അങ്ങോട്ട് പോയവർ ആരും തിരിച്ചു വന്നിട്ടില്ല ദുരൂഹതയുണർത്തി സംഭവം അദ്ധ്യായം ഒന്ന് ട്രെയ്‌ലർ പുറത്തിറങ്ങി

കൊച്ചി: വനത്തിനുള്ളിലെ നിഗൂഢതകളും തുടർച്ചയായുണ്ടാകുന്ന തിരോധാനങ്ങളും പ്രമേയമാക്കി ഒരുങ്ങുന്ന പുതിയ ചിത്രം 'സംഭവം അദ്ധ്യായം ഒന്ന്' (Sambhavam Adhyayam Onnu) ട്രെയ്‌ലർ പുറത്തിറങ്ങി. ജിത്തു സതീശൻ മംഗലത്ത് തിരക്കഥയെഴുതി സംവിധാനം ചെയ്യുന്ന ഈ ചിത്രം ഒരു മിസ്റ്ററി ഫാന്റസി ത്രില്ലറാണ്.

​"അങ്കെ പോണോങ്ക ആരുമേ ഉയിരോടെ തിരുമ്പി വന്തതേയില്ല" (അങ്ങോട്ട് പോയവർ ആരും ജീവനോടെ തിരിച്ചു വന്നിട്ടില്ല) എന്ന ഉദ്വേഗജനകമായ തമിഴ് സംഭാഷണത്തോടെയാണ് ട്രെയ്‌ലർ ആരംഭിക്കുന്നത്. കേരള-തമിഴ്‌നാട് അതിർത്തിയിലുള്ള ഒരു കാടിനുള്ളിൽ ആളുകൾ അപ്രത്യക്ഷമാകുന്നതും, അതിനുപിന്നിലെ ദുരൂഹതകളുമാണ് ചിത്രം ചർച്ച ചെയ്യുന്നത്. ഹൊറർ ഘടകങ്ങൾക്കും സസ്പെൻസിനും തുല്യ പ്രാധാന്യം നൽകിക്കൊണ്ടാണ് ചിത്രം ഒരുക്കിയിരിക്കുന്നത്.

​അസ്ക്കർ അലി, വിനീത് കുമാർ, സിദ്ധാർത്ഥ് ഭരതൻ, അസീം ജമാൽ, സെന്തിൽ കൃഷ്ണ എന്നിവരാണ് ചിത്രത്തിലെ പ്രധാന വേഷങ്ങൾ കൈകാര്യം ചെയ്യുന്നത്. വലിയ താരനിര അണിനിരക്കുന്ന ഈ ചിത്രം നല്ല സിനിമ പ്രൊഡക്ഷൻസിൻ്റെ ബാനറിൽ ഫഹദ് സിദ്ദിഖ്, ഫറാസ് മറ്റപ്പള്ളി, ഫയസ് മുഹമ്മദ് എന്നിവർ ചേർന്നാണ് നിർമ്മിക്കുന്നത്.

​പാലക്കാട്, തിരുവനന്തപുരം, വൈക്കം, വെള്ളൂർ എന്നിവിടങ്ങളിലായി ചിത്രീകരണം പൂർത്തിയാക്കിയ സിനിമ മാർച്ച് 6-ന് പ്രദർശനത്തിനെത്തും. നവീൻ നജോസ് ഛായാഗ്രഹണവും ഗോഡ്‌വിൻ തോമസ് പശ്ചാത്തല സംഗീതവും നിർവ്വഹിച്ചിരിക്കുന്നു. അർജുൻ പ്രകാശാണ് എഡിറ്റിങ്. പ്രമുഖ അണിയറ പ്രവർത്തകരായ പട്ടണം റഷീദ് (മേക്കപ്പ്), സമീര സനീഷ് (വസ്ത്രാലങ്കാരം) എന്നിവരും ഈ ചിത്രത്തിൻ്റെ ഭാഗമാണ്.

​സസ്പെൻസ് ത്രില്ലർ പ്രേമികളെ ആവേശത്തിലാക്കുന്ന ട്രെയ്‌ലർ ഇതിനോടകം തന്നെ സോഷ്യൽ മീഡിയയിൽ വൈറലായിട്ടുണ്ട്.