വന്യമൃഗശല്യം പദ്ധതികൾ വേഗത്തിൽ പൂർത്തിയാക്കാൻ നിർദ്ദേശിച്ച് ആൻ്റണി ജോൺ എം.എൽ.എ
കോതമംഗലത്തെ വന്യമൃഗശല്യം തടയാനുള്ള പദ്ധതികൾ അടിയന്തരമായി പൂർത്തിയാക്കണമെന്ന് ജില്ലാ വികസന സമിതി യോഗത്തിൽ ആൻ്റണി ജോൺ എം.എൽ.എ. ജില്ലയിലെ കുടിവെള്ള പ്രശ്നവും പാലങ്ങളുടെ നിർമ്മാണവും യോഗത്തിൽ ചർച്ചയായി.
അനില എം കൃഷ്ണൻ 
കോതമംഗലത്തെ വന്യമൃഗശല്യം: പ്രതിരോധ പദ്ധതികൾ വേഗത്തിൽ പൂർത്തിയാക്കണമെന്ന് ആൻ്റണി ജോൺ എം.എൽ.എ
കൊച്ചി: കോതമംഗലം മണ്ഡലത്തിലെ വിവിധ പഞ്ചായത്തുകൾ നേരിടുന്ന വന്യമൃഗശല്യം പ്രതിരോധിക്കുന്നതിനായുള്ള പദ്ധതികൾ സമയബന്ധിതമായി പൂർത്തിയാക്കണമെന്ന് ആൻ്റണി ജോൺ എം.എൽ.എ ആവശ്യപ്പെട്ടു. ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ കളക്ടറേറ്റ് പ്ലാനിങ് ഹാളിൽ ചേർന്ന ജില്ലാ വികസന സമിതി യോഗത്തിലാണ് അദ്ദേഹം ഈ ആവശ്യം ഉന്നയിച്ചത്.
ജനവാസ മേഖലകളിലിറങ്ങുന്ന വന്യമൃഗങ്ങൾ കാർഷിക വിളകൾ നശിപ്പിക്കുന്നതും ജനങ്ങളുടെ സുരക്ഷയ്ക്ക് ഭീഷണിയാകുന്നതും ഗൗരവകരമാണെന്നും ഇതിനായി പ്രഖ്യാപിച്ചിട്ടുള്ള പദ്ധതികളുടെ നടപടികൾ അടിയന്തരമായി പൂർത്തിയാക്കണമെന്നും അദ്ദേഹം പറഞ്ഞു.
കുടിവെള്ള ക്ഷാമത്തിന് പരിഹാരം വേണം
കൊച്ചി കോർപ്പറേഷൻ പരിധിയിലെയും പള്ളിപ്പുറം, ഞാറക്കൽ പഞ്ചായത്തുകളിലെയും രൂക്ഷമായ കുടിവെള്ളക്ഷാമത്തിന് വേഗത്തിൽ പരിഹാരം കാണണമെന്ന് മേയർ വി.കെ. മിനിമോൾ യോഗത്തിൽ ആവശ്യപ്പെട്ടു. തീരദേശ മേഖലയിലെ ജനങ്ങൾ അനുഭവിക്കുന്ന ബുദ്ധിമുട്ടുകൾ പരിഹരിക്കാൻ ബന്ധപ്പെട്ട വകുപ്പുകൾ ജാഗ്രത കാട്ടണമെന്നും നിർദ്ദേശമുയർന്നു.
മറ്റ് പ്രധാന തീരുമാനങ്ങൾ:
കിഴക്കമ്പലം ബസ് സ്റ്റാൻഡ്: 2020-21 കാലയളവിൽ ആരംഭിച്ച കിഴക്കമ്പലം പഞ്ചായത്ത് ബസ് സ്റ്റാൻഡ് നവീകരണവുമായി ബന്ധപ്പെട്ട് ജോയിൻ്റ് ഡയറക്ടറുടെ നേതൃത്വത്തിൽ അടിയന്തര യോഗം വിളിക്കും.
പാടശേഖര നവീകരണം: കുഴുപ്പിള്ളി പഞ്ചായത്തിലെ ഐക്യസമാജം പാടശേഖരത്ത് പമ്പ് സെറ്റ് സ്ഥാപിക്കുന്നതിനുള്ള ടെൻഡർ നടപടികൾ വേഗത്തിലാക്കാൻ തീരുമാനിച്ചു.
പാലങ്ങളുടെ നിർമ്മാണം: കോൺവെൻ്റ് ബീച്ച് പാലം, ഹെർബർട്ട് പാലം, ചെറിയ കടമക്കുടി പാലം എന്നിവയുടെ സ്ഥലമെടുപ്പ് നടപടികൾ പൂർത്തിയാക്കി നിർമ്മാണം ഉടൻ ആരംഭിക്കാൻ ജില്ലാ കളക്ടർ ഉദ്യോഗസ്ഥർക്ക് നിർദ്ദേശം നൽകി.
യോഗത്തിൽ അഡീഷണൽ ജില്ലാ മജിസ്ട്രേറ്റ് വിനോദ് രാജ്, ജില്ലാ പ്ലാനിംഗ് ഓഫീസർ ജി. ഉല്ലാസ് തുടങ്ങിയവർ പങ്കെടുത്തു.
