതോടെ ഇന്നലെ സ്കൂളിൽ പോകാനുള്ള ഒരുക്കത്തിലായിരുന്നു നാല് മക്കളും.
എന്നാൽ, പുലർച്ചെയോടെ ദമ്പതികൾ തമ്മിൽ വീണ്ടും രൂക്ഷമായ വാക്കുതർക്കമുണ്ടാകുകയും, വഴക്കിനിടെ സുരേഷ് കറിക്കത്തി ഉപയോഗിച്ച് ഹസീനയുടെ കഴുത്തറുക്കുകയുമായിരുന്നു. കൊലപാതകത്തിന് ശേഷം ഉപയോഗിച്ച കത്തി ശൗചാലയത്തിൽ കഴുകി വൃത്തിയാക്കിയ പ്രതി, സ്വന്തം കാറിൽ കയറി സംഭവസ്ഥലത്തുനിന്ന് രക്ഷപ്പെട്ടു.
മുകളിലത്തെ നിലയിൽ നിന്ന് ബഹളം കേട്ടുണർന്ന കുട്ടികൾ മുറിയിൽ ചെന്നപ്പോഴാണ് രക്തത്തിൽ കുളിച്ചുകിടക്കുന്ന അമ്മയെ കണ്ടത്. ഉടൻ തന്നെ പത്താം ക്ലാസിൽ പഠിക്കുന്ന മകൻ പോലീസിനെ വിവരമറിയിക്കുകയായിരുന്നു. മണ്ണന്തല പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കിയ ശേഷം ഹസീനയുടെ മൃതദേഹം തിരുവനന്തപുരം മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി.
പ്രതിക്കായി മണ്ണന്തല പോലീസ് അന്വേഷണം ഊർജിതമാക്കിയിരിക്കെയാണ് തമിഴ്നാട്ടിൽ നിന്ന് സുരേഷിന്റെ മൃതദേഹം കണ്ടെടുത്ത വിവരം ലഭിക്കുന്നത്. പ്രതി മൊബൈൽ ഫോൺ ഉപേക്ഷിച്ച നിലയിലായിരുന്നതിനാൽ സൈബർ സെല്ലിന്റെ സഹായത്തോടെ മൊബൈൽ കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് മരണവിവരം സ്ഥിരീകരിച്ചത്. സംഭവത്തിൽ തമിഴ്നാട് പോലീസും മണ്ണന്തല പോലീസും മേൽനടപടികൾ സ്വീകരിച്ചു വരുന്നു.
