കാലാവസ്ഥ അധിഷ്ഠിത വിള ഇൻഷുറൻസ്
കാലാവസ്ഥ അധിഷ്ഠിത വിള ഇൻഷുറൻസ് അപേക്ഷാ തീയതി ജനുവരി 15 വരെ നീട്ടി
അനില എം കൃഷ്ണൻ
154
കാലാവസ്ഥ അധിഷ്ഠിത വിള ഇൻഷുറൻസ്: അപേക്ഷാ തീയതി ജനുവരി 15 വരെ നീട്ടി
തിരുവനന്തപുരം: സംസ്ഥാന കൃഷി വകുപ്പ് നടപ്പിലാക്കുന്ന 2025 റാബി-II സീസൺ കാലാവസ്ഥ അധിഷ്ഠിത വിള ഇൻഷുറൻസ് പദ്ധതിയിലേക്ക് (WBCIS) അപേക്ഷിക്കാനുള്ള കാലാവധി നീട്ടി. കർഷകരുടെ അഭ്യർത്ഥനയും കൃഷി വകുപ്പിന്റെ ഇടപെടലും പരിഗണിച്ച് ജനുവരി 15 വരെയാണ് തീയതി ദീർഘിപ്പിച്ചത്.
കാലാവസ്ഥാ വ്യതിയാനം മൂലമുണ്ടാകുന്ന കൃഷിനാശങ്ങളിൽ നിന്ന് കർഷകർക്ക് സാമ്പത്തിക സുരക്ഷ ഉറപ്പാക്കുന്നതിനാണ് ഈ പദ്ധതി വിഭാവനം ചെയ്തിരിക്കുന്നത്. അർഹരായ കർഷകർക്ക് അംഗീകൃത ഇൻഷുറൻസ് ഏജൻസികൾ വഴിയോ ഔദ്യോഗിക ഓൺലൈൻ പോർട്ടൽ മുഖേനയോ അപേക്ഷകൾ സമർപ്പിക്കാവുന്നതാണ്.
ശ്രദ്ധിക്കേണ്ട കാര്യങ്ങൾ:
അപേക്ഷ സമർപ്പിച്ചു കഴിഞ്ഞാൽ ലഭിക്കുന്ന പോളിസി രേഖ കർഷകർ നിർബന്ധമായും പരിശോധിക്കണം. പോളിസിയിൽ രേഖപ്പെടുത്തിയിരിക്കുന്ന പ്രീമിയം തുക, കൃഷി ചെയ്യുന്ന പഞ്ചായത്ത്, വിളയുടെ പേര് എന്നിവ കൃത്യമാണെന്ന് ഉറപ്പുവരുത്തേണ്ടതാണ്. ഭാവിയിൽ ക്ലെയിം ലഭിക്കുന്നതിന് ഈ വിവരങ്ങളിലെ കൃത്യത അനിവാര്യമാണ്.
റാബി സീസണിൽ കൃഷിയിറക്കിയ പരമാവധി കർഷകർ ഈ പദ്ധതിയുടെ ഭാഗമാകണമെന്ന് കൃഷി വകുപ്പ് അധികൃതർ അറിയിച്ചു. കൂടുതൽ വിവരങ്ങൾക്കായി അടുത്തുള്ള കൃഷി ഭവനുമായോ അംഗീകൃത ഏജൻസികളുമായോ ബന്ധപ്പെടുക.
