​മണ്ണിടിച്ചിൽ മുൻകൂട്ടി അറിയാം സംസ്ഥാനത്തെ ആദ്യ ദുരന്ത മുന്നറിയിപ്പ് സംവിധാനം

മണ്ണിടിച്ചിൽ മുൻകൂട്ടി അറിയാം; സംസ്ഥാനത്തെ ആദ്യ ദുരന്ത മുന്നറിയിപ്പ് സംവിധാനം കണ്ണൂരിലെ മാടശ്ശേരി മലയിൽ ഒരുങ്ങുന്നു

കണ്ണൂർ: സംസ്ഥാനത്ത് ആദ്യമായി മണ്ണിടിച്ചിൽ സാധ്യത മുൻകൂട്ടി കണ്ടെത്തി പൊതുജനങ്ങൾക്ക് മുന്നറിയിപ്പ് നൽകാനുള്ള അത്യാധുനിക സംവിധാനം ഒരുങ്ങുന്നു. കണ്ണൂർ ജില്ലയിലെ കണിച്ചാർ ഗ്രാമപഞ്ചായത്തിൽ ഉൾപ്പെടുന്ന മാടശ്ശേരി മലയിലാണ് ഈ പുതിയ സാങ്കേതികവിദ്യ സ്ഥാപിക്കുന്നത്. മണ്ണിന്റെ ഘടന, മഴയുടെ അളവ്, ഭൂമിശാസ്ത്രപരമായ മറ്റ് പ്രത്യേകതകൾ എന്നിവ കൃത്യമായി ശേഖരിച്ച് വിശകലനം ചെയ്താണ് ഈ സംവിധാനം മണ്ണിടിച്ചിൽ സാധ്യത പ്രവചിക്കുന്നത്.

​സംസ്ഥാന ദുരന്തനിവാരണ അതോറിറ്റി, ഐ.ഐ.ടി റൂർക്കി, കെ-ഡിസ്ക് എന്നിവയുടെ സംയുക്ത ആഭിമുഖ്യത്തിൽ ഏകദേശം രണ്ട് കോടി രൂപ ചെലവിട്ടാണ് പദ്ധതി നടപ്പിലാക്കുന്നത്. 2022-ൽ മുപ്പത്തിനാലോളം ഇടങ്ങളിൽ മണ്ണിടിച്ചിൽ ഉണ്ടായ അതീവ പരിസ്ഥിതിലോല പ്രദേശമാണ് കണിച്ചാർ ഗ്രാമപഞ്ചായത്ത്. ഇതാണ് പദ്ധതിക്കായി ഈ പ്രദേശത്തെ തിരഞ്ഞെടുക്കാൻ കാരണം.

​പദ്ധതിയുടെ ആദ്യഘട്ടമെന്ന നിലയിൽ 'ഓഗ്സെൻസ് ലാബ്' എന്ന സ്വകാര്യ ഗവേഷണ കമ്പനിയുടെ നേതൃത്വത്തിൽ ഈ വർഷം ജനുവരിയിൽ ഒരു കാലാവസ്ഥാ മുന്നറിയിപ്പ് സംവിധാനം മാടശ്ശേരി മലയിൽ സ്ഥാപിച്ചിരുന്നു. നിലവിൽ ഇവിടെനിന്നും കാലാവസ്ഥാ പ്രവചനത്തിനുള്ള വിവരങ്ങൾ ശേഖരിക്കുന്നുണ്ട്. അടുത്ത ഘട്ടമായി മണ്ണ് പരിശോധനയ്ക്ക് ശേഷം 15 മുതൽ 20 മീറ്റർ വരെ ആഴത്തിൽ കുഴിയെടുത്ത് സെൻസറുകൾ സ്ഥാപിക്കുന്ന പ്രവൃത്തികളാണ് ഇനി നടക്കാനുള്ളത്. ഐ.ഐ.ടി റൂർക്കിയുടെ നേതൃത്വത്തിൽ മലയുടെ മുകളിൽ നിന്നും താഴേക്ക് എട്ട് പോയിന്റുകളിലായാണ് ഈ സെൻസറുകൾ സ്ഥാപിക്കുക.

​മാടശ്ശേരി മലയിൽ സ്ഥാപിക്കുന്ന ഈ സംവിധാനം വഴി സമാനമായ മൺഘടനയുള്ള തൊട്ടടുത്ത പ്രദേശങ്ങളിലെ മണ്ണിടിച്ചിൽ സാധ്യതയും കണ്ടെത്താനാകും. സെൻസറുകൾ പൂർണ്ണമായി പ്രവർത്തനസജ്ജമാകുന്നതോടെ ഒരു ഏകീകൃത പോർട്ടൽ സംവിധാനത്തിലൂടെ മഴയുടെ വിവരങ്ങളും മണ്ണിടിച്ചിൽ മുന്നറിയിപ്പുകളും തികച്ചും ശാസ്ത്രീയമായ രീതിയിൽ ലഭ്യമാകും.

​പൈലറ്റ് അടിസ്ഥാനത്തിൽ നടപ്പിലാക്കുന്ന ഈ പദ്ധതി വിജയകരമായാൽ, വയനാട് ഉൾപ്പെടെ സംസ്ഥാനത്ത് മണ്ണിടിച്ചിൽ ഭീഷണിയുള്ള മറ്റ് മലയോര മേഖലകളിലേക്കും ഈ സാങ്കേതികവിദ്യ വ്യാപിപ്പിക്കാനാണ് അധികൃതരുടെ തീരുമാനം.