നെടുമ്പാശ്ശേരിയിൽ 6.5 കിലോ കഞ്ചാവുമായി ബംഗാൾ സ്വദേശി പിടിയിൽ ലഹരി കടത്തിയത് ട്രെയിനിലും ബസിലുമായി
നെടുമ്പാശ്ശേരിയിൽ വൻ കഞ്ചാവ് വേട്ട. 6.5 കിലോ കഞ്ചാവുമായി പശ്ചിമ ബംഗാൾ സ്വദേശി ബാബുൽ മിത്രയെ പോലീസ് പിടികൂടി. ഇതര സംസ്ഥാന തൊഴിലാളികൾക്കിടയിൽ വിതരണത്തിനായാണ് ലഹരി എത്തിച്ചത്
Angel Varghese 
നെടുമ്പാശ്ശേരിയിൽ 6.5 കിലോ കഞ്ചാവുമായി ബംഗാൾ സ്വദേശി പിടിയിൽ; ലഹരി എത്തിച്ചത് ട്രെയിനിലും ബസിലുമായി
നെടുമ്പാശ്ശേരി: ഇതര സംസ്ഥാന തൊഴിലാളികൾക്കിടയിൽ വിതരണം ചെയ്യാനായി കടത്തിക്കൊണ്ടുവന്ന 6.5 കിലോ കഞ്ചാവുമായി പശ്ചിമ ബംഗാൾ സ്വദേശി പോലീസിന്റെ പിടിയിലായി. ആലിപ്പൂർ സ്വദേശി ബാബുൽ മിത്ര (41) യെയാണ് എറണാകുളം റൂറൽ ജില്ലാ ഡാൻസാഫും (DANSAF) നെടുമ്പാശ്ശേരി പോലീസും ചേർന്ന് പിടികൂടിയത്.
അത്താണി എയർപോർട്ട് സിഗ്നൽ ജംഗ്ഷനടുത്തുള്ള ബസ് സ്റ്റോപ്പിൽ നിന്നാണ് ഇയാളെ കഞ്ചാവുമായി കണ്ടെത്തിയത്. ആലുവ മാറമ്പിള്ളി ഭാഗത്തുള്ള തൊഴിലാളികൾക്കിടയിൽ വിൽപന നടത്താനായിരുന്നു ഇയാൾ പദ്ധതിയിട്ടിരുന്നത്. പോലീസ് പരിശോധനകൾ വെട്ടിക്കാനായി അതീവ ജാഗ്രതയോടെയാണ് ഇയാൾ ലഹരിമരുന്ന് കടത്തിയത്. ബംഗാളിൽ നിന്ന് ട്രെയിൻ മാർഗം കോയമ്പത്തൂരിലെത്തിയ പ്രതി, അവിടെ നിന്നാണ് ബസ് മാർഗം അത്താണിയിലെത്തിയത്. ബാഗിനുള്ളിൽ പ്രത്യേകമായി തയ്യാറാക്കിയ പായ്ക്കറ്റുകളിലാണ് കഞ്ചാവ് ഒളിപ്പിച്ചിരുന്നത്.
നർക്കോട്ടിക്ക് സെൽ ഡിവൈഎസ്പി ജെ. ഉമേഷ് കുമാർ, ആലുവ ഡിവൈഎസ്പി ബാബുക്കുട്ടൻ, എസ്ഐമാരായ അജീഷ് കെ. ജോൺ, ടി. അനൂപ്, ബിജു എന്നിവരടങ്ങിയ സംഘമാണ് പ്രതിയെ വലയിലാക്കിയത്. ഇയാളുടെ പിന്നിൽ പ്രവർത്തിക്കുന്ന മറ്റ് ലഹരി മാഫിയാ സംഘങ്ങളെക്കുറിച്ച് പോലീസ് അന്വേഷണം വ്യാപിപ്പിച്ചിട്ടുണ്ട്.
